¹ Ja̧'hua̧nö̧ ja̧'a̧ Isral ttö̧ja̧ o'catoi'önä Siló ötahuiyänä̧ ca̧ca̧cui̧pi̧nä̧tö̧. Juȩnȩtä̧ ca̧ca̧cu̧ pä̧cuä̧huo̧mȩ o̧ta̧ttö̧ 'tö̧'i̧nä̧tö̧ ja̧'hua̧nö̧ jȩpö̧ jahuätö ttä'ca jo̧mȩttö̧ ja̧huä̧jä̧ rȩjȩmä̧ 'cho'ipinä̧tö̧. ² Ji̧nä̧ tti̧rȩjä̧ iyähuocotö Israel ttahuaruhuä 'cotömä sietenö̧ jo̧mȩnä̧ huotö ka̧cui̧nä̧tö̧. ³ Josuémä Israel ttö̧ja̧rö̧ pä'inö: "¿Tta̧'a̧nö̧ recuo mo̧ro̧ tta̧ttä̧rä̧cua̧'a̧ttö̧, ttä̧do̧tö̧ mi̧nä̧ TTÖ̧Ä̧NÄ̧HUA̧ Dios iyinä̧jä̧ra̧'a̧ dodetta pä'ömä? ⁴ Ya̧tȩ ahuaruhuä 'cotöttömä̧ huämetucuärö pojopö ȩmä̧tu̧cui̧ ja̧'hua̧nö̧ cu'oje'ä̧u̧rö̧ ttömä huȩdä̧cua̧sä̧. Jahuätömä huä̧mȩcu̧nä̧'i̧nä̧, dȩa̧'a̧cu̧nä̧'i̧nä̧ ttusähua pä'ö rättopäcuotö. Jähuätömä tti̧rȩjä̧pö̧nä̧ ttiyäcuome tottomemä huȩyu̧tu̧ ttutäcuotö ja̧'hua̧nö̧ jȩpö̧'cotö ttö chö̧ja̧'a̧cu̧ ppa̧ttä̧chä̧cuotö. ⁵ Juätömä sietenö jo̧mȩnä̧ 'cä̧ttȩpä̧cuo̧tö̧. Judá ttö̧ja̧mä̧ tti̧rȩjä̧ surnä̧tä̧ ttö̧jä̧cuo̧tö̧ ja̧'hua̧ta̧nö̧ José i̧tti̧mö̧mä̧ tti̧rȩjä̧ ttu̧huo̧jua̧'a̧cu̧nä̧ kä̧jä̧nä̧tä̧ ttö̧jä̧cuo̧tö̧. ⁶ Ucutumä sietenö rȩjȩ 'cä̧ȩcuo̧mȩ huȩyu̧tu̧ cutätucuajá ja̧'hua̧nö̧ cui̧huȩyu̧tä̧tu̧cu̧mä̧ ttö chö̧ja̧'a̧cu̧ cui'cächätucuajá. Ttömä TÖ̧Ä̧NÄ̧HUA̧ cu̧ru̧hua̧tu̧cu̧ Dios ä'ca jo̧mȩttö̧ pätecuächönä icu toäcuähuänä icu tochä̧cua̧sä̧ ucurutu i̧yä̧huä̧cuä̧jä̧mä̧. ⁷ Levís ahuaruhuä 'cotömä ucuturu'anömä iyähuocotö ttäcuotö, jahuätömä sacerdote jö̧nä̧ huottö tti̧rȩjä̧ jö̧nä̧ jä̧cua̧mä̧ TÖ̧Ä̧NÄ̧HUA̧TÄ̧ ja̧'a̧ttö̧. Gad'i̧nä̧, Rubén'i̧nä̧ ja̧'hua̧ta̧nö̧ Manasés ahuaruhuä 'cotöttö ppä'ächotömä tti̧rȩjä̧mä̧ iyähui'inä̧u̧, Jordán ajettömä yabonä̧nö̧. Pi̧yȩ rȩjȩ ja̧'a̧ TÖ̧Ä̧NÄ̧HUA̧ u̧mö̧huä̧ya̧ Moisés iyinä̧jä̧mä̧. ⁸ Ja̧'hua̧nö̧ ja̧'a̧ttö̧ juätö umätö̧mä̧ ä̧rä̧mä̧chö̧ i̧hui̧nä̧tö̧. Josué hue'ömä pä'inö pa̧'a̧nö̧ rȩjȩ usäu huȩyu̧tu̧ i̧huä̧jä̧tö̧rö̧mä̧: "Rȩjȩmä̧ ju'tänäcu̧ttö̧'i̧nä̧, dȩa̧'a̧cu̧nä̧ttö̧'i̧nä̧ topö huȩyu̧ti̧'i̧pö̧ ttö chö̧ja̧'a̧cu̧ ppa̧cuä̧chä̧tu̧cua̧já̧. Ttömä porö Silo ötahuiyättö TÖ̧Ä̧NÄ̧HUA̧ ä'ca jo̧mȩttö̧ pätecuächönä icu toäcuähuänä icu to̧chä̧cua̧sä̧." ⁹ Jahuätö u̧mä̧tö̧mä̧ ja̧huä̧jä̧ rȩjȩmä̧ ju'tänä̧cu̧ttö̧'i̧nä̧, dȩa̧'a̧dä̧cu̧ttö̧'i̧nä̧ cue'ächömä, ja̧huä̧jä̧ ötö'cömä huȩyu̧ti̧nä̧tö̧, cuyärubanä ötahuiyämä sietenä jo̧mȩnä̧ 'cä̧'ȩpö̧ ku̧nö̧, ji̧yȩtȩ ötahuiyä 'cä̧'ȩpö̧ ttu̧ju̧no̧mȩttö̧ kä̧mä̧dö̧ pa̧ja̧ti̧nä̧tö̧. Ja̧'hua̧nö̧ ja̧'a̧ jahuätömä Josué ö̧ja̧'a̧cu̧ ppa̧'a̧chi̧nä̧tö̧, Silottö ä'ö kä̧cuä̧huo̧mȩcu̧. ¹⁰ Ja̧'hua̧nö̧ ja̧'a̧ Josuémä TÖ̧Ä̧NÄ̧HUA̧ to̧ä̧ro̧mȩ Silo ötahuiyättö pätecuächönä icu toäcuähuänä icu topinö. Ja̧'hua̧nö̧ ja̧'a̧ Josuémä juorötä israel ttö̧ja̧ tti̧rȩjä̧mä̧, yotucu pönä̧rö̧ tti̧rȩjä̧pö̧nä̧ iyä'chinö. ¹¹ Benjamin ö̧tä̧mö̧ mi̧nä̧ttö̧ ahuaruhuä 'cotörömä̧ yotucu pönärö̧ tti̧rȩjä̧ iyinä̧tö̧. Tti̧rȩjä̧ päi'önä ttiyinä̧jä̧mä̧ Judá i̧tti̧mö̧'i̧nä̧, José i̧tti̧mö̧'i̧nä̧ tti̧rȩjä̧cu̧ todehuina'a. ¹² Ttu̧huo̧jua̧'a̧cu̧nä̧ttö̧ tti̧rȩjä̧ beipomemä Jordán ajetttö kä̧mä̧di̧na̧'a̧. Ko̧ro̧jä̧cu̧ beipomemä huä̧mi̧pä̧chi̧na̧'a̧ Jericó mö̧ä̧'canätä̧ pä'i'ö, juhua'a yabocumä 'chahuächächina'a po̧ri̧yä̧'ta̧ päi'omenä̧tä̧ kä̧hua̧ ma̧ä̧cha̧'a̧cu̧ päte'ö. Juorömä de'a jui̧yä̧jä̧ttö̧ Bet Avén, jubötä beipina'a ¹³ Juoröttö yabocumä ko̧ro̧jä̧cu̧ beipomemä surttömä otonä̧nö̧tö̧ 'cuä'o'ö Luz