¹ Jitämä Jerusalen ru̧hua̧ Adonisedecmä, ä̧ju̧cui̧nö̧ Josue Hai ötahuiyä 'chuhuädina̧'a̧'i̧nä̧, ja̧hua̧ta̧'a̧nö̧ o'catoi'önä̧rö̧ jȩpö̧ icuina̧'a̧'i̧nä̧, ja̧hua̧nö̧ ja̧'a̧nä̧ Jerico ötahuiyä'inä ja̧hua̧ta̧'a̧nö̧ ru̧hua̧rö̧'i̧nä̧ jȩi̧nö̧mä̧ ä̧ju̧cui̧nö̧ . Ja̧u̧mä̧ ja̧hua̧ta̧'a̧nö̧ ä̧ju̧cui̧nö̧ Gabaon ttö̧ja̧ Israel ttö̧ja̧cu̧ huȩnȩ juiyönä ttö̧ja̧ pä'ö jättecuina̧'a̧mä. ² Jerusalen ötahuiyä ttö̧ja̧mä̧ rö̧ä̧nä̧ ye'ecuinätö Gabaon ötahuiyämä rö̧o̧mȩ ja̧'a̧ttö̧, ja̧u̧ ötahuiyämä ruhuo some jä̧'i̧nö̧'a̧nö̧ ji̧na̧'a̧. Hai ötahuiyättö'ina abonänö rö̧o̧mȩ ji̧yä̧u o'catoi'önä su̧ro̧da̧u̧mä̧ roäcuähuä juruhuätö ja̧'a̧ttö̧ . ³ Ja̧hua̧nö̧ ja̧'a̧ttö̧ Adonisedec Jerusalen ru̧hua̧rö̧mä̧ i̧huȩnȩ hue'inö̧ ruhuotörö Hohan,Hebron,ruhuarö'inä,Piream,Jamut ru̧hua̧rö̧'i̧nä̧, Jafia Laquis ru̧hua̧rö̧'i̧nä̧ ja̧hua̧ta̧'a̧nö̧ Debir Eglon ru̧hua̧rö̧'i̧nä̧ . ⁴ TTöcu ichätöcui ppäcuädätucuattö. Gabaon ttö̧ja̧rö̧ törohuähua'a ppäcuädätucua. Jahuätömä Josuecu'inä Israel ttöjacu'inä huȩnȩ juiyönä ttöja̧cua̧ pä 'ö jattecuina'attö . ⁵ Amorreos ttö̧ja̧ttö̧ ji̧mö̧tȩnö̧ ruhuotömä:Jerusalen ruhua'inä Hebron ruhua̧rö'inä,Jarmut ru̧hua̧rö̧'i̧nä̧, Laquis ru̧hua̧rö̧'i̧nä̧,jahuata'anö Eglon ru̧hua̧rȩö̧'i̧nä̧ o'catoi'nä ttömuhuäyotö su̧ro̧da̧u̧cu̧ pönä.Jahuätömä rohuäu kämädinätö̧ Gabaon ötahuiyä ttö̧ja̧rö. ⁶ Gabaon ötähuiyä ttö̧jä̧mä̧ tti̧huȩnȩ hue'inä̧tö̧ Josuerö Gilgalnä umöhuäyotö su̧ru̧dä̧u̧cu̧ ö̧ja̧'a̧. Pä'inä̧tö̧:" ¡O'capäi'önä ichi! Jarocui'ipä ucu cu̧mö̧huäyotörömä. ppäcuädatö, ja̧hua̧ta̧'a̧nö̧ o'catoi'önä Amorreos ttö̧jä̧ttö̧ ruhuotö mö̧ä̧'quiyunä ka̧cuä̧tö̧mä̧ ca̧ca̧cuä̧jä̧tö̧ ja̧'a̧ ujuturu ttörohuähua pä'ö. ⁷ josuemä 'cha'ächinö Gilgalra'a, ja̧u̧mä̧ o'catoi'önä u̧mu̧huäyotö su̧ru̧da̧u̧cu̧,ja̧hua̧ta̧'a̧nö̧ curä rohuäcuähuä juruhuätucu̧'i̧nä̧. ⁸ Tö̧ä̧nä̧hua̧ Diosmä Josuerö pä'inö '' yecuecuä jahuätörömä. ucu cumönä chi̧yi̧pä̧u̧. Jahuätöttömä ya̧tȩ'i̧nä̧, tto̧ȩpi̧yä̧cua̧ ucu rohuähuö cu̧jä̧mä̧do̧mȩnä̧." ⁹ Josuemä jeruhuara'atä 'chä̧hui̧'i̧nö̧. Jahuätörömä, Gilgalra'attö yodo 'cuäoi'önä i'cha'attö. ¹⁰ Tö̧ä̧nä̧hua̧ Diosmä jerutu icuinö Israel ttö̧ja̧ ttabo iyotörömä, Gabaonttömä̧ recuätörö totte'önä cuä'ö icuinö,ja̧hua̧ta̧'a̧nö̧ rutti'inä̧u̧ Bet Horomra̧'a̧ 'chä̧mä̧ mänänä, ja̧hua̧ta̧'a̧nö̧ Azecara'acu'inä Macedara'acu'inä 'chämä mänättö̧ cuä'ö tticuinäu̧. ¹¹ Jahuätö Bet Horon möä'ca mejähuächö̧ tötticha'a, Tö̧ä̧nä̧hua̧ Diosmä mo̧ro̧jä̧ra̧'a̧ttö̧ inähuiyä bäreu kä'inö jahuätörö o'catoi'önä Azecara'acu mä̧nä̧nä̧ 'chä̧tö̧rö̧, ja̧hua̧nö̧ päi'ä̧u̧ to'e'inätö. recuätö ji̧na̧'a̧,inädu mo̧ä̧u̧ to'e'inä̧tö̧mä̧, Israel ttö̧ja̧ curodiyänä cuä'ähuö tticuinäu̧ttö̧'i̧nä̧ abonänö. ¹² ja̧u̧nu̧ o'ca'a josuemä töänahua̧ Di̧oscu̧ u̧cuo̧cui̧nö̧ Ja̧u̧nu̧ mo̧ro̧mä̧ tö̧ä̧na̧hua̧ Dios i̧srael tto̧ja̧rö ttu̧ju̧ru̧ i̧yi̧nö̧ a̧mo̧rrȩo̧s tto̧ja̧rö ttoro̧huahua̧ pä'ö. Pi̧yȩ ji̧na̧'a̧ josue turuhua̧ Diosrö päinömä israel ttöja̧ ttä̧'cattö: ¡Mo̧ro̧ kä̧hua̧ kä̧mä̧di Gaboannätä ,u̧cu̧ yodo kähua 'inä,Ajalon pämäroppänätä kämädi̧ . ¹³ mo̧ro̧ kä̧hua̧mä̧ kä̧mä̧di̧nö̧,yo̧do̧ kä̧hua̧'i̧nä̧ jua̧'a̧ yabomä 'chö̧cö̧ pinö israel ttöjä̧ ttaboiyotörö micuä ttemome jubu. ¿piyemä hueyutu rötähuoca'a täji̧ jaser cuyäru'ttänämä? mö̧rö̧ kähua̧mä mo̧ro̧ja̧ kä'co päteö kämädnö, jahuanö öjämädo̧mettömä yaute mo̧ro̧ jäijo̧me ttö'cöhuachiönä tȩä̧hui̧nä̧'ä̧. ¹⁴ ji̧yȩtȩ mo̧ro̧'i̧nä̧ 'cuä'opoca'a jäijä̧'ä̧ pa̧ä̧nö̧mä̧ äcuo̧mȩnä̧ji̧'i̧nä̧ ja̧u̧no̧ o'ca'a inä cuopiyäcua'a pa'anömä, ttö̧jä̧ i̧sa̧ jäepäjimä tö̧ä̧nä̧hua̧ Diosmä jȩpi̧nö̧. pi̧yȩmä̧ jȩpi̧nö̧ tö̧ä̧nä̧hua̧ Diosmä israel ttöjä̧rö̧ ppä̧'ä̧dörö̧ örohuahua'attö. ¹⁵ Josuemä o'ca toi'önä I̧srael ttö̧ja̧cu̧ ppa̧'ä̧chi̧nä̧tö̧ ttä'ähuarä Gilgalra'a. ¹⁶ Jitämä ji̧mö̧tȩnö̧ ruhuotö tö'ipächö. dajähuächäjätö pi̧nä̧tö̧ Maceda idoränä. ¹⁷ Josuerö ji'ähuinätö ¡Jahuätörömä tä'cö