¹ Pi̧yȩ rȩjȩtä̧ iyähui'ina'a Manasés ahuaruhuä 'cotörömä (Josés i̧tti̧mö̧ttö̧ ä̧cuo̧mȩnä̧ i̧tti̧ pinömä) Manasés ä̧cuo̧mȩnä̧ i̧tti̧ Marquirömä ja̧'hua̧ta̧nö̧ ja̧u̧tä̧ ji̧na̧'a̧ Galaad jä'omä̧. Marqui i̧tti̧mö̧rö̧mä̧ iyähui'ina'a Galaad rȩjȩ'i̧nä̧, Basán rȩjȩ'i̧nä̧ juhua'atäcu Ja̧u̧mä̧ curä rohuähuäcuähuä ttö̧ja̧sa̧ ji̧na̧'a̧. ² Manasés ö̧tä̧mö̧ mi̧nä̧ttö̧ ahuaruhuä 'cotö ka̧cui̧pä̧jä̧tö̧ tti̧rȩjä̧ päi'önä tti̧yi̧nä̧u̧mä̧ pitö ji̧na̧'a̧; Abiezer'i̧nä̧, Helec'i̧nä̧, Asriel'i̧nä̧, Siquem'i̧nä̧, Hefer'i̧nä̧ ja̧'hua̧ta̧nö̧ Semida'i̧nä̧. Pitö ji̧na̧'a̧ u̧mä̧tö̧ Manasés i̧tti̧mö̧ pinätö̧mä̧, José ä̧cuo̧mȩnä̧ i̧tti̧, ahuaruhuäcuähuotö i̧jȩcui̧nä̧tö̧mä̧. ³ Ja̧'hua̧nö̧ ja̧'a̧nä̧, Hefer i̧tti̧ Zelofehadmä, Galaadtä ö̧do̧, Manasés i̧tti̧ Marquitä ö̧jä̧hua̧yö̧mä̧, i̧tti̧mö̧ u̧mä̧tö̧mä̧ to'inö, suro i̧tti̧mö̧mä̧ nä̧tö̧tä̧ ji̧na̧'a̧. Jahuätö tti̧mi̧mä̧ pi̧yȩ ja̧'a̧, Malaa, Noa, Hogla, Milka ja̧'hua̧ta̧nö̧ Tirsa jö̧nä̧. ⁴ Jahuätö nätö̧mä̧ sacerdote Eleazar'i̧nä̧, Nun i̧tti̧ Josué'i̧nä̧ ja̧'hua̧ta̧nö̧ ttö̧ja̧ tturuhuotö ttö̧jo̧mȩ tö'cönänö ichi'ö pä'inä̧tö̧: TÖ̧Ä̧NÄ̧HUA̧MÄ̧ Moisésrö hue'inö, tö̧jä̧hua̧tu̧cu̧ yo̧mȩtȩnä̧ ti̧rȩjä̧ iyatö pä'ö." Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ päinö'a̧cuä̧ jȩpö̧ ja̧u̧mä̧ jahuätö nä̧tö̧mä̧ ttä'o ö̧jä̧hua̧tu̧cu̧ yo̧mȩtȩnä̧ i̧yi̧nä̧u̧ tti̧rȩjä̧mä̧. ⁵ Dieznö rȩjȩ jo̧mȩnä̧ iyähui'ina'a Manasésrömä Galaad rȩjȩttö̧mä̧ ja̧'hua̧ta̧nö̧ Basán rȩjȩ Jordán ji̧jä̧cu̧nä̧ kä̧jä̧ttö̧'i̧nä̧, ⁶ juhua'amä täcö Manasés i̧tti̧mö̧ nä̧tö̧mä̧ ttahuaruhuä u̧mä̧tu̧cu̧ ttȩmi̧na̧'a̧ttö̧. Galaad rȩjȩmä̧ Manasés ahuaruhuä 'cotöttö kä̧cuä̧pä̧jä̧tö̧rö̧tä̧ iyäcui'ina'a. ⁷ Manasés i̧rȩjä̧mä̧ 'tocuina'a Aserttö kä̧mä̧dö̧mä̧ Micmetar pä'ö micuome jubö, Siquenttö kä̧hua̧ räopa'acu huȩju̧ ötahuiyä jubö. Ja̧'hua̧nö̧ ja̧'a̧ ja̧huä̧jä̧ ko̧ro̧jä̧cu̧ beipomemä Surnätä pä'i'ö Tapúa ttä̧ja̧ ttö̧ja̧cuo̧mȩnä̧tä̧ pä'i'ö. ⁸ (Tapúa rȩjȩmä̧ Manasés i̧rȩjä̧ jö̧nä̧tä̧ ji̧nä̧jä̧, ja̧'hua̧nö̧ ja̧'a̧nä̧ Tapúa ötahuiyämä Manasés i̧rȩjä̧cu̧ beipome jö̧nä̧ ji̧na̧'a̧, Efraín ahuaruhuä 'cotö tti̧rȩjä̧nä̧. ⁹ Ko̧ro̧jä̧cu̧ beipomemä juiächi'ina'a Caná aje i̧sä̧rä̧nä̧tä̧. Manasés ahuaruhuä ttidepiyumä aje i̧sä̧rä̧ 'cä̧tȩ huȩju̧mä̧ Efraín ahuaruhuä tti̧rȩjä̧nä̧ huȩji̧na̧'a̧. Manasés i̧rȩjä̧mä̧ aje i̧sä̧rä̧ttö̧mä̧ ttu̧huo̧jua̧'a̧cu̧nä̧ beipomemä, ja̧'hua̧ta̧nö̧ aje de'ahuoto jubö beipina'a. ¹⁰ Sur rȩjȩmä̧ Efraín i̧rȩjä̧ jacuä ji̧na̧'a̧, ja̧huä̧jä̧ttö̧ ttu̧huo̧jua̧'a̧cu̧nä̧mä̧ Manasés i̧rȩjä̧ ji̧na̧'a̧, ja̧huä̧jä̧mä̧ aje de'ähuoto jubötä beipina'a. Ttu̧huo̧jua̧'a̧cu̧nä̧ttö̧mä̧ Aser i̧rȩjä̧ ji̧na̧'a̧, ja̧'hua̧ta̧nö̧ ka̧hua̧ räopa'acunä̧ttö̧mä̧ Isacar i̧rȩjä̧ ji̧na̧'a̧. ¹¹ Ja̧hua̧ta̧nö̧ Isacar'i̧nä̧, Aser'i̧nä̧, Manasés'i̧nä̧ ttidepiyu jö̧nä̧ ji̧na̧'a̧ Bet Seán ötahuiyömä ja̧u̧tö̧ tö'cönänö huȩjö̧'i̧nä̧, Ibleam'i̧nä̧ ja̧u̧tä̧ tö'cönänö huȩjö̧'i̧nä̧, Dor ttö̧ja̧'i̧nä̧ ju̧huȩnȩtä̧ tö'cönä̧nö̧ ka̧cuä̧tö̧'i̧nä̧, Tanac ötahuiyänä ka̧cuä̧tö̧'i̧nä̧, ja̧u̧tä̧ tö'cönänö ka̧cu̧ ötahuiyä'i̧nä̧, Meguido ttö̧ja̧'i̧nä̧ jahuätötä ttippeyänä ka̧cuä̧tö̧'i̧nä̧, (huäbodäcuä päi'önämä Náfet ji̧na̧'a̧) ¹² Ja̧'hua̧nö̧ ja̧'a̧nä̧ Manasés ahuaruhuä 'cotömä ja̧u̧ ötahuiyämä 'chuttädi'ö juiyönä ji̧na̧'a̧, juhua'amä Canaán ttö̧ja̧ ja̧huä̧jä̧nä̧ ttö̧ja̧cua̧'a̧ttö̧. ¹³ Israel ttö̧ja̧ yabonö ttujuruhuächomenä Canaán ttö̧ja̧rö̧ a̧mä̧cö̧ juäi ttaditönä hue'inä̧tö̧, ja̧'hua̧nö̧ huetta'anä o'catoi'önä̧rö̧mä̧ rä'epö icuocotö pinätö̧. ¹⁴ Ja̧'hua̧nö̧ ja̧'a̧ José i̧tti̧mö̧mä̧ Josuérö pä'inä̧tö̧: ¿Tta̧'a̧nö̧ pä'ö rȩjȩmä̧ a̧'u̧cu̧nä̧tä̧ pönä cui̧yä̧u̧jä̧ttö̧, ujutumä recuätö ta'anämä o'catoi'önä̧rö̧tä̧ TÖ̧Ä̧NÄ̧HUA̧MÄ̧ adiu ppädina'an1ämä? ¹⁵ Josuémä päinä̧u̧: Ucutu ttö̧ja̧jä̧ juiyo recuätöjä̧, ucututä de'iyöra̧'a̧ tätucui ja̧'hua̧nö̧ 'chä̧nö̧ Ferezeos'i̧nä̧, Refaías'i̧nä̧ tti̧rȩjä̧nä̧ 'tä̧'ȩpö̧ ka̧cuä̧jä̧tu̧cui̧. Ja̧u̧ jȩpä̧tu̧cui̧, täcö Efraín irejämä juiyo a̧'u̧cuä̧jä̧tä̧ ja̧'a̧ ucuturumä." ¹⁶ José i̧tti̧ 'cotömä pä'inä̧tö̧: Mö̧ä̧'quiyö o̧ö̧nä̧mä̧ ujutu tö̧ja̧cua̧ pä'ömä juiyo a̧'u̧cua̧'a̧. Ja̧'hua̧nö̧ ja̧'a̧nä̧ Canaán rȩjȩnä̧ ka̧cuä̧tö̧mä̧ carucä curä rohuäu 'chä̧cuä̧huäcä'i̧nä̧ cuoräuttö adicua'a ku̧nä̧rä̧tö̧, Bet Saeán ka̧cuä̧tö̧'i̧nä̧ ja̧'hua̧ta̧nö̧ ppeyänä ka̧cuä̧tö̧'i̧nä̧, jittö Jezreelttö pämäroppä päi'ome ka̧cuä̧tö̧'i̧nä̧." ¹⁷ Ja̧'hua̧nö̧ ja̧'a̧ Josuémä José'i̧nä̧, Efraínrö'i̧nä̧ ja̧'hua̧ta̧nö̧ Manasésrö'i̧nä̧ pä'inö: Ucu juiyo recuätö huotöjä̧ ja̧'hua̧ta̧nö̧ cujurutucu ku̧nä̧rä̧tö̧jä̧. Ucumä tti̧yä̧'chä̧jä̧ttö̧mä̧ a̧'u̧cu̧nä̧tä̧ ttiyinäjätä̧mä̧ cu̧ju̧ra̧ pä'ömä̧ jo̧ca̧'a̧. ¹⁸ Mö̧ä̧'quiyömä ucutä cui̧rȩja̧ ja̧'a̧. De'a jo̧mȩ'i̧nä̧ ȩmö̧ 'tä̧cuȩpa̧'a̧nä̧, cui̧rȩjä̧ päi'önä cuȩma̧ja̧, ja̧huä̧jä̧ beipome jubö. Canaán ttö̧ja̧rö̧'i̧nä̧ ya'opö cuicuätucuja, curä tturohuäu ocämä ttu̧ju̧nä̧ra̧'a̧nä̧, jahuätömä."