pätta'acu (Betel pä'ö'i̧nä̧ ottinomenätä̧) 'chä̧nö̧ 'tocuina'a. Ja̧'hua̧nö̧ ja̧'a̧ ko̧ro̧jä̧cu̧ beipomemä juiächi'ina'a Atarot-Adar juböttömä, mö̧ä̧'ca Bet-Horónttömä̧ surnätä̧ pä'i'ö. ¹⁴ Ja̧'hua̧nö̧ ja̧'a̧ ko̧ro̧jä̧cu̧ beipomemä̧ hui̧sä̧cuä̧chi̧'o̧mȩmä̧: kä̧hua̧ ma̧ä̧cha̧'a̧cu̧nä̧tä̧ pä'i'ö surcu juiächi'ina'a, mö̧ä̧'canätä̧ 'cuä'o'ö Bet-Horón pä̧tȩcuä̧nö̧nä̧ pä'i'ö. Ja̧huä̧jä̧mä̧ beipina'a Quiriat-Baalnätä̧ (Quiriat-jearim pättinomebötä), ja̧u̧ ötahuiyämä Judá ahuaruhuä 'cotö tti̧rȩjä̧nä̧ hui̧na̧'a̧. Kä̧hua̧ ma̧ä̧cha̧'a̧cu̧nä̧tä̧ beipina'a tti̧rȩjä̧ ko̧ro̧jä̧cu̧ beipomemä. ¹⁵ Sura̧'a̧cu̧nä̧ttö̧ kä̧mä̧da̧'a̧mä̧ Quiriat-Jearim pättome beipomenää̧tä̧ 'tocuina̧'a̧. Ko̧ro̧jä̧cu̧ beipome 'tocuomemä juorömä Efrónra̧'a̧cu̧ 'chi̧na̧'a̧, Neftoattö ajiya acuose ko̧mȩnä̧tä̧. ¹⁶ Ja̧'hua̧nö̧ ja̧'a̧ ko̧ro̧jä̧cu̧ beipomemä mö̧ä̧'ca kada'canä̧tä̧ pä'i'ö juiächi'ina'a Ben-Hinomttö̧ ppämäroppä päi'omettö̧mä̧ aboja'acunä̧tä̧, Refaí̧nttö pämäropä päi'omettö̧mä̧ huä̧mȩnä̧tä̧. Ja̧'hua̧nö̧ ja̧'a̧ Hinomttö̧ pämäroppä päi'omenä̧tä̧ jui'ächi'ö, Surttömä̧ Jebus ttö̧ja̧cuo̧mȩ ppeyänätä̧ pä'i'ömä, yabonö 'chä̧nö̧mä En-Rogelnä̧tä̧ juiächi'ina'a. ¹⁷ Ttu̧huo̧jua̧'a̧cu̧nä̧ huä̧mi̧pä̧chö̧, En-semenra̧'a̧cu̧ 'chä̧nö̧, juorö yabocumä 'chahuächächina'a Geliotra̧'a̧cu̧, Adumínttö̧mä̧ aboja̧'a̧cu̧nä̧ huä̧mi̧pä̧chö̧. Ja̧'hua̧nö̧ ja̧'a̧ Rubén i̧tti̧ Bohán inähuära̧'a̧cu̧ juiächi'ina'a. ¹⁸ Ttu̧huo̧jua̧'a̧cu̧nä̧ttö̧mä̧ Bet-arabá huä̧mȩbinätä̧ pä'i'ö 'cuä'o'ömä Arabá jubötä juiächi'ina'a. ¹⁹ Ko̧ro̧jä̧cu̧ beipomemä ttu̧huo̧jua̧'a̧cu̧nä̧ttö̧mä̧ Bet-hogla huä̧mȩbinä̧tä̧ pä'i'ö