1 Ja̧u̧nö̧ pänä Josuemä huopinö Ruben ahuaruhuä 'cotörö Manasés ahuaruhuä 'cottömä jö'totörötä. 2 Ja̧u̧mä̧ pä̧i̧nä̧u̧: "Ucutumä Tö̧ä̧nä̧hua̧ Dios u̧mö̧huä̧ya̧ Moises hueinöta'anötä jȩpi̧nä̧tö̧jä̧". Ucutumä ttö huedinömä o'cajuiyönätä jȩpi̧nä̧tö̧jä̧. 3 Ucutumä cu̧jä̧hua̧tö̧ huotörömä jaropi'ocotö pi̧nä̧tö̧jä̧ o'cajuiyönä ja̧u̧nö̧ mo̧ro̧mä̧, jaropi ocotöjä jitä mo̧ro̧ jubö. Ja̧hua̧ta̧'a̧nö̧ ucutumä Tö̧ä̧nä̧hua̧ Dios jȩcu̧'ä̧tucua pä'ö huenömä jȩpi̧nä̧tö̧jä̧. 4 Jitämä Tö̧ä̧nä̧hua̧ Diosmä cuähuäruhuäcu cuäcuächi'atucua pä'ö huȩä̧u̧jä̧, pä'inö ji̧nö̧ ta̧'a̧nö̧tä̧. Ja̧hua̧nö̧ ja̧'a̧ttö̧ ppa̧'ä̧chä̧tu̧cui̧ cui̧rȩjä̧tu̧cu̧ pö̧nä̧ i̧sa̧ttö̧ adicuode co̧ju̧ odehuiyätucu pönä, Tö̧ä̧nä̧hua̧ Dios u̧mö̧huä̧ya̧ Moises iyinä̧ja̧ra̧'a̧ Jordan aje jäyä ji̧jä̧nä̧. 5 Tö̧ä̧nä̧hua̧ Dios u̧mö̧huä̧ya̧ Moises huȩä̧hua̧ huȩnȩ i̧huȩyu̧ti̧nö̧mä̧ ji̧yȩtȩ'i̧nä̧ cu̧nu̧chi̧'ätucuo, Cuä̧nä̧hua̧ Diosrömä, cui̧'chö̧ jö̧ o̧dö̧nä̧mä̧ cui'chomenä'inä repe'i, hua'ado ku̧ni̧ hueähuä huȩnȩmä̧ ja̧hua̧ta̧'a̧nö̧ o'cajuiyönä cuami'isoquinä'inä cua̧'cua̧rö̧ä̧nä̧'i̧nö̧ ucuotö jȩpi̧. 6 Ja̧hua̧ta̧'a̧nö̧ Josuemä adiunä ucuocu ppattächa pä'ö hue'ö i̧cui̧nä̧u̧, ja̧hua̧ta̧'nö̧ ja̧'a̧ttö̧ jahuätömä ppa̧'ä̧chi̧nä̧tö̧ ttö̧ju̧ odehuiyä i̧sa̧ttö̧ idicu odera'a 7 Ja̧'hua̧nö̧ ja̧'a̧ Manasés ahuaruhuä 'cotöttö ppä'ächotömä, tti̧rȩjä̧ päi'önä Basán ötahuiyänä Moisés iyinäu ji̧na̧'a̧, ja̧'hua̧nö̧ ja̧'a̧nä̧ juätötä ppä'ächotörömä tti̧rȩjä̧ päi'önä Jordán ajettömä kä̧hua̧ ma̧ä̧cha̧'a̧cu̧ tti̧rȩjä̧ päi'önä Josué iyinäu ji̧na̧'a̧. Josuémä ttojusodera̧'a̧cu̧ hue'ö icuinä̧u̧; ja̧u̧ adihuomenä ja̧tö̧jä̧ pä'ömä 8 pä̧i̧nä̧u̧: Cuojusodehuiyätucura̧'a̧tä̧ ppa̧'a̧chä̧tu̧cui̧, pärätäcutä, cuä̧ji̧mö̧tu̧cu̧tä̧, platacutä, orocutä, broncecutä, cuoräucutä ja̧'hua̧ta̧nö̧ cui̧ä̧rȩä̧ti̧yu̧cu̧tä̧. Cuaboiyotucuttö 'chopäjätucumä cui̧jä̧hua̧tö̧rö̧ 'cä̧'ȩpö̧ iyätucui. 