po̧cui̧pä̧jä̧tö̧jä̧! Ji̧mö̧tȩnö̧ ruhuotö Maceda idoränä dajahuächäjätörömä. ¹⁸ Josue pä'inö: inäbi röäbi tto'epö ku̧nä̧jä̧tu̧cui̧ idorä ä'ca ja̧hua̧nö̧ ja̧'a̧nä̧ su̧ro̧da̧u̧ru̧'i̧nä̧ hue'ö kunäjä̧tucui, juene tta̧ttä̧ra̧. ¹⁹ juä̧nȩtä̧mä̧ cuji̧pä̧tu̧cuä̧ cuabo iyotorömä rohuähuäjätucui cuä'ö icuäjätucuitö ttaboja'anä chä̧nö̧. ja̧'a̧tä̧mä̧ tocu'ätucuätö ttötahuiyära'a dottächa'anämä, täcö Tö̧ä̧nä̧hua̧ Diosmä ucutu cu̧mö̧tu̧cu̧nä̧ iyipäji jahuätörömä. ²⁰ Josue'inä, Israel ttö̧ja̧'i̧nä̧ recuätörö hua'ö tticunä cuä'ö icuinä̧tö̧, ötahuiyä quiya'a abo doächi'äjätötä ka̧cui̧pi̧nä̧tö̧. ²¹ ja̧u̧nö̧, o'ca'a o'ca toi'önä su̧ro̧da̧u̧ma̧ ttu̧ȩcuä̧nä̧tä̧ ppa'ä̧chi̧nä̧tö̧ Josue ö̧ja̧'a̧ ttä'ähuarä Maceda'ra'acu. Ya̧tȩ'i̧nä̧ i̧mi̧cu̧nä̧mä̧ pä'ocö pinö Israel ttö̧ja̧rö̧mä̧. ²² Ja̧unö o'ca'a Josue pä´inö: ba'epäjätucui idorä reju möecuäbi ja̧u̧nö̧ o'ca'mä pocu cui'cächätucuatöja ji̧mö̧tȩnö̧ huotö ruhuotörömä. ²³ Jahuätömä ja̧u̧ hueäji'ta̧'a̧nö̧tä̧ jȩpi̧nä̧tö̧ . Ja̧hua̧nö̧ ja̧'a̧ttö̧ i'cächö iyinä̧tö̧ idorättömä ji̧mö̧tȩnö̧ huotö ruhuotörömä.Jerusalen ru̧hua̧rö̧'i̧nä̧, Hebron ru̧hua̧rö̧'i̧nä̧ , Jarmut ru̧hua̧rö̧'i̧nä̧, Laquis ru̧hua̧rö̧'nä̧, Ȩglon ruhua̧rö'inä. ²⁴ Ja̧hua̧ta̧'a̧nö̧ jahuätö ruhuotörö Josuerö i'cächö ttiyomenä, Ja̧u̧mä̧ huopinö Israel ttö̧ja̧ttö̧ ya̧cu̧ pö̧nä̧rö̧, pä'inö su̧ro̧da̧u̧ tturuhuotörö curära'a chutäcu chi̧nä̧tö̧rö̧mä̧:"cujäpötucumä ttu̧ru̧pä̧'quȩnä̧ kä̧dä̧tu̧cui̧tö̧ " ja̧hua̧nö̧ pä̧u̧ ichi'ö ttu̧ru̧pä̧'quȩnä̧ tti̧jä̧dä̧ri̧nä̧u̧. ²⁵ Ja̧u̧nö̧ o'ca'a pä̧i̧nä̧u̧:"juruhuätucui ye'ecu'inä yecuecuätucuä .pa̧'a̧nö̧tä̧ jȩä̧cua̧ tö̧ä̧nä̧hua̧ Diosmä tabo iyotö ucutu curohuähuätucuä̧u̧ru̧mä̧. ²⁶ Ja̧u̧nö̧ o'ca'a Josuemä ji̧mö̧tȩnö̧ huotö ruhuotörö cuä'ö icuinö. u̧ni̧nä̧u̧ ji̧mö̧tȩnö̧ oi dauhuiyänä jahuätömä ja̧u̧ oinämä ni̧pä̧ro̧mȩ jubö ri̧nä̧tö̧ . ²⁷ Ni̧pä̧ro̧mȩcu̧ Päi'omȩnä̧, Josuemä ja̧u̧ dauhuiyättö ejädö tticua pä'ö hue'inö ,ja̧u̧nu̧ o'ca'a