¹ Ja̧'hua̧nö̧ Jabin ,Hazor ötahuiyä ru̧hua̧mä̧,ja̧u̧ huȩnȩ ä̧ju̧cuo̧mȩnä̧ ji̧yȩtȩ huȩnȩ hue'inö ru̧hua̧ Jobabrö'inä,Madon ötahuiyä ru̧hua̧rö̧'i̧nä̧,Simron ötahuiyä ru̧hua̧rö̧'i̧nä̧ ja̧hua̧ta̧'a̧nö̧ Acsaf ötahuiyä ru̧hua̧rö̧'i̧nä̧. ² Ja̧hua̧nö̧ ja̧'a̧nä̧ huȩnȩmä̧ hue'inö korotö ruhuotörö'inä kä̧hua̧ u̧huo̧jua̧'acu̧ mö̧ä'quiyunä ka̧cuä̧tö̧rö̧'i̧nä̧, Jordan aje jäyänä pämäroppänä Cineretnä ka̧cuä̧tö̧rö̧'i̧nä̧, kä̧hua̧ ö'ohue ja̧'a̧cu̧ ka̧cuä̧tö̧rö̧'i̧nä̧, mȩjȩ'quiyunä ja̧hua̧ta̧'a̧nö̧ mö̧ä'quiyunä kä̧hua̧ mo̧ä̧cha̧'a̧cu̧ Dornä ka̧cuä̧tö̧rö̧'i̧nä̧. ³ Ja̧hua̧nö̧ ja̧'a̧nä̧'i̧nä̧ huȩnȩmä̧ hue'inö Cananeos ttö̧ja̧rö̧'i̧nä̧ ka̧hua̧ räopa'acu, ja̧hua̧ta̧'a̧nö̧ kä̧hua̧ mo̧ä̧cha̧'a̧cu̧ ka̧cuä̧tö̧rö̧, Amorreos ttö̧ja̧rö̧'i̧nä̧, Hititas ttö̧ja̧rö̧'i̧nä̧, Ferezeosrö'inä, Jebuzeosrö'inä, mȩjȩ'quiyunä ka̧cuä̧tö̧rö̧ ja̧hua̧ta̧'a̧nö̧ Heveos ttöjarö'inä Hermon mö̧ä'ca tö'cö Mizpa rȩjȩnä̧ ka̧cuä̧tö̧rö̧'i̧nä̧. ⁴ O'catoi'önä jahuätö ruhuotömä ttumähuäyotö su̧ro̧da̧u̧cu̧ rä'opinätö, recuätö su̧ro̧da̧u̧ ji̧na̧'a̧,jahuätömä röoto aje jäyoto pä̧ba̧ rȩba̧ ta̧'a̧nötä̧ recuinätö. Jahuätömä ku̧nä̧ri̧nä̧tö̧ rö̧ä̧nä̧ ca̧ba̧yu̧tu̧ru̧'i̧nä̧ ja̧hua̧ta̧'a̧nö̧ caruquiyä'inä. ⁵ O'catoi'önä pitö ruhuotömä ji̧nä̧ yo̧mȩtȩ pä'i'inätö pä'ö ttu̧ju̧nä̧ji̧ horanä, ja̧hua̧nö̧ ja̧'a̧ttö̧ jahuätömä pä̧jä̧mi̧nä̧tö̧ Meromnä̧ aje i̧sä̧rä̧ tö'cö ttörohuähua pä'ö Israel ttö̧ja̧rö̧. ⁶ Tö̧ä̧nä̧hua̧ Diosmä Josuerö pä'inö,"Yecuecuoca'atä kä̧hui̧, yo̧ȩi̧ mo̧ro̧mä̧ pi̧yȩtä̧ horanä chi̧yä̧cua̧sä̧ o'catoi'önä Israel ttö̧ja̧rö̧ cuabo iyotörö cuä'ähuö cuicuätucua pä'ö. Ttä̧ji̧mö̧ ca̧ba̧yu̧tu̧'i̧nä̧ ttujuru juiyächi'äcuotö ja̧hua̧nö̧ ja̧'a̧nä̧ ttöcaruquiyämä kuhuö cuicuäcuotöjä." ⁷ Josuemä ja̧hua̧ta̧'a̧nö̧ curä rohuäcuähuä ttö̧ja̧cu̧ 'chä̧hui̧'i̧nö̧ Merom aje i̧sä̧rä̧ tö'cö, ja̧hua̧nö̧ rȩbȩhui̧'ö̧ rohuähuinätö ttabo iyotörömä. ⁸ Tu̧ru̧hua̧ Diosmä̧ Israel ttö̧ja̧ ttu̧mö̧nä̧tä̧ iyipinö,ja̧hua̧nö̧ ja̧'a̧ttö̧ cuä'ähuö tticuinä̧u̧ curä'chunä ja̧hua̧nö̧ ja̧'a̧nä̧ juhua'a yabocu ru'i'inä̧tö̧ Sidon,Misrefot Maim jubö,ja̧hua̧ta̧'a̧nö̧ Mispa rȩjȩ pämäroppä kä̧hua̧ räopa'acu päte'ö. Cuä'ö tti̧cui̧nä̧u̧ ya̧tȩ'i̧nä̧ ö̧ji̧pi̧yö̧nä̧tä̧. ⁹ Josuemä jȩpi̧nö̧ Tu̧ru̧hua̧ Dios päjita'anö. ca̧hua̧yu̧tu̧mä̧ juiyupächi'inätö ja̧hua̧nö̧ pätti'omȩttö̧ cuä'ö tticuinä̧u̧ ja̧hua̧nö̧ ja̧'a̧nä̧ caruquiyä'inä kuhuö tticuini̧yä̧u̧. ¹⁰ Josuemä ja̧u̧nu̧tä̧ ppa̧'ä̧chö̧ 'chu'ädinö Hazor ötahuiyä'inä. Ru̧hua̧rö̧mä̧ cuä'ö icuinö curä'chunä.(Hazor ötahuiyämä koro ötahuiyättö'inä abonänö ruhuo isomȩ ji̧na̧'a̧.) ¹¹ Ju̧huȩnȩ ötahuiyänä ka̧cui̧pä̧jä̧tö̧rö̧mä̧ ya̧cu̧ pö̧nä̧rö̧ cuä'ö icuinätö,ttöäre'inä ca̧ca̧tö̧ rötätö'cotö jȩpö̧ icuinä̧tö̧, ya̧tȩ'i̧nä̧ i̧ji̧pi̧yö̧nä̧tä̧ cuä'ö icuinätö. ja̧hua̧nö̧ jȩpö̧ kuhuö icuinä̧tö̧ Hazor ötahuiyämä. ¹² Josuemä 'chu'ädinö o'cajuiyönä pi̧yȩ ötahuiyä ruhuotörömä.Ja̧hua̧nö̧tä̧ jȩpö̧ 'chu'ädinö ruhuotörö'inä̧ ja̧'hu̧a̧nö̧ 'chu'ädä̧ji̧'ca̧ cuä'ö icuinö curä'chunä. Ja̧hua̧nö̧ jȩpö̧ curä'chunä, cuä'ähuö icu si'epö i̧cui̧nä̧u̧ Tö̧ä̧nä̧hua̧ Dios u̧mö̧huä̧ya̧ Moises hueinö ta̧'a̧nö̧. ¹³ Israel ttö̧ja̧mä̧ kuhuö icuocotö pi̧nä̧tö̧ ötahuiyä möä'quiyunä ka̧cu̧mä̧,ja̧hua̧nö̧ ja̧'a̧nä̧ Hazor ötahuiyätä. Josue kuhuö icuina̧'a̧mä̧. ¹⁴ Israel ttö̧ja̧ su̧ro̧da̧u̧mä̧ ötahuiyättö cuä'ö tti̧cuä̧u̧ ttöäre pȩji̧pä̧ji̧mä̧ jitötä ttöäre päi'önä ȩmi̧nä̧tö̧ jahuata'anö pä̧cä̧yö̧rö̧'i̧nä̧.Jahuätömä o'catoi'önärö curä'chunä cuä'ö icuinätö ttö̧ja̧rö̧mä̧ ya̧tȩ'i̧nä̧ ö̧ji̧pi̧yö̧nä̧tä̧ a'cua̧rö̧ ku̧nä̧rö̧mä̧. ¹⁵ Ja̧hua̧ta̧'a̧nö̧ Tö̧ä̧nä̧hua̧ Dios u̧mö̧huä̧ya̧ Moisesrö hueinö̧ ta̧'a̧nö̧, Moises'inä ja̧hua̧nö̧tä̧ hue'inö u̧möhuäya Josuerömä,ja̧hua̧nö̧tä̧ jȩpi̧nö̧ Josuemä.Tö̧ä̧nä̧hua̧ Dios u̧mö̧huä̧ya̧ Moisesrö hueiö̧mä̧ ji̧yȩtȩ'i̧nä̧ jäyä jȩpo̧cö̧ pi̧nö̧. ¹⁶ Josuemä ja̧huä̧jä̧ rȩjȩ jä̧ttä̧yä̧jä̧tä̧ ȩmi̧nä̧,mö̧ä̧'quiyu'inä,o'cajuiyönä