9 Ja̧'hua̧nö̧ ja̧'a̧ttö̧ Rubénn i̧tti̧mö̧mä̧, Gad i̧tti̧mö̧'i̧nä̧ ja̧'hua̧ta̧nö̧ Manasés i̧tti̧mö̧'i̧nä̧ ttojusodera̧'a̧cu̧ ppa̧'ä̧chi̧nä̧tö̧, Israel ttö̧ja̧rö̧mä̧ Silonä̧tä̧ ku̧ni̧pö̧, Canaán rȩjȩnä̧ huȩju̧nä̧tä̧. Jahuätömä Galaad rȩjȩ tta̧mö̧nä̧ tti̧rȩjä̧ra̧'a̧cu̧ 'chi̧nä̧tö̧, jitötä tti̧rȩjä̧ ja̧'a̧ttö̧ TÖ̧Ä̧NÄ̧HUA̧ hueähuä huȩnȩnä̧ ucuotö Moisés iyinäjä̧tä̧. 10 Jahuätö Canaán rȩjȩtö̧ Jordán ajera̧'a̧cu̧ ttichomenä, Rubén i̧tti̧mö̧'i̧nä̧, Gad i̧tti̧mö̧'i̧nä̧ ja̧'hua̧ta̧nö̧ Manasésttö ppä'ächotö'i̧nä̧ i̧sa̧rö̧ ku icu iyähuome aditö ku̧ni̧nä̧tö̧ Jordán aje ppeyänä, ja̧u̧ isotörö ku icu iyähuomemä juiyo rö̧i̧na̧'a̧. 11 Israel ttö̧ja̧ pi̧yȩ tö'cö ä̧ju̧cui̧nä̧tö̧ ja̧'hua̧nö̧ ä̧ju̧cu̧ pä'inä̧tö̧: "¡Topätucui! Rubén ahuaruhuämä, Gad'i̧nä̧ ahuaruhuämä ja̧'hua̧ta̧nö̧ Manasésttö ppä'ächätömä Isotrör ku icuähuome Canaán rȩjȩttö̧mä̧ pä̧tȩcuä̧nö̧, Galaadnä Jordán ajettömä tö'cönä̧nö̧, Israel ttö̧ja̧ tti̧rȩjä̧cu̧nä̧." 12 Israel ttö̧ja̧ pi̧yȩ huȩnȩ ä̧ju̧cu̧mä̧, Israel ttö̧ja̧mä̧ o'catoi'önä ji̧nä̧ yo̧mȩtȩ ca̧ca̧cui̧pi̧nä̧tö̧ Silo ötahuiyänä jahuätörö rohuäu 'chä̧nö̧ 'chattächa pä'ö. 13 Ja̧'hua̧nö̧ jä̧ji̧ o'ca'a Israel ttö̧ja̧mä̧ Rubén ahuaruhuämä'i̧nä̧, Gad ahuaruhuä'i̧nä̧, ja̧'hua̧ta̧nö̧ Manasés ahuaruhuättö ppä'ächotö'i̧nä̧ huȩnȩ jiäcuähuä ttö̧ja̧rö̧ hue'inä̧tö̧ Galaad ttö̧ja̧rö̧. Ja̧'hua̧ta̧nö̧ jahuätömä sacerdote Eleazar i̧tti̧ Fineesrö'i̧nä̧ hue'inä̧tö̧ 14 ja̧'hua̧ta̧nö̧ ja̧u̧cu̧mä̧ dieznö huotö ttö̧ja̧ tturuhuotörö Israel ttö̧ja̧ttö̧ ttö̧tä̧mö̧ mi̧nä̧ttö̧ ttahuaruhuättö yotucunärö̧tä̧ juhua'atäcu jahuätö yotucunämä Israel ttö̧ja̧ ttö̧ja̧cuo̧mȩ jäcuättö tturuhuotö päi'önä huinätö. 