¹ Pi̧yȩtä̧ ja̧'a̧ Canaan rȩjȩttö̧ Israel ttö̧ja̧ tti̧rȩji̧yä̧ päi'önä ttȩmi̧nö̧mä̧, jahuätörö iyä'chinä̧tö̧mä̧ Diosttö'i̧nä̧,ttö̧ja̧ttö̧'i̧nä̧, kä'copäte'ö,adicuä i̧sa̧ Eleazar'inä,Nun i̧tti̧ Josue'inä ji̧na̧'a̧,Israel ahuaruhuä 'cotö ttahuaruhuättö ji̧nä̧ isocu jue'ipotömä̧ ya̧cu̧ pö̧nä̧ ka̧cui̧nä̧tö̧. ² Jahuätörö ttȩmä̧cu̧ä̧ päinö ji̧nö̧mä̧ Urim Tumim pättönä jȩtto̧mȩnä̧ jueö pätecuächäjitä ȩmi̧nö̧ i̧rȩjä̧mä̧,Tö̧ä̧nä̧hua̧ Dios Moisesrö päinö̧ta̧'a̧nö̧, nuevenö huotörö,ja̧hua̧nö̧ ja̧'a̧nä̧ korotöttömä jö'totörö'inä cuiyaja. ³ Ja̧hua̧ta̧'a̧nö̧ Moisesmä ta̧ju̧ huotorö'inä,korotöttömä jö'totörö'inä täcö iyinö,Jordan aje ya̧nä̧ ji̧jä̧nä̧,ja̧hua̧nö̧ ja̧'a̧nä̧ Levi ahuaruhuä 'cotörömä iyocö pi̧nö̧ tti̧rȩjä̧mä̧. ⁴ Jose ahuaruhättömä ta̧ju̧ huotö päi'önä 'cä̧'ȩcui̧nä̧tö̧,Manases'inä,Efrain'i̧nä̧,ja̧hua̧nö̧ ja̧'a̧nä̧ Levi ahuaruhuä 'cotörömä iyocö pi̧nö̧ tti̧rȩjä̧mä̧ .ötahuiyä jö̧ a̧'u̧cuä̧tä̧ ttö̧ja̧cua̧ pä'ö ,töäre'inä ttu̧ju̧nä̧rö̧nä̧ ja̧hua̧t'a̧nö̧ tti̧rȩjä̧'i̧nä̧ ttä̧ji̧mö̧ pä̧cä̧yö̧ ttu'cuä'cua ko̧mȩ huettinä̧u̧. ⁵ Israel ttö̧ja̧mä̧ Tö̧ä̧nä̧hua̧ Dios Moisesrö hueinö̧ta̧'a̧nö̧tä̧, ja̧hua̧nö̧ ja̧'a̧ttö̧ jahuätömä iyinä̧tö̧ rȩjȩmä̧. ⁶ Ja̧u̧nu̧ o'ca'a Juda sotö i̧sa̧ ichinö Gilgalnä Josue ö̧jo̧mȩ.Jefone i̧tti̧ Celebmä pä'inö ja̧u̧rö̧:Ucumä huo̧jua̧jä̧ Dios u̧mö̧huä̧ya̧ Cades Berneattö̧. Ttörö'i̧nä̧ ja̧hua̧ta̧'a̧nö̧ ucuru'i̧nä̧ päina̧'a̧mä̧. ⁷ Ttömä̧ cuarenta a̧'ȩ jo̧mȩnä̧ ku̧nä̧ri̧nö̧sä̧ ja̧u̧nö̧ pä̧nä̧mä̧ Dios u̧mu̧huä̧ya̧ Moises Cades Berneattö̧ rȩjȩ usäu cuedächaja pä'ö hueinö̧mä̧. Ttömä yottö tochäjimä i'cächö iyinö̧sä̧. ⁸ Ja̧hua̧nö̧ ja̧'a̧nä̧ ttö jitöcu ppä'ächi'ö chi̧'chi̧nä̧u̧mä̧, jahuätömä ji'ähuinä̧tö̧ korotö ttami̧ iso'quittö ye'ecui'ö mo̧tto̧po̧'ä̧chö̧nä̧. Ja̧hua̧nö̧ ja̧'a̧nä̧ Ttömä Tö̧ä̧nä̧hua̧ Dioscutä ki̧nö̧sä̧. ⁹ Moisesmä ja̧u̧nö̧ pä̧nä̧mä̧ iso päi'önä pähuä pä'ö ku̧ni̧nö̧:"Iso päi'önä cuecuächäji o̧dö̧nä̧mä̧ ucutä'inä,cui̧tti̧mö̧'i̧nä̧ 'cuäopönä̧tä̧ cui̧rȩjä̧ tu̧cu̧ jä̧cua̧'a̧,Tö̧ä̧nä̧hua̧ Dios hueäji jo̧mȩnö̧ cäcuäda'attö." ¹⁰ ¡ Jitämä, topi ! Tu̧ru̧hua̧ Tö̧ä̧nä̧hua̧ Diosmä pi̧yȩ cuarenta y cinco a̧'ȩ jo̧mȩnä̧ cha̧'cua̧rö̧nä̧ ji̧nä̧ tta̧hua̧rä̧cu̧sä̧, ja̧u̧ pä'inö̧ta̧'a̧nö̧tä̧, Tu̧ru̧hua̧ Dios ucuocuinö pi̧yȩ huȩnȩmä̧ Moisesrö, Israesl ttö̧ja̧ de'a jui̧yä̧jä̧ra̧'a̧ cuettächinö̧ pä̧nä̧. ¡ Jitämä , amöcuädi ! Pi̧yȩ mo̧ro̧mä̧ täcö ku̧nä̧rö̧sä̧ ochenta y cinco a̧'ȩ jo̧mȩnä̧. ¹¹ Jitä pi̧yȩ mo̧ro̧ jubömä ji̧nä̧ ju̧ru̧hua̧sä̧ Moises ttörö ko̧ro̧jä̧ra̧'a̧ chi̧'cha̧ pä'ö hueinö chujuruhuinö̧ ta̧'a̧nö̧tä̧. Ju̧ru̧hua̧sä̧ ji̧nä̧, curä rohuähuö chi̧'cha̧ pä'ö'inä ja̧hua̧ta̧'a̧nö̧ ppa̧da̧cha̧ pä'ö'inä. ¹² Ja̧hua̧nö̧ ja̧'a̧ttö̧, jitämä, iyittö pi̧yȩ mö̧ä'quiyu o'cajuiyönä̧tä̧, Tu̧ru̧hua̧ Dios ji̧yȩnö̧ mo̧ro̧ chi̧yä̧cua̧jä̧ päinö̧ ji̧nö̧mä̧. Ucumä ä̧ju̧cui̧nö̧jä̧ ja̧u̧nö̧ mo̧ro̧ ttörö pä'amä. Ja̧u̧nö̧ pä̧nä̧mä̧ Cananeos ttö̧ja̧mä̧ ttöäre ötahuiyämä 'quiyönä adicua'a ka̧cui̧nä̧tö̧.Tu̧ru̧hua̧ Diosmä ttöcu kö̧ jahuätörö u̧mi̧cu̧ rä'epö chicua pä'ömä, Tu̧ru̧hua̧ päinö ta̧'a̧nö̧." ¹³ Ja̧u̧nö̧ o'ca'a, Josuemä adiu ucuocu pä'inö Jefone i̧tti̧ Calebrö. ¹⁴ Hebron ötahuiyämä iyinö päinö ta̧'a̧nö̧ i̧tti̧mö̧cu̧ ö̧ja̧ pä'ö. Ja̧hua̧nö̧ ja̧'a̧ttö̧ Cenezeos ttö̧ja̧ i̧sa̧ Jefone i̧tti̧ Caleb, öäre ötahuiyätä päi'önä ja̧'a̧ Hebron ötahuiyämä jitä pi̧yȩ mo̧ro̧ jubö, Israel ttö̧ja̧ Ttu̧ru̧hua̧, Ttö̧ä̧nä̧hua̧ Diosrö icuipoca'a ji̧na̧'a̧ttö̧. ¹⁵ Ja̧hua̧nö̧ ja̧'a̧, Hebron ötahuiyämä micuina̧'a̧ Quiriat Arba pä'ö. (Arba pä'ö mi̧cua̧ ttö̧ja̧ i̧sa̧mä̧ böo pinö̧ Anaceos ttö̧ja̧ttö̧mä̧.)Ja̧u̧nö̧ o'ca'amä̧ täcö curämä juiyina̧'a̧.