Neguev'inä,o'cajuiyönä Gosen rȩjȩ'i̧nä̧,rȩjȩ pämäroppä'inä,Jordan aje pämäroppä'inä,Israel rȩjȩ mö̧ä̧'quiyu'inä, ja̧hua̧ta̧'a̧nö̧ mȩjȩ'quiyu'inä. ¹⁷ Halac möä'cattö kä̧mä̧dö̧ Edom tö'cöhuächi'omȩ jubö,Kä̧hua̧ u̧huo̧jua̧'a̧cu̧ 'chä̧nö̧ Baal Gad ppämäroppära'acu Libano tu'cöhuächi'önä Hermon mö̧ä'ca dea'acu, ju̧huä̧jä̧ rȩjȩ ruhuotörömä̧ o'catoi'önä̧rö̧ 'chu'ädö cuä'ö icuinä̧u̧. ¹⁸ Josuemä recuo rohuähuinö curämä o'catoi'önä jahuätö ruhuotöcumä. ¹⁹ Ji̧yȩtȩ ötahuiyättö'inä curä juiyönä ttö̧ja̧ pä'ömä ucuocuocotö pi̧nä̧tö̧ Israel ttö̧ja̧ su̧ro̧da̧u̧mä̧ Heveos ttö̧ja̧ Gabaon ötahuiyänä kä̧tö̧tä̧ ji̧na̧'a̧ huȩnȩ jui̧yö̧nä̧ ki̧nä̧tö̧mä̧. Israel ttö̧ja̧mä̧ pi̧yȩ o'cajuiyönä ötahuiyämä rohuähuötä 'chu'ädinätö. ²⁰ Tö̧ä̧nä̧hua̧ Diostä ji̧na̧'a̧ jahuätö ttamiso'qui 'quittönä jȩpi̧nö̧mä̧ rohuähuö tticha pä'ö Israel ttö̧ja̧rö̧,ja̧u̧ jahuätö o'catoi'önärö si'epö icua pä'ömä ji̧'qui̧cha̧nö̧'i̧nä̧ re toäcuähuä juiyönä jaropi'äcuähuotö pi̧nä̧tö̧, Tö̧ä̧nä̧hua̧ Dios Moisesrö hue'ö u̧ju̧ni̧nö̧ta̧'a̧nö̧. ²¹ Ja̧hua̧nö̧ ja̧'a̧ttö̧ ja̧u̧nu̧ pä̧nä̧tä̧ Josuemä Anaceos ttö̧ja̧rö̧ jȩpö̧ icuinö. Pi̧yȩmä̧ jȩpi̧nö̧ Hebron mö̧ä'cattö,Debir ttö̧ja̧rö̧'i̧nä̧, Anab ttö̧ja̧rö̧'i̧nä̧ ja̧hua̧ta̧'a̧nö̧ o'catoi'önä Juda mö̧ä'canä kä̧tö̧'i̧nä̧ ,ja̧hua̧nö̧ ja̧'a̧nä̧ o'catoi'önärö Israel mö̧ä'canä kä̧tö̧rö̧'i̧nä̧. Josuemä o'catoi'önä̧rö̧ cuä'ö icuinö ttöäre ötahuiyä'inä jȩpö̧ icuinö. ²² Ya̧tȩ'i̧nä̧ Anaceos ttö̧ja̧ttö̧mä̧ ki̧'i̧po̧co̧tö̧ pi̧nä̧tö̧ Israel ttö̧ja̧ tti̧rȩjä̧nä̧mä̧ pitötä ja̧'a̧ ki̧'i̧pi̧nä̧tö̧mä̧ Gaza ttö̧ja̧'i̧nä̧,Gat ttö̧ja̧'i̧nä̧, ja̧hua̧ta̧'a̧nö̧ Asdod ttö̧ja̧'i̧nä̧. ²³ Josuemä ja̧hua̧nö̧tä̧ jȩpö̧ rohuähuö icu 'chuädinö o'cajuiyönä rȩjȩmä̧, TÖ̧Ä̧NÄ̧HUA̧ Dios Moiserö hueinöta̧'a̧nö̧: Josuemä Israel i̧tti̧mö̧ pinätö̧ttö̧ ttahuaruhuäcu tturuhuo pönä iyä'chinö. Ja̧u̧nö̧ o'ca'a Israel ttö̧ja̧mä̧ curä'inä juiyönä ka̧cui̧nä̧tö̧.