¹ O'catoi'önä ruhuotö Jordan aje tö'cö kä̧cuä̧tö̧mä̧ mö'ä'quiyunä kä̧tö̧'i̧nä̧,aje röoto Mediterraneo jäyotonä ka̧cua̧tö̧'i̧nä, Libanora'a̧'cu̧ kä̧tö, Hitita'i̧nä, Amorreo'i̧nä, cananeo'i̧nä, Ferezeo'i̧nä, Heveo'i̧nä ja̧hua̧ta'anö Jebuseo ttö̧ja̧'i̧nä, ² ji̧nä yo̧mȩtȩ ca̧ca̧cui̧nä̧tö̧ curä ttörohuähua pä'ö Josuerö'inä,Israel ttö̧jä̧rö̧'i̧nä̧. ³ Ja̧hua̧ta̧'a̧nö̧ Gabaon ttö̧ja̧mä̧ Jerico ttö̧ja̧rö̧'i̧nä̧,Hai ttö̧ja̧rö̧'i̧nä̧ Josue jȩä̧ji̧ ttä̧ju̧cuo̧mȩnä̧. ⁴ Jahuätömä huo̧juȩcu̧nä̧tä̧ amöcuädinätö jȩttä̧cuä̧mä̧,huȩnȩ ȩcuä̧ ttö̧ja̧ jä̧'i̧nö̧'a̧nö̧ jȩpi̧nä̧tö̧.jahuätömä 'ca̧tä̧hui̧nä̧tö̧ pö̧jä̧ti̧yu̧ täbo jähuä,ttudutä oyu'i̧nä̧ täbo jähuä ja̧u̧ oyumä Mö̧rö̧tö̧nä̧ cä'epö huä̧ni̧nä̧tö̧. Ja̧hua̧ta̧'a̧nö̧ vino 'carähuä o'pi'inä täbo jähuä,surojuächinö, 'tö̧'tö̧pö̧'i̧nä̧,'tö̧'tö̧ä̧cuä̧huä̧. ⁵ ttö̧jȩpö̧ isäya'inä täbo jähuä 'tö̧'tö̧pö̧'i̧nä̧ dea'anä 'tö̧'tö̧ä̧cuä̧hua̧'a̧, ttö̧'cä̧tä̧huä̧ta̧'i̧nä̧ täbö jähuä o'pi 'ca̧tä̧hui̧nä̧tö̧. O'cajuiyönä ttu̧cuä̧mä̧ joäcä juhuächinö̧tä̧,tȩmö̧chächinö̧tä̧ ȩpi̧nä̧tö̧. ⁶ jahuätömä 'chinä̧tö̧ Josue ä'ähuarä Gilganä ja̧u̧ru̧'inä,israel ttö̧jä̧rö̧ 'i̧nä̧ pä'inätö:" ujutumä otottö ichäjätöjä,ucutucu iso päi'önä jȩpö̧ tö̧jä̧cuä̧ huȩnȩ ucuocu." ⁷ Israel ttö̧jä̧mä̧ pä'inätö Hitita ttö̧jä̧rö̧:"Ucutumä ujutu tö̧jö̧mȩ tö'cö kä̧tö̧jä̧ 'co̧ka̧'a̧. ¿däje jepö̧ tö̧jä̧ pä'ö päcuätucuäjä̧ttö̧ ucutumä? ⁸ jahuätömä ädätinätö Josuerö:" ujutumä ucu cumöhuäyotöjä ." Josue jäepinäu̧:" ¿titö sotö cuätucua'atö ucutumä? ¿tottö cuichätucuätö?" ⁹ Jahuätömä ädätinätö:" Ucu cumöhuäyotö ujutumä juiyo otottö ichäjätöjä pi̧nȩ jubö päti'a pä'ömä,Cuä̧nä̧hua̧ Diosrö teseta pä'ö. Ujutumä ä̧ju̧cui̧nä̧tö̧jä̧ ja̧u̧ ötä'cö o'cajuiyönä Egipto rȩjȩra̧'a̧ttö̧ jȩi̧nö̧mä̧ ¹⁰ ;Ja̧hua̧ta̧'a̧nö̧ o'cajuiyönä ta̧ju̧ ruhuotorö Amorreos ttö̧ja̧ tturuhuotörö Jordan aje ya̧nä̧ ji̧jä̧ttö̧ jȩi̧nö̧mä̧,Sehon