15 Jahuätömä Rubén ahuaruhuämä'i̧nä̧, Gad ahuaruhuä'i̧nä̧, ja̧'hua̧ta̧nö̧ Manasés ahuaruhuättö ppä'ächotö'i̧nä̧ Galaad rȩjȩra̧'a̧ 'chä̧hui̧'ö̧ jahuätörö pä'inätö: 16 TÖ̧Ä̧NÄ̧HUA̧ ahuaruhuä o'catoi'önä Israel ttö̧ja̧mä̧ pi̧yȩ pä'ätö: ¿Däjejä̧ttö̧ pi̧yȩmä̧ päcuinä̧tu̧cu̧'i̧nä̧ jȩ'cuä̧tu̧cuo̧ca̧'a̧ Israeel trö̧ja̧ ttu̧ru̧hua̧ DIOSRÖ surojö jȩpä̧jä̧tö̧jä̧, TÖ̧Ä̧NÄ̧HUA̧ pä'acu tti̧'cha̧jueimä 'cä̧'i̧pä̧chö̧, TÖ̧Ä̧NÄ̧HUA̧ ö̧ra̧huä̧rö̧nä̧ jȩpö̧ jitä mo̧ro̧mä̧ cua̧mö̧nä̧ pa̧ja̧tö̧ cuiäretucu i̧sa̧rö̧ ki icu iyähyuome jö̧nä̧ jȩpä̧jä̧tö̧jä̧. 17 ¿Ucutu surojö jȩ'cui̧nä̧tu̧cu̧ jo̧ca̧'a̧ ji̧na̧'a̧ rö̧ä̧nä̧ surojuepinömä? Ja̧u̧ ji̧nö̧mä̧ ji̧nä̧ töcäu icuocotö pinä̧tö̧jä̧. Ja̧u̧ surojö jȩ'cui̧nä̧tu̧cu̧nä̧mä̧ TÖ̧Ä̧NÄ̧HUA̧ ahuaruhuärö surojö märichei rȩbȩhui̧na̧'a̧. 18 ¿Ucutumä jitä mo̧ro̧ TÖ̧Ä̧NÄ̧HUA̧TTÖ̧ 'cä̧cui̧pä̧chä̧tu̧cua̧ pä'ö jȩpä̧tö̧jä̧ tä̧ji̧? Jitä mo̧ro̧ TÖ̧Ä̧NÄ̧HUA̧RÖ̧ surojö jȩ'cuä̧tu̧cu̧ttö̧mä̧, yo̧ȩi̧mo̧ro̧ surojö jȩä̧cuä̧u̧jä̧. Ja̧u̧mä̧ Israel ttö̧ja̧rö̧mä̧ amisura'atä ö̧jä̧cua̧. 19 Ucutu cu̧jä̧tu̧cuä̧jä̧ rȩjȩ surojuo̧ä̧chi̧nä̧jä̧ jö̧ttö̧mä̧, TÖ̧Ä̧NÄ̧HUA̧ ojusode huo̧mȩ rȩjȩra̧'a̧cu̧ cuichätucua pä'ö ja̧'a̧ ja̧'hua̧nö̧ ichö ujutu ti̧rȩjä̧nä̧ cu̧jä̧tu̧cua̧ pä'ö. Ya'ute'i̧nä̧ TÖ̧Ä̧NÄ̧HUA̧CU̧MÄ̧ curohuähuätucuä, ja̧'hua̧ta̧nö̧ ujuturu'i̧nä̧ cu̧ra̧huä̧rä̧tu̧cuä̧ cuiäretucu isotö ku icu iyähuome aditömä, TÖ̧Ä̧NÄ̧HUA̧RÖ̧ i̧sa̧rö̧ ku icu iyähuomettö̧'i̧nä̧ i̧mi̧cu̧nä̧mä̧. 20 ¿Zera i̧tti̧ Acán jo̧ca̧'a̧ ji̧na̧'a̧ Dios jphuätä jö̧nä̧ pojopö ku̧nä̧huä̧ ȩmö̧ surojönä jȩpi̧nä̧mä̧? ja̧'hua̧nö̧ jȩo̧mȩnä̧ ¿Dios ö̧ra̧huä̧rö̧nä̧ ma̧'ä̧mo̧co̧tö̧ pinätö Israel ttö̧ja̧mä̧? Ja̧u̧ ttö̧ja̧sa̧mä̧ surojö jȩä̧ji̧nä̧mä̧ katätämä 'corujuo''ächocö pinö. 21 Ja̧'hua̧nö̧ jo̧mȩnä̧ Rubém ahuaruhuä'i̧nä̧, Gad ahuruhuä'i̧nä̧ ja̧'hua̧ta̧nö̧ Manasés ahuaruhuättö ppä'ächotö'i̧nä̧ Israel ttö̧ja̧ tturuhuotörö ädätömä pä'inätö̧: 22 ¡TÖ̧Ä̧NÄ̧HUA̧ DIOSMÄ O"CAJUIYÖNÄ JU̧RU̧HUA̧! ¡TÖ̧Ä̧NÄ̧HUA̧ DIOSMÄ O"CAJUIYÖNÄ JU̧RU̧HUA̧! ¡Ja̧u̧mä̧ huo̧jua̧ ja̧'hua̧ta̧nö̧ Israel ttö̧ja̧rö̧'i̧nä̧ ttu̧huo̧ju̧nä̧ jȩpö̧! TÖ̧Ä̧NÄ̧HUA̧RÖ̧ suronä jȩpö̧ Tu̧ra̧huä̧rä̧ji̧ttö̧'i̧nä̧, jitä mo̧ro̧tä̧ jȩpö̧ icuitö 23 TÖ̧Ä̧NÄ̧HUA̧TTÖ̧ 'cä̧'i̧pä̧chö̧ isotörö ku icu iyähuome taditäja'amä. Ujutu isotörö ku icu iyö yabonö jȩtö̧, ku icu mippounä̧ iyähuä, u̧huä̧ju̧ otecö̧, huȩnȩ juiyönä ttö̧ja̧ pä'öcö̧, ja̧'hua̧nö̧ jȩtö̧ttö̧mä̧ jȩtä̧ji̧ mi̧cuämä TÖ̧Ä̧NÄ̧HUA̧TÄ̧ imitatujä̧. 24 ¡Ja̧'ha̧nö̧mä̧cö̧! Ujutumä tä'ca i̧chä̧cuȩ a̧mö̧cuädö ti̧tti̧mö̧ pä̧ttä̧cuȩ ye'ecu jȩpi̧nä̧tö̧jä̧: ¿Däje ja̧'a̧ttö̧ Israel ttö̧ja̧ TTÖ̧Ä̧NÄ̧HUA̧CU̧MÄ̧ ucutu päcuätucumä? 25 TÖ̧Ä̧NÄ̧HUA̧MÄ̧ 'to'opö ru̧ni̧nö̧ ucutu cui̧rȩjä̧tu̧cu̧'i̧nä̧ i̧mi̧cu̧nä̧ ki̧'ö̧nä̧ Jordán ajettömä. Ucutu Rubén i̧tti̧mö̧mä̧, Gad i̧tti̧mö̧mä̧, TÖ̧Ä̧NÄ̧HUA̧CU̧MÄ̧ todepocotöjä. Ja̧'hua̧nö̧ ja̧'a̧ttö̧ cui̧tti̧mö̧tu̧cu̧mä̧ jȩtta̧ pä'ö ja̧'a̧ ti̧tti̧mö̧ TÖ̧Ä̧NÄ̧HUA̧RÖ̧ ucuo te'ähuätucui pättöttötä. 26 Ja̧'hua̧nö̧ ja̧'a̧ttö̧ ujutumä pä'äjätöjä, jitä isotö ku icu iyähuome taditätucua, mippounä iyä ku icu tiya pä'ömäcö̧ ja̧'hua̧ta̧nö̧ isotörö cuä'ö ku tiya pä'ömä̧cö̧, 27 ujutu'i̧nä̧ ucutu'i̧nä̧ jȩtö̧ jiäu jö̧nä̧tä̧ ja̧'hua̧ta̧nö̧ ujutu to'ca'anä ichätö ti̧tti̧mö̧rö̧'i̧nä̧, jȩtta̧ pä'ö pähui'inö TÖ̧Ä̧NÄ̧HUA̧ to̧ä̧ro̧mȩttö̧ jȩttä̧cua̧'a̧nö̧, mi̧ppounä ku icu iyähuä ja̧'hua̧ta̧nö̧ i̧sa̧rö̧ ku icu ttiya pä'ö juhua'atäcu huȩnȩ juiyönä kä̧cuä̧huä̧ jö̧nä̧ ttiya pä̧'ö̧, ucutu cui̧tti̧mö̧tu̧cu̧ ujutu ti̧tti̧mö̧rö̧ yodeji mo̧ro̧ ucutumä CU̧Ä̧NÄ̧HUA̧TU̧CU̧MÄ̧CÖ̧ pättö juiyäcua'anö. 28 Ja̧'hua̧nö̧ ja̧'a̧ttö̧ pä'äjätöjä, yodoji mo̧ro̧ ujutu ti̧tti̧mö̧cö̧, ucutu cui̧tti̧mö̧tu̧cu̧cö̧ jättepomenä jitähuäcua'anö: ¡Topätucui ji̧yȩja̧ ja̧'a̧ i̧sa̧rö̧ ku icu TÖ̧Ä̧NÄ̧HUA̧RÖ̧ ttiyinömä, ttö̧tä̧mö̧ mi̧nä̧ jȩtti̧nö̧mä̧, mippounä iyähuä ku icu ttiya pä'ömä̧cö̧, i̧sa̧rö̧ ku icu ttiya pä'ömä̧cö̧, ja̧'hua̧nö̧ ja̧ju̧jueimä ujuturu'i̧nä̧ ucuturu'i̧nä̧ jȩtti̧nö̧ jiäu jö̧nä̧tä̧. 