¹ Ja̧'ha̧nö̧ ja̧'a̧ TÖ̧Ä̧NÄ̧HUA̧MÄ̧ Josuérö pä'inö: ² Israel ttö̧ja̧rö̧ pa̧'a̧nö̧ pä'ö ji'ähuitö: Ötahuiyä dajahuächi'ö kä̧cuä̧huo̧mȩ pojopö ku̧nä̧tu̧cui̧, Moisés i̧huȩyu̧ti̧nö̧nä̧ chucuocuinö'a̧nö̧tä̧. ³ Pi̧yȩmä̧ jȩpä̧tu̧cui̧ ya̧tȩ cua'ö chicua päoca'anä̧ ka̧ra̧rö̧ cuä'ö icuipö ju̧huȩnȩ ödahuächäcua'anö. Ja̧u̧ ötahuiyämä ya̧tȩrö̧ cuä'ö icuinö micuä jö̧nä̧ cuä'ö tticuarö ttusäcu dajahuächö ö̧jo̧mȩ jö̧nä̧ jä̧cua̧'a̧. ⁴ Ja̧u̧mä̧ ja̧u̧ttö̧ ji̧yȩtȩ ötahuiyära̧'a̧cu̧ jopipö, ötahuiyära̧'a̧cu̧ doächäcuähuate ä'ca kä̧mä̧dö̧ jȩä̧ji̧ tö'cömä ötahuiyä ttö̧ja̧ tturuhuotörö ji̧ä̧huä̧cua̧. Ja̧'hua̧nö̧ jo̧mȩnä̧ jahuätömä ötahuira̧'a̧cu̧ do'ädö yȩnȩtȩ jahuätötä ttö̧'cä̧tȩ jo̧mȩ ö̧jö̧nä̧ ttu̧ju̧nä̧cua̧. ⁵ Ja̧'hu̧nö̧ ja̧'a̧ yotöte micuä jö̧nö̧ cuä'ö icuinörö̧ cuä'ö icua pä'ö ttichöttömä, ötahuiyä ttö̧ja̧ tturuhuotömä cua'ö icuinä̧cu̧ ahuaruhuärömä ja̧u̧rö̧mä̧ iyocotö ttäcuotö. Jahuätö ja̧u̧ juäimä jȩtta̧ pä'ömä juiya'a, juhua'amä a̧hua̧ru̧hua̧ru̧mä̧ cuä'ö chicuarö pä'oca'anä cua'ö icuina'attö̧ ja̧'hua̧ta̧nö̧ ja̧u̧rö̧mä̧ aboi̧ya̧ jö̧nä̧'i̧nä̧ jo̧ca̧'a̧ ji̧na̧'a̧ttö̧. ⁶ Ja̧u̧mä̧ ö̧ji̧'a̧ pä'ö jä̧cua̧'a̧ ötahuiyä ttö̧ja̧ ttä'ca jo̧mȩttö̧ jȩä̧ji̧ ro̧ttȩpo̧mw jubö, sacerdotetö̧ ttu̧ru̧hua̧ ja̧u̧nö̧ pä̧nä̧ aditö kö̧ 'corujuoächome jubö päi'önä. Ja̧'hua̧nö̧ jo̧mȩnä̧ cuä'ö icua päoca'anä ttö̧ja̧sa̧rö̧ cua'ö icuinömä idepiyuttö tuipächinomecu ppa̧huä̧chä̧cua̧." ⁷ Ja̧'hua̧nö̧ ja̧'a̧ttö̧ Israel ttö̧ja̧mä̧ Galileattömä̧ Cedes ötahuiyätä pojopö ku̧ni̧nä̧tö̧, Neftalí idepiyöttö mö̧ä̧'quiyö 'cä̧tȩ jo̧mȩtä̧, Siquem ötahyuiyänä'i̧nä̧ Efraín mö̧ä̧'quiyuttö 'cä̧tȩ jo̧mȩtä̧ ja̧'hua̧ta̧nö̧ Quiriat-arbanä̧'i̧nä̧ (Hebrón pä'ö'i̧nä̧ ottinome) Judáttö mö̧ä̧'quiyö 'cä̧tȩ jo̧mȩ. ⁸ Jordán aje yabonättö̧mä̧ Jerico ötahuiyättömä kä̧hua̧ räopa'acunä̧tä̧, Rubén ahuaruhuä 'cotö ttö̧ja̧cuo̧mȩ de'a jui̧yä̧jä̧ttö̧mä̧ pocöra̧'a̧ huähuächi'ome Beser ötahuiyätä pojopö ȩmi̧nä̧tö̧. ⁹ Pi̧yȩ ötahuiyä pönä̧tä̧ ȩmä̧huä̧chi̧na̧'a̧ Israel ttö̧ja̧ tti̧dȩpi̧yu̧ jö̧nä̧mä̧ ja̧'hua̧ta̧nö̧ ko̧ro̧jä̧ttö̧ ichäcuähuotö jahuätucu ka̧cuä̧tö̧rö̧, yotöte ttö̧ja̧sa̧rö̧ cuä'ö chicua pättoca'anä̧ cuä'ö icuäjätö juhua'acu jopächö dajahuächö ttö̧jä̧cuo̧mȩmä̧. Pide ttö̧ja̧sa̧mä̧ a̧hua̧ru̧hua̧rö̧ cuä'ö icuäjiyäcu micuä jö̧nä̧ cuä'ö pä'ö cuä'ö icuococu jä̧cua̧, cuä'ö icuäji pä'ö huȩnȩcua̧ ttö̧ja̧ ttä'ca jo̧mȩ i̧jȩcuä̧cho̧mȩ jubö päi'önä.