reju ttödajuächinäjura'atä ,do'opö icu inäbi röäbi idorä reju ä'ca mu̧ttȩpö̧nä̧ hue'inö, juäbi inäbimä jitä mo̧ro̧ jubö päi'önä ka'a. ²⁸ Pa̧'a̧nö̧tä̧ jȩpö̧, josuemä Maceda ötahuiyä 'chu'ädinö ja̧u̧nö̧tä̧ mo̧ro̧ o'catoi'önärö cuä'ö icuinö curä'chunä,ttu̧ru̧hua̧ ru̧hua̧rö̧'i̧nä̧ . Juhuorömä o'catoi'önä äjicuäcuähuotö isotörö'inä cuä'ö icuinö . Ya̧tȩrö̧'i̧nä̧ a̧'cua̧rö̧rö̧mä̧ ku̧ni̧po̧cö̧ pi̧nö̧. Ja̧hua̧nö̧tä̧ jȩpi̧nö̧ Maceda ru̧hua̧rö̧mä̧, Jerico ru̧hua̧rö̧ jȩi̧nö̧ta̧'a̧nö̧ ²⁹ Josue'inä o'catoi'önä Israel ttö̧ja̧'i̧nä̧ Macedattö Libnara̧'a̧ 'cuä'o'inätö. Ja̧u̧mä̧ Libnara'a rohuähuö 'chi̧nö̧. ³⁰ Tö̧ä̧nä̧hua̧ Diosmä Israel ttö̧ja̧ ttu̧mu̧nä̧tä̧ iyipinö, Libna ötahuiyä'inä,ru̧hua̧rö̧'i̧nä̧. Josuemä o'catoi'önä̧ ju̧huȩnȩ ka̧cuä̧tö̧rö̧mä̧ cuä'ö icuinö curä'chunä. Ya̧tȩ'i̧nä̧ ki̧'i̧po̧cö̧ pi̧nä̧ a̧'cua̧rö̧mä̧. Ja̧hua̧nö̧tä̧ jȩpi̧nö̧ Libna ru̧hua̧rö̧mä̧ Jerico ru̧hua̧rö̧ jȩi̧nö̧ta̧'a̧nö̧. ³¹ Ja̧u̧nö̧ o'ca'a Josuemä ja̧hua̧ta̧'a̧nö̧ o'catoi'önä Israel ttö̧ja̧'i̧nä̧ 'cuä'opinä̧tö̧ Libnattö Laquisra'acu. ju̧huȩnȩtä̧ kä̧nö̧ rohuähuinätö jahuätörömä. ³² Ja̧hua̧ta̧'a̧nö̧ Tö̧ä̧nä̧hua̧ Diosmä Israel ttö̧ja̧ ttu̧mu̧nä̧tä̧ iyipinö Laquis ttö̧ja̧rö̧mä̧. Josuemä 'chu'ädinö todäre mo̧ro̧ päi'omȩnä̧. O'catoi'önä ju̧huȩnȩ ka̧cuä̧tö̧rö̧mä̧ cuä'ähuö icuinö curä'chunä ya̧tȩ'i̧nä̧ ki̧'i̧po̧cö̧ pi̧nö̧ a̧'cua̧rö̧mä̧ äjicuäcuähuotöttö'inä,Libnanä ki̧nä̧tö̧rö̧ jȩi̧nö̧ ta̧'a̧nö̧ ³³ Ja̧u̧nö̧ o'ca'a Horam,Gezer ru̧hua̧mä̧,ichinö Laquis ttö̧ja̧rö̧ ppäda pä'ö. Josuemä ja̧u̧ru̧ rohuähuinö ja̧hua̧ta̧'a̧nö̧ u̧mö̧huäyotö su̧ro̧da̧u̧ru̧'i̧nä̧ ya̧tȩ'i̧nä̧ a̧'cua̧rö̧mä̧ ki̧'o̧cö̧ pi̧nö̧. ³⁴ Ja̧u̧nö̧ o'ca'a Josuemä ja̧hua̧ta̧'a̧nö̧ o'catoi'önä Israel ttö̧ja̧'i̧nä̧ 'cuä'opinätö Laquisttö Eglonra̧'a̧ .Ju̧huä̧nȩtä̧ kä̧nö̧ rohuähuinätö jahuätörömä, ³⁵ ja̧hua̧ta̧'a̧nö̧ ja̧u̧nö̧tä̧ mo̧ro̧ 'chu̧'ä̧di̧nä̧tö̧ ja̧u̧ ötahuiyämä. Ja̧hua̧nö̧tä̧ jȩpö̧ curä'chunä cuä'ähuö icu si'epö