29 Ujutumä TÖ̧Ä̧NÄ̧HUA̧RÖ̧ ra̧huä̧rö̧ jȩä̧cuä̧huä̧mä̧ oto ja̧'a̧ ja̧'hua̧nö̧ ja̧'a̧ttö̧ jitä mo̧ro̧mä̧ Ja̧u̧ päö'acuätä̧ 'chä̧tö̧jä̧ mippounä iyähuä ku icu iyä'i̧nä̧, u̧huä̧ju̧ otecö̧, i̧sa̧rö̧ ku icu iyähuomecö̧ aditöjä, TÖ̧Ä̧NÄ̧HUA̧ Diosrö i̧sa̧rö̧ ku icu iyähuome kö̧ttö̧'i̧nä̧ i̧mi̧cu̧nä̧. 30 Sacerdote Finees'i̧nä̧ ja̧'hua̧ta̧nö̧ ttö̧ja̧ tturuhuotö'i̧nä̧ Israel ttö̧ja̧ tturuhuotö päi'önä huotö ja̧u̧cu̧ ka̧cuä̧tö̧mä̧ ä̧ju̧cui̧nä̧tö̧ Rubén ahuaruhuä'i̧nä̧, Gad ahuaruhuä'i̧nä̧ ja̧'hua̧ta̧nö̧ Manasés ahuaruhuä'i̧nä̧ pättömä, ja̧'hua̧nö̧ ja̧'a̧ttö̧ jahuätörömä adihuomenä ji̧na̧'a̧ tottomenämä. 31 Sacerdote i̧tti̧ Fineesmä pä'inö Rubén ahuaruhuärö'i̧nä̧, Gad ahuaruhuärö'i̧nä̧ ja̧'hua̧ta̧nö̧ Manasés ahuaruhuärö'i̧nä̧: Jitä mo̧ro̧ huo̧jui̧'ä̧tö̧jä̧ TÖ̧Ä̧NÄ̧HUA̧MÄ̧ ujututäcu kö̧ pä'ömä, juhua'amä ucutumä TÖ̧Ä̧HUA̧RÖ̧MÄ̧ to'ija̧'a̧cu̧mä̧ jȩ'cuä̧tu̧cuo̧ca̧'a̧ jä̧ja̧'a̧ttö̧. Jitämä ucutu TÖ̧Ä̧NÄ̧HUA̧ u̧mö̧ttö̧ Israel ttö̧ja̧rö̧mä̧ ttö̧ji̧pö̧nä̧ ppä'ädätöjä̧." 32 Ja̧'hua̧nö̧ ja̧'a̧ Sacerdote i̧tti̧ Finees'i̧nä̧ ja̧'hua̧ta̧nö̧ ttö̧ja̧ tturuhuotö'i̧nä̧ ppa̧'ä̧chi̧nä̧tö̧ Rubén ahuaruhu ja̧'hua̧ta̧nö̧ Gad ahuaruhuä Galaad rȩjȩnä̧ ttö̧ja̧cuo̧mȩttö̧mä̧, Israel ttö̧ja̧ tti̧rȩjä̧ Canaán rȩjȩra̧'a̧cu̧tä̧ ja̧'hua̧nö̧ ja̧'a̧ ttucuocuäjitä i'cächö ppa̧'ä̧chi̧nä̧tö̧. 33 Jittäumä juiyo adihuina'a Israel ttö̧ja̧ tottomenämä, israel ttö̧ja̧mä̧ Diosrö adiu ppä'ädöjä̧ pä'inä̧tö̧ ja̧'hua̧nö̧ ja̧'a̧ttö̧ yabonömä curämä tturihuäcua pä'ocotö pinä̧tö̧ Rubén ahuaruhuäcu'i̧nä̧, Gad ahuaruhuäcu'i̧nä̧ ttö̧ja̧cuo̧mȩ si'epö tticua pä'ömä. 34 Rubén ahuaruhuämä ja̧'hua̧ta̧nö̧ Gad ahuaruhuämä ku icu iyähuome ttaditä jo̧mȩmä̧ oinä̧tö̧ "Jȩtti̧nö̧ jiähuome pä̧'ö̧tä̧" ja̧'hua̧nö̧ pä'ömä pä'inä̧tö̧: Ujutu jȩti̧nö̧ ji̧ä̧huä̧cua̧mä̧ TÖ̧Ä̧NÄ̧HUA̧ Diostä ja̧'a̧.