cuäoina'a. Ko̧ro̧jä̧cu̧ beipomemä ttu̧huo̧jua̧'a̧cu̧nä̧ttö̧mä̧ Aje sa̧doto jäyotonä̧tä̧ pä'i'ö surttämä Jordán ajettömä sur huä̧mȩnä̧bö̧tä̧ beipina'a, Surnä̧ttö̧mä̧ pa̧'a̧nö̧tä̧ beipina'a tti̧rȩjä̧mä̧. ²⁰ Tti̧rȩjä̧mä̧ Jordán ajenä̧tä̧ beipina'a ka̧hua̧ räopa'acunä̧ttö̧mä̧. Pi̧yȩ rȩjȩtä̧ i̧yä̧hui̧'i̧nä̧u̧ Benjamin ahuaruhuä 'cotömä, ttu̧ttä̧mö̧mi̧nä̧ttö̧ ttahuaruhuättö yotu pönä̧rö̧mä̧ pa̧'a̧nö̧tä̧ iyähui'ina̧'a̧ 'torötätä ko̧ro̧jä̧cu̧ beipome pö̧nä̧mä̧, jäyänä̧mä̧ o'cajuiyötä. ²¹ Ja̧'hua̧nö̧ ja̧'a̧ Benjamín ahuaruhuä 'cotö ttidepiyö jö̧nä̧, ttö̧tä̧mö̧ mi̧nä̧ jö̧'a̧cuä̧ ttiyinö̧mä̧ pi̧yȩ ja̧'a̧: Jericó ötahuiyä'i̧nä̧, Bet Hogla ötahuiyä'i̧nä̧, Emec Casis ötahuiyä'i̧nä̧, ²² Bet Arabá ötahuiyä'i̧nä̧, Zemaraim ötahuiyä'i̧nä̧, Betel ötahuiyä'i̧nä̧, ²³ Avim ötahuiyä'i̧nä̧, Pará ötahuiyä'i̧nä̧, Ofraötahuiyä'i̧nä̧, ²⁴ Quefar ötahuiyä'i̧nä̧, Haamoni ötahuiyä'i̧nä̧, Ofni ötahuiyä'i̧nä̧, Geba ötahuiyä'i̧nä̧. Ötahuiyämä docenö jo̧mȩnä̧ ji̧na̧'a̧, ppeyänä huȩjö̧ ötahiyä ppo̧u̧cu̧mä̧. ²⁵ Ja̧'hua̧ta̧nö̧ ötahuiyä juȩnȩ huȩji̧nö̧mä̧ Gabaón ttö̧ja̧ ttidepiyu'i̧nä̧, Ramá ötahuiyä'i̧nä̧, Beerot ötahuiyä'i̧nä̧, ²⁶ Mizpa ötahuiyä'i̧nä̧, Cafira ötahuiyä'i̧nä̧, Mozah ötahuiyä'i̧nä̧, ²⁷ Requem ötahuiyä'i̧nä̧, Irpeel ötahuiyä'i̧nä̧, Tarala ötahuiyä'i̧nä̧, ²⁸ Zela ötahuiyä'i̧nä̧, Elef ötahuiyä'i̧nä̧, Jebús ötahuiyä'i̧nä̧ (Ju̧huȩnȩtä̧ ji̧na̧'a̧ Jerusalén'i̧nä̧), Guibeá ötahuiyä'i̧nä̧ Quiriat ötahuiyä'i̧nä̧. Ötahuiyä o'cajuiyönä̧mä̧ catorcenö̧ ötahuiyä ja̧'a̧ ppeyänä huȩju̧cu̧mä̧. Pi̧yȩ pö̧nä̧tä̧ ji̧na̧'a̧ Benjamín ttö̧tä̧mö̧ mi̧nä̧ttö̧ ahuaruhuärö iuyähu'inö.