ru̧hua̧rö̧'i̧nä̧,Hesbon ru̧hua̧rö̧'i̧nä̧,ja̧hua̧ta̧'a̧nö̧ Ogrö'inä ,Basan ru̧hua̧'i̧nä̧,Astarolnä ki̧nä̧tö̧mä̧ ¹¹ Tä̧mö̧ Sotö'inä ja̧hua̧ta̧'a̧nö̧ o'catoi'önä ötähuiyä ttö̧ja̧'i̧nä̧ pättinä̧u̧jä̧ :"Ȩpö̧ tätucui cucuätucuä̧cuä̧mä̧ mä̧nä̧nä̧ 'chä̧nö̧. Ji̧nä̧ yo̧mȩtȩ pä'i'ö jahuätörö ucuocu päcuätucua:"Ujutumä ucutä cumöhuäyotöjä ja̧hua̧nö̧ ja̧'a̧ttö̧ ujuturu jȩcu̧'ä̧cuä̧mä̧ i̧so päi'önä pä'i." ¹² piyȩ ujutu tu̧cuä̧ panmä,jinä du'huina'a tojusodettö pocu rätopinömä. Jahuanö ja'anä, jitämä topi, 'quiyäbi jo̧nä̧tä̧ juhuächina'a, temöchötä temöchächina'a. ¹³ pi̧yȩ o̧'pi vino 'carähuä o'pimä jareina'a ä̧cuo̧mȩnä̧ tö'carinömä,jitämä topi serächächina'a. ujutu tö'ca̧tä̧huä̧'i̧nä̧, tö̧jä̧pö̧ isäya'inä beichina'a otottö ticha'attö." ¹⁴ Israel ttö̧ja̧mä̧ ji̧yȩcu̧ pö̧nä̧ ȩmi̧nä̧tö̧ ttu̧cuä̧ tti'cächäjittömä, ja̧hua̧nö̧ ja̧'a̧nä̧ Israel ttö̧ja̧mä̧ Tö̧ä̧nä̧hua̧ Diosrömä jä'epocotö pinätö. ¹⁵ Josuemä curä juiyönä ttö̧ja̧ pä'ö jȩpi̧nö̧ jahuätucumä, jahuätucu pättähuäji ta̧'a̧nö̧, cuä'ö tticu juiya pä'ö. Israel tto̧ja̧ttö̧ ruhuotö'inä ja̧hua̧nö̧tä̧ pä'inätö . ¹⁶ Huäbodäcuä mo̧ro̧ 'cuäopäji o'ca'a huȩnȩ juiyönä ttö̧jä̧cua̧'a̧ pä'ö pättähua'attömä , Israel ttö̧ja̧mä̧ huo̧juä̧ chi̧'i̧nä̧tö̧ tö̧jo̧mȩ tö'cö kä̧tö̧ ja̧'a̧ pä'ö. Ja̧hua̧nö̧ ja̧'a̧ Israel ttö̧ja̧mä̧ huäbodäcuä mo̧ro̧ päi'omenä. ¹⁷ Israel ttö̧ja̧mä̧ 'chi̧nä̧tö̧ ttöäre ötahuiyä jö̧ o̧dö̧nä̧ Gabaonra̧'a̧ i̧nä̧,Cafira ra'a'inä,Beerot ra'a'inä, ja̧hua̧ta̧'nö̧ Quiriat Jearim ra'a'i̧nä̧. ¹⁸ Israel ttö̧ja̧mä̧ cuä'ö icuocotö pinätö tturuhuotö jitöcu pä'ähuö ttu̧ju̧na̧'a̧ttö̧ TTu̧ru̧hua̧ ,Dios ä'ca jo̧mȩttö̧ .Ja̧hua̧nö̧ ji̧yä̧u̧ o̧'catoi'önä Israel ttö̧ja̧mä̧ huopäcuähuinätö tturuhuotörömä. ¹⁹ Ja̧hua̧nö̧ ja̧'a̧nä̧ Israel ttö̧ja̧ tturuhuotömä ädätö pä'inatö :"Dios ä'ca jo̧mȩttö̧ cuä'ö ticuiyäcuotö pä'inätöjä jahuätörömä,ja̧hua̧nö̧ ja̧'a̧ttö̧ cuä'ö ticu juiyö'anö ja̧'a̧. ²⁰ Pi̧yȩtä̧ ja̧'a̧ jahuätöcu tö̧ja̧ pä'ö pä̧huä̧ rö̧jö̧mä̧:Tu̧ru̧hua̧ Diosttö ro̧ȩcuä̧ tȩma̧'a̧cu̧ cua'ö ticuiyäcuotöjä pätina̧'a̧ttö̧,ja̧'a̧tä̧ topätöjä ttö̧ja̧'a̧nä̧. ²¹ Tturuhuotömä pä'inätö ttumöhuäyotö Israel ttö̧ja̧rö̧:"Ja̧'a̧tä̧ totätucuatö ttö̧ja̧'a̧nä̧."Ja̧hua̧nö̧ ja̧'a̧ttö̧ Gabaonitas ttö̧ja̧ma̧ mi̧ bähuä ttö̧ja̧ päi'önä'inä,ajiya huähuä ttö̧ja̧ jö̧nä̧'i̧nä̧ ka̧cui̧nä̧tö̧ o'catoi'önä Israel ttö̧ja̧,ttumuhuäyotö jö̧nä̧ tturuhuotö pättähuäjita'anö. ²² Josue huopo'ö pä̧i̧nä̧u̧: ¿Tta̧'a̧nö̧ pä̧'ö̧ yapare pättajättö ujuturumä: Ujutumä otottö ichäjätöjä pätta'amä porömä tö'cö kä̧tö̧ ja̧'a̧mä̧.? ²³ Jitämä ja̧hua̧nö̧ ja̧'a̧ttö̧ surojö 'cuäopäcuotöjä ucutumä ucututtu recuätömä huȩttä̧rä̧u̧tä̧ cu̧jä̧cuo̧tö̧jä̧, ucutu mi̧ bähuä ttö̧ja̧'i̧nä̧ ,ajiya huähuä ttö̧ja̧'i̧nä̧ cuȩpä̧cuo̧tö̧jä̧ ttö Chu̧ru̧hua̧ Dios ojusodera'a . ²⁴ Jahuätömä ädätö pä'inätö Josuerö:"Cu̧ru̧hua̧tu̧cu̧ Diosmä,umöhuäyotörö'i̧nä̧ u̧mö̧huä̧ya̧ Moisesrö'inä iyinö pi̧jä̧ rȩjȩ jä̧ttä̧yä̧jä̧tä̧,ja̧hua̧ta̧'a̧nö̧ ja̧huä̧jä̧nä̧ kä̧tö̧rö̧mä̧ cuä'ö tticua pä'ö'inä hue'inö, ja̧hua̧nö̧ ja̧'a̧ttö̧ ujuturu cuä'ö cuicua'acu pä'ö ye'ecu yapare pä'inätöjä. Ja̧hua̧nö̧ ja̧'a̧ttö̧ pä'inätöjä ja̧hua̧nö̧mä̧. ²⁵ Jitämä, topitö ucu huecuomȩtä̧ kä̧tö̧jä̧. ucuru adiunä jo̧mȩnä̧ hue'itö ²⁶ ja̧hua̧nö̧ ja̧'a̧ttö̧ Josuemä jȩpi̧nö̧ jahuätörö: Israel ttö̧ja̧ huettö jȩä̧cuä̧huä̧ ttö̧ja̧ päi'önä jȩpö̧ ttö̧ja̧ pä'ö,ja̧hua̧nö̧ ja̧'a̧ttö̧ Israel ttö̧ja̧mä̧ cuä'ö icuocotö pi̧nä̧tö̧. ²⁷ Ja̧u̧no̧tä̧ mo̧ro̧ Josuemä jȩpi̧nö̧ Gabaonitas ttö̧ja̧rö̧mä̧ mi̧ bähuä ttö̧ja̧ pätti'önä̧'i̧nä̧ ja̧hua̧t'a̧nö̧ ajiya huä'ö adicuä ttö̧ja̧ pätti'önä̧'i̧nä̧ Israel ttö̧ja̧ ttahua pä'ö, ja̧hua̧'a̧nö̧ ja̧'a̧nä̧ Dios ö̧jo̧dera'a'inä ttȩpa̧ pä'ö jȩi̧nä̧u̧, jitä pi̧yȩ mo̧ro̧ jubö päi'önä,Dios päö o̧dö̧nä̧ tti̧'cho̧mȩ aditö ttö̧ja̧ pä'ö