¹ TÖ̧Ä̧NÄ̧HUA̧ Diosmä pa̧'a̧nö̧ pä'ö: 'Cä̧nä̧ri̧yu̧ adicuä ttö̧ja̧sa̧ ö̧jo̧mȩ 'chä̧nö̧ ji̧yu̧tȩ mitäji, ja̧u̧ o'comenä ötahuiyättö ucuo ttö̧ja̧rö̧'i̧nä̧, Dios päö huȩnȩ jiäcuähuä ttö̧ja̧rö̧'i̧nä̧. ² Ja̧u̧ o'comenä Ben Hinom pämäroppänä̧ täi, 'cä̧nä̧ri̧yu̧ dirächönä icuähuome, juorömä Ttö chi̧huȩnȩ jicuähuaja. ³ ¡Ä̧ju̧cuä̧tu̧cui̧ TÖ̧Ä̧NÄ̧HUA̧ i̧huȩnȩ Judáttö ruhuo hue'ätö Jerusalénnä ka̧cuä̧tö̧'i̧nä̧ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ Israel ttö̧ja̧ TTÖ̧Ä̧NÄ̧HUA̧MÄ̧ pa̧'a̧nö̧ pä'ö: "Topätucui, surojö 'cuäopa pä'ö chi'cächometä̧ päia'a, pi̧yȩ huȩnȩ ä̧ju̧cuä̧tö̧rö̧mä̧ surojö rȩbȩhuä̧cua̧'a̧. ⁴ Pi̧yȩmä̧ jȩchä̧cua̧sä̧ Ttörö icuipö ucuotäcuähuä juiyönä jȩtta̧'a̧ttö̧. Porömä korotö ttö̧ä̧nä̧huo̧tö̧rö̧tä̧ ttöäre iyähuä iyätö, juätömä tti̧ȩru̧huä̧u̧ru̧tä̧. Juätö'i̧nä̧, ttä̧do̧tö̧ mi̧nä̧'i̧nä̧, Judá rȩjȩttö̧ hueähuä ttö̧ja̧'i̧nä̧ surojö jui'ätö ttucuojattö riripätö juorömä. ⁵ Ju'tojumä aditätö Bbalrötä, juorömä tti̧tti̧mö̧rö̧ ku icu iyähuä Baalrö ttiya pä'ö, ja̧u̧mä̧ huedocö ji̧nö̧, a̧mö̧cuädö'i̧nä̧ cha̧mö̧cuädocö ji̧nö̧. ⁶ Ja̧'hua̧nö̧ ja̧'a̧ttö̧ pi̧yȩ 'cuäopä̧cuȩ mo̧ro̧mö̧ täcö icha'a, juä̧nȩmä̧ Tofet jö̧nä̧'i̧nä̧ Ben Hinom pämäroppä jö̧nä̧'i̧nä̧ pähuäcome jä̧cuo̧mȩ, ja̧'hua̧nö̧ ottajueimä pämäroppättö cuähuome pä'ötä ottäcuome. ⁷ Juorömä Judá ttö̧ja̧ jȩtta̧ pä'ö tta̧mö̧cuädinömä ja̧'hua̧ta̧nö̧ Jerusalén ttö̧ja̧mä̧ jȩttö̧ juiyäcuotö. Ttömä ttaboiyotöttö tottepönä jȩchä̧cua̧sä̧, juätötä ja̧'a̧ttö̧ tta̧'cua̧rö̧ usätumä. Ja̧u̧nu̧ o'comenä tto'co jähuämä ju'tojunä co̧'ä̧rä̧tö̧tä̧, de'a isotötä ttucua pä'ö chi̧yä̧cua̧sä̧. ⁸ Pi̧yȩ o'comenämä ja̧u̧ ötahuiyämä toepächönä jȩchä̧cua̧sä̧, korojueinä ppötta'a jä̧'i̧nö̧'a̧nö̧ rä̧mi̧pö̧nä̧tä̧, o'catoi'önä juȩnȩnä̧ 'cuä'opätömä tta̧'cua̧tta̧nö̧ totta'anä, toeinö topömä ya̧ttä̧huȩ'ä̧cuo̧tö̧. ⁹ Ttömä ttötahuiyä sobucuächönä̧ tta̧ttä̧rö̧nä̧ chu̧ju̧nä̧cua̧sä̧ ttaboiyotörömä. Juätö jacuä ka̧cuä̧tö̧mä̧ ttucua ppäittö huopömä tta̧mö̧nä̧ tti̧tti̧mö̧ u̧mä̧tö̧rö̧'i̧nä̧ nä̧tö̧rö̧'i̧nä̧ ttidepä ttucuäcuotö ja̧'hua̧ta̧'a̧nö̧ ttippeyänä ka̧cuä̧tö̧rö̧'i̧nä̧ ttucuäcuotö." ¹⁰ Ja̧u̧nu̧ o'comenämä ucucu u̧mä̧tö̧ 'chä̧jä̧tö̧ ttä'ca jo̧mȩttö̧ 'cä̧nä̧ri̧yu̧ di'ö cuicuaja. ¹¹ Juätörömä jicuähuaja: TÖ̧Ä̧NÄ̧HUA̧ o'cajuiyönä ju̧ru̧hua̧mä̧ pa̧'a̧nö̧ pä'ö: Pa̧'a̧nö̧ jö̧nä̧tä̧ jȩchä̧cua̧sä̧ pitö ttö̧ja̧rö̧mä̧, Jeremías 'cä̧nä̧ri̧yu̧ di'ö icuäji'anötä̧ jȩchä̧cua̧sä̧ pitö ttö̧ja̧rö̧mä̧ pä'äjita'anötä̧ ttaditö juiyönä̧tä̧. Ttö̧ja̧ tto'co jähuämä Tofetnä 'turu tticuäcuotö 'turähuome'inä juiyönä̧tä̧. ¹² Pi̧yȩ ja̧'a̧ porö jȩchä̧cuȩmä̧ ja̧'hua̧ta̧nö̧ juȩnȩ ka̧cuä̧tö̧rö̧'i̧nä̧ Tofet ötahuiyä jȩchi̧nö̧'a̧nö̧tä̧ jȩchä̧cua̧sä̧ pä'ö TÖ̧Ä̧NÄ̧HUA̧MÄ̧. ¹³ Ja̧'hua̧nö̧tä̧ ki̧'ä̧cua̧'a̧ Jerusalén ötahuiyämä Judáttö hueähuä ruhuotö ttoju odehuiyä'i̧nä̧ Tofetnä jinöta'anö 'cuäopäcua'a esetocotö ttoju odehuiyä'i̧nä̧, juätömä mo̧ro̧jä̧ttö̧ si̧ri̧'cö̧rö̧'i̧nä̧ esetätö juätömä ttahuiyä riripö ttöäre iyähuä iyätö korotö ttö̧ä̧nä̧huo̧tö̧rö̧mä̧." ¹⁴ Ja̧u̧nu̧ o'comenä Jeremíasmä Tofetra̧'a̧cu̧ ppa̧'ä̧chi̧nö̧ TÖ̧Ä̧NÄ̧HUA̧ hueäjita'anö̧tä̧, juhua'attö TTÖ̧Ä̧NÄ̧HUA̧ ojusode pä̧tȩcuä̧nö̧ kä̧mä̧dö̧ Dios päji huȩnȩ ttö̧ja̧rö̧ ji'ähuinö. ¹⁵ Israel TTÖ̧Ä̧NÄ̧HUA̧ Dios ju̧ru̧hua̧mä̧ pa̧'a̧nö̧ pä'ö, topätucuihuä surojö 'cuäopa pä'ö chi'cächometä̧ päia'a pi̧yȩ ötahuiyä ttö̧ja̧rö̧mä̧, Ttö jidäu huȩnȩ ttesetoca'attö̧ ja̧u̧ jidäu ttä̧ju̧cua̧ pä'ömä juiyo 'qui'ätö.