icuinätö o'catoi'önärö, Josue Laquis ötahuiyänä ki̧nä̧tö̧rö̧ jȩi̧nö̧ta̧'a̧nö̧. ³⁶ Ja̧u̧nö̧ o'ca'a Josuemä o'catoi'önä Israel ttö̧ja̧'i̧nä̧ 'cuä'opi̧nä̧tö̧ Eglonttö Hebronra̧'a̧. Ju̧huȩnȩtä̧ kä̧nö̧ curä rohuähuinätö jahuatörömä. ³⁷ O'catoi'önä̧rö̧ curä'chunä cuäcuäpö icu ttu̧ru̧hua̧cu̧tä̧ cuä'ö tti̧cui̧nä̧u̧ ja̧hua̧ta̧'a̧nö̧ ttö̧jo̧mȩ jäyänä ka̧cuä̧tö̧rö̧'i̧nä̧ o'catoi'önärötä cuä'ähuö icuinätö. Ju̧huȩnȩ ka̧cuä̧tö̧rö̧mä̧ o'catoi'närötä ya̧tȩ'i̧nä̧ ö̧ji̧pö̧ jui̧yö̧nä̧tä̧ ttä̧ji̧mö̧ttö̧'i̧nä̧, cuä'ö icuinätö ya̧tȩrö̧'i̧nä̧ a̧'cua̧rö̧rö̧mä̧ ku̧ni̧cuä̧ juiyönätä,Josue Eglon ttö̧ja̧rö̧ jȩi̧nö̧ ta̧'a̧nö̧tä̧. ³⁸ Ja̧u̧nu̧ o'ca'a Josuemä ppa̧'ä̧chi̧nö̧, o'catoi'nä u̧mu̧huä̧yotö su̧ro̧da̧u̧ Israel ttö̧ja̧cu̧,Debirnä 'cuä'opinätö juhuorömä jahuätörö rohuähuinätö. ³⁹ Ja̧u̧mä̧ 'chu̧'ä̧di̧nö̧ jahuätörö ttu̧ru̧hua̧cu̧tä̧,ja̧hua̧ta̧'a̧nö̧ o'catoi'önä ju̧huȩnȩ jäyänä ka̧cuä̧tö̧rö̧'i̧nä̧. Curä'chunä cuäcuäpö tticuinäu̧ ja̧hua̧ta̧'a̧nö̧ o'catoi'önärötä cuä'ähuö icuinätö ttä̧ji̧mö̧ttö̧'i̧nä̧ ya̧tȩ'i̧nä̧ a̧'cua̧rö̧mä̧ ö̧ji̧pö̧ jui̧yö̧nä̧tä̧ .Hebron ötahuiyä'inä , ru̧hua̧rö̧'i̧nä̧ , jȩi̧nö̧ta̧'a̧nö̧, ja̧hua̧ta̧'a̧nö̧ jȩpi̧nö̧ Libna ötahuiyä'inä, ru̧hua̧rö̧'i̧nä̧. ⁴⁰ Josuemä o'cajuiyönä rȩjȩ, Neguev'inä̧ ,Mö̧ä'quiyu'inä, mȩjȩ'quiyu'inä, pämäroppiyä'inä, 'cho'ipinö. O'catoiönä ruhuotörö'inä, cuä'ö icuinö ya̧tȩ'i̧nä̧ ö̧ji̧pi̧yö̧nä̧tä̧ a̧'cua̧rö̧mä̧, Israel ttö̧ja̧ Ttu̧ru̧hua̧ Ttö̧ä̧nä̧hua̧ Dios hueinö ta̧'a̧nö̧. ⁴¹ Josuemä cuä'ö icuinö curä'chunä Cades Berneattö̧ kä̧mä̧dö̧ Gaza jubö ja̧hua̧nö̧ ja̧'a̧nä̧i̧nä̧ Gozen rȩjȩttö̧ kä̧mä̧dö̧ Gabaon jubö cä'ädö. ⁴² Josuemä̧ 'chu'ädinö o'catoi'önä ruhuotörö'inä ja̧hua̧ta̧'a̧nö̧ tti̧rȩji̧yä̧'i̧nä̧ ya'utecutä huȩnȩ juiyönä Israel ttö̧ja̧ Ttu̧ru̧hua̧, Ttö̧ä̧nä̧hua̧ Dios,Israel ttö̧ja̧rö̧ ppä'ädö örohuähua'attö. ⁴³ Ja̧u̧nö̧ o'ca'a Josuemä,o'catoi'önä Israel ttö̧ja̧'i̧nä̧ ppa̧'ä̧chi̧nä̧tö̧ ttä'ähuarä Gilgalra'a.