¹ Ja̧u̧nu̧ o'ca'a SI̧qUȨNttÖ̧ Jo̧sú̧ȩmä̧ o'catoi'önä Israel ttö̧ja̧rö̧ huopinö, Israel ttö̧ja̧ttö̧ tä̧mö̧ sotörö'inä, ruhuotörö'inä, micuäunä pähuä ttö̧ja̧rö̧'i̧nä̧ , su̧ro̧da̧u̧ tturuhuotörö'inä ja̧'hua̧ta̧'a̧nö̧ jahuätömä Dios ä'ca jo̧mȩ kä̧mä̧di̧nä̧tö̧. ² Josúemä jahuätö o'catoi'önärö̧ pä'inö: pii̧yȩ ja̧'a̧ Israel ttö̧ja̧ TÖ̧Ä̧NÄ̧HUA̧ Dios päömä ucutu cuä̧do̧tö̧mä̧ Eufrate aje yabo päte'ö ki̧nä̧tö̧ täbocömä, Teraj Abraham'inä Nacor'inä, ttä'o minämä, TÖ̧Ä̧NÄ̧HUA̧ Diosttömä jitötä Ttö̧ä̧nä̧hua̧tö̧ imicunä huotörötä esetö ki̧nä̧tö̧. ³ Ja̧'hua̧nö̧ ja̧'a̧nä̧ Eufrate aje yabocuttömä cuä'otucu Abrahamrö'inä ȩmö̧ i'cächinösä̧ Canaán rȩjȩra̧'a̧ i̧tti̧ Isaacrö chiyinä̧cu̧ ja̧u̧nä̧tä̧ recuätörö ahuaruhuärö chiyinä̧cu̧. ⁴ Ja̧'hua̧ta̧'a̧nö̧ Isaacttömä Jacobrö'inä Esaurö'inä chiyinä̧cu̧; ja̧'hua̧ta̧'a̧nö̧ Esaurumä Seir muä'quiyunä iyinösä̧ i̧rȩjä̧ päi'önä; ja̧'hua̧nö̧ ja̧'a̧nä̧ Jacob'inä i̧tti̧mö̧'inä 'chi̧nä̧tö̧ Egipto rȩjȩra̧'a̧. ⁵ Ja̧'hua̧ta̧'a̧nö̧ ttömä hue'inö̧sä̧ Moisésrö'inä, Aarónrö'inä, Egipto ttö̧ja̧rö̧ ubara ttuttunä jȩcha̧ pä'ö, ja̧u̧nu̧ o'ca'a Israel ttö̧ja̧rö̧ rä'epö icuinösä̧ jahuätö ttö̧'cä̧tȩttö̧. ⁶ Egiptora̧'a̧ttö̧ rä'epö icu i'cächinösä cuä̧do̧tö̧ mi̧nä̧rö̧mä̧, aje rö̧o̧tora̧'a̧ tti̧rȩbȩhui̧'o̧mȩnä̧ EgIpto ttö̧ja̧mä̧ caruquiyänä'inä, cabayu̧tu̧ru̧'i̧nä̧ ru'i'inätö̧ dubora tuhuora jubö. ⁷ Ja̧'hua̧ta̧'a̧nö̧ cuä̧do̧tö̧ mi̧nä̧ Tu̧ru̧hua̧rö̧ huopönö jättepomenä, ja̧u̧mä̧ Israel ttö̧ja̧cu̧ Egipto ttö̧ja̧cu̧ 'cä̧tȩ yo̧i̧'ö̧nä̧ jȩpi̧nö̧, Ja̧u̧mä̧ aje rö̧o̧tora̧'a̧ tti̧'chi̧'ö̧nä̧ jȩi̧nä̧u̧ jahuätö ttö̧ja̧'a̧cu̧ ja̧u̧nu̧ o'ca'amä a̧'a̧u̧ icuinätö̧. Ucutumä topinätö̧jä̧ jȩchi̧nö̧mä̧ Egipto rȩjȩttö̧, ja̧u̧nu̧ o'ca'amä recuo mo̧ro̧ ki̧nä̧tö̧jä̧ de'a jui̧yä̧jä̧ra̧'a̧. ⁸ Jordán aje jäyä ji̧jä̧ ka̧cui̧nä̧tö̧ amorreos ttö̧ja̧ tti̧rȩjä̧ra̧'a̧ chi'cächinä̧u̧jä̧ jahuätömä ucuturu rohuähuinä̧tö̧, ja̧'hua̧nö̧ ja̧'a̧nä̧ Ttö iyinösä ucutu cumötucunä juhuäjä̧ rȩjȩmä̧, ja̧'hua̧ta̧'a̧nö̧ ja̧huä̧jä̧ rȩjȩmä̧ ucutu cui̧rȩjä̧tu̧cu̧ päi'önä eminätö̧jä̧, jahuätörömä jȩpö̧ icuinösä ucutu cuä'catucu jo̧mȩttö̧. ⁹ Ja̧u̧nu̧ o'ca'a Zipar i̧tti̧ Bala, Moab ru̧hua̧ ä̧rä̧mi̧'i̧nö̧ Israel ttö̧ja̧rö̧ örohuähua pä'ö. Ja̧u̧mä̧ huopönänö jä'epinö Beor i̧tti̧ Balaamrö Israel ttö̧ja̧rö̧ suronä päiyarö pä'ö. ¹⁰ Ja̧'hua̧nö̧ ja̧'a̧nä̧ Balaamrömä̧ ä̧ju̧cuo̧cö̧ pinösä ja̧u̧mä̧ adiunätä pä'inö. Ja̧'hua̧nö̧ ja̧'a̧ttö̧ ucutu cumötu̧cu̧ttö̧mä̧ ö̧ji̧pö̧nä̧ jȩchi̧nä̧cu̧. ¹¹ Ucutumä Jordán aje 'cuä'opö rebehuinätö̧jä̧ Jericora̧'a̧; ja̧'hua̧nö̧ Jerico ruhuotömä ucuturu rohuähuinätö, Amorreos ttö̧ja̧'i̧nä̧, Ferezeos ttö̧ja̧'inä Cananeos ttö̧ja̧'inä los hititas ttö̧ja̧'inä, gergeseos ttö̧ja̧'inä, heveos ttö̧ja̧'inä, ja̧'hua̧ta̧'a̧nö̧ jebuseos ttö̧ja̧'inä. jahuätörömä Ttömä iyinö̧sä̧ ucutu cumötucunä. ¹² Ttömä hue'inösä pä̧ju̧ru̧ ucutu cuä'catucunä tti̧'cha̧ pä'ö jahuätö ucuturu ottipa pä'ö Amorreos ttö̧ja̧ tturuhuotö ta̧ju̧ huotö tötticha pä'ö, pi̧yȩmä̧ 'cuäopönä curä'chunä'inä 'po'obunä'inä jo̧ca̧'a̧. ¹³ Ttömä iyinösä rȩjȩ cuaditätucuoca'a ji̧na̧'a̧nä̧ juhua'a jö̧ta'anö ötahuiyä'inä ucututötämä aditocotö pinä̧tö̧jä̧, cu̧jä̧tu̧cua̧ pä'ömä, jitämä ja̧u̧nä̧tä̧ kä̧tö̧jä̧ ucutumä uva pätta'inä ja̧'hua̧ta̧'a̧nö̧ olivo'inä cu̧ju̧ni̧nä̧tu̧cuo̧cö̧ ji̧nö̧ cuä̧nö̧ kä̧tö̧jä̧. ¹⁴ Ja̧'hua̧nö̧ ja̧'a̧ttö̧ Tu̧ru̧hua̧rö̧tä̧ ye'ecuätucui ja̧'hua̧ta̧'a̧nö̧ adiunä iso jönä ucuotö kä̧tu̧cui̧; Eufrate aje yabocuttö ja̧'hua̧ta̧'a̧nö̧ Egipto rȩjȩttö̧ cuä̧do̧tö̧ mi̧nä̧ ttä̧do̧'ä̧cuo̧tö̧ pinätörömä jȩpö̧ icu TU̧RU̧HUA̧RÖ̧ cua̧'cua̧ huȩnä̧rä̧tu̧cui̧. ¹⁵ Ja̧'hua̧nö̧ ja̧'a̧nä̧ Diosrö cuesetätucua'a cui'ärenä to'cuätucuomenä suronä jö̧ttö̧mä̧, pi̧yȩ mo̧ro̧mä̧ ucututä usätucui cu̧jä̧tu̧cuä̧jä̧ttö̧ esetö cu̧jä̧tu̧cuä̧cua̧rö̧mä̧, Eufrate aje yabottö cuä̧do̧tö̧ mi̧nä̧ ttesetinä̧u̧rö̧ jö̧ttö̧'i̧nä̧, Amorreos ttö̧ja̧ ttä̧do̧'ä̧cuo̧tö̧rö̧ jö̧ttö̧'inä ja̧'hua̧nö̧ ja̧'a̧nä̧ ttö'inä chauaruhuä'inä ujutumä TU̧RU̧HUA̧ Diosrötä tesetäcuotöjä. ¹⁶ Tö̧ä̧nä̧hua̧ Dios ji̧na̧'a̧, ujuturu'inä tä̧do̧tö̧ mi̧nä̧rö̧'i̧nä̧ Egipto rȩjȩttö̧ pä̧i̧cu̧nä̧ ttaditönä huȩ'ä̧rö̧ ¹⁷ ttö̧jo̧mȩttö̧ rä'epö icu i'cächinömä, ja̧u̧tä̧ ji̧na̧'a̧ to̧ttä̧ra̧'a̧nä̧ ttä̧ja̧ ttieruhuö juäi jȩpi̧nö̧mä̧ mä̧nä̧nä̧ tti̧'cho̧mȩnä̧'i̧nä̧ juȩ'ȩpä̧ri̧nö̧mä̧ ja̧'hua̧ta̧'a̧nö̧ korotö tti̧rȩji̧yä̧nä̧'i̧nä̧ 'cuättopönä jȩpi̧nö̧mä̧. ¹⁸ TÖ̧Ä̧NÄ̧HUA̧ Diostä ji̧na̧'a̧ ujutu tä'cattö Amorreos ttö̧ja̧rö̧ pi̧jä̧ rȩjȩnä̧ ki̧nä̧tö̧rö̧ rä'epö icuinömä ja̧'hua̧nö̧ ja̧'a̧ttö̧ ujutumä ucuotönö jȩtä̧cuo̧tö̧jä̧ Tu̧ru̧hua̧rö̧tä̧ ja̧u̧tä̧ ja̧'a̧ttö̧ TÖ̧Ä̧NÄ̧HUA̧ Dios surojö jui̧'a̧mä̧ . ¹⁹ Ja̧'hua̧nö̧ ja̧'a̧ttö̧ Josuémä Israel ttöjarö pä'inö: Ucutumä Dios aditähuä jȩ'cu̧'i̧yä̧tu̧cu̧'a̧nö̧ ja̧'a̧ttö̧ Ja̧u̧ Diosmä surojö jui̧'a̧ ja̧'a̧ttö̧ Ja̧u̧ Diosmä ä'cuoyäu ucutu koro ttö̧ä̧nä̧huo̧tö̧rö̧ ucuotö jȩ'cuä̧tu̧cu̧mä̧ ji̧'qui̧cha̧nö̧'i̧nä̧ u̧ni̧chi̧'i̧yäcua̧. ²⁰ TÖ̧Ä̧NÄ̧HUA̧ Diosrö jaropi'ö korotö ttö̧ja̧ ttö̧ä̧nä̧huo̧tö̧rö̧ cuesetätucuttumä ja̧u̧mä̧ ucutu cuaboi̧ya̧tu̧cu̧ päi'ä̧cua̧, ro̧ȩcuä̧ päi'önämä suronä jȩpö̧ cuä'äu icuätöjä adiunä jȩi̧nö̧ o'ca'amä. ²¹ Israel ttö̧ja̧mä̧ pä'inätö: Josuérö:Ja̧'hua̧nö̧mä̧cö̧, Tu̧ru̧hua̧rö̧tä̧ ucuotö jȩtä̧cuo̧tö̧jä̧." ²² Ja̧'hua̧nö̧ pättiyäcu Josuémä pä'inö jahuätörö: Ucutötä ja̧'a̧ to̧'cuä̧rä̧cuä̧huä̧tu̧cua̧ pä'ö huotömä ucututä jähuämä Tu̧ru̧hua̧rö̧tä̧ ucuotö jȩtä̧cuo̧tö̧jä̧ päcuätucumä, "jahuätömä pä'inätö ujututä to̧tä̧rä̧cuä̧huä̧cuo̧tö̧jä̧." ²³ Josué päinä̧u̧: Jitämä kara'acu ku̧nä̧tu̧cui̧ korotö ttö̧ä̧nä̧huo̧tö̧rö̧mä̧ ppa̧'a̧ä̧chä̧tu̧cui̧ cuami'iso'quitucu Tu̧ru̧hua̧rö̧tä̧ Israel ttö̧ja̧ TTÖ̧Ä̧NÄ̧HUA̧ Diosrötä. ²⁴ Israel ttö̧ja̧mä̧ Josuérö pä'inätö: "Ujutumä̧ TÖ̧Ä̧NÄ̧HUA̧ Diosrötä ucuotö jȩtä̧cuo̧tö̧jä̧, i̧huȩnȩmä̧ tä̧ju̧cuä̧cuo̧tä̧jä̧" ²⁵ Ja̧'hua̧nö̧ ja̧'a̧ttö̧ Josuémä ja̧u̧nu̧ mo̧ro̧ Israel ttö̧ja̧cu̧ isojuoönä pähuä ucuocuinö, ja̧u̧ jȩtta̧ pä'ö ku̧nä̧huä̧'i̧nä̧ hueähuä huȩnȩ'i̧nä̧ jȩpö̧ ku̧nö̧ Siquenttömä̧. ²⁶ Josué pi̧yȩ huȩnȩmä̧ huȩyu̧tu̧ ku̧ni̧nö̧ Diosttö hueähuä cuyäru'tänä, ja̧u̧ io'qui rö̧o̧'qui ȩmo̧po̧'ö̧ ju̧huȩnȩtä̧ rutinö Roble pättäi dau dȩa̧'a̧ Tu̧ru̧hua̧rö̧ amöcuädö ku icu iyähuäca jäyä. ²⁷ Josuémä pä'inö o'catoi'önärö Israel ttö̧ja̧rö̧: Topätucui po'qui ido'quimä jiähuäcua'a ujutu suronä jȩtö̧mä̧, juo'qui ido'quimä Dios ujuturu päji huȩnȩ ä̧ju̧cuä̧ra̧'a̧, ja̧'hua̧nö̧ ja̧'a̧ttö̧ juo'quimä ujutu suronä jȩtä̧ji̧mä̧ jiähuäcua'a Diosrö, ya̧tȩ ya'utenätä jȩru̧pa̧sä̧ päöttömä." ²⁸ Ja̧'hua̧nö̧ ja̧'a̧ttö̧ Josuémä ötahuiyä ttö̧ja̧rö̧mä̧ oto hue'ö icuinö yotucu pönä tti̧rȩjä̧ pö̧nä̧. ²⁹ Pi̧yȩ 'cuäopinö o'ca'a TÖ̧Ä̧NÄ̧HUA̧ u̧mö̧huä̧ya̧ Nun i̧tti̧ Josuémä 110 a̧'ȩ u̧ju̧nä̧ra̧'a̧ 'corupä'i'inö. ³⁰ Ja̧'hua̧ta̧'a̧nö̧ rȩ'ä̧dö̧ tticuinäcu̧ Tinnat-sera, chutä i̧rȩjä̧ beipome Efraín möä'quiyunä Gad möä'cattö kä̧hua̧ u̧huo̧jua̧'a̧cu̧ päte'ö. ³¹ Josué u̧ji̧nu̧ pä̧nä̧mä̧ Israel ttö̧ja̧mä̧ TÖ̧Ä̧NÄ̧HUA̧RÖ̧TÄ̧ esetö ucuotö ka̧cui̧nä̧tö̧ o'catoi'önä tä̧mö̧ sotö'inä Josuécu ki̧nä̧tö̧mä̧ TÖ̧Ä̧NÄ̧HUA̧RÖ̧TÄ̧ esetö ki̧nä̧tö̧. Jitö Dios Israel ttö̧ja̧rö̧ ppäda'a topinätö'inä Josué ö̧ji̧nö̧ pä̧nä̧mä̧ Tu̧ru̧hua̧rö̧tä̧ esetö ki̧nä̧tö̧. ³² Josué ihue'quiyu Egipto rȩjȩttö̧ Israel ttö̧ja̧ rä'epö tticuinömä Siquemnä rȩä̧dö̧ icuinätö. Hamor i̧tti̧mö̧ttö̧ Siquem jä'ottö ji̧'qui̧cha̧nö̧ rȩjȩ 100nö pärätä o̧bi̧nä̧ mitö Jacob ȩmi̧nä̧jä̧nä̧; j'hua̧nö̧ ja̧'a̧ttö̧ Josué ahuaruhuä 'cotö ttä̧rȩjä̧ jö̧nä̧tä̧ ji̧nä̧jä̧ ja̧huä̧jä̧mä̧. ³³ Ja̧'hu̧nö̧ ji̧nö̧ o'ca'a Aáron i̧tti̧ Eleazar'inä 'corujuo'ächinö; tti̧rȩä̧di̧nä̧cu̧ finees chutä i̧tti̧ idepiyunä Guibeanä, ja̧u̧ ötahuiyämä Efraín möä'canä huȩji̧na̧'a̧, ja̧u̧ ötahuiyämä ja̧u̧rö̧tä̧ iyähi'ina'a ji̧na̧'a̧.