¹ Ucumä juiyo a̧di̧hua̧jä̧ TÖ̧Ä̧NÄ̧HUA̧, ja̧'hua̧nö̧ ja̧'a̧ttö̧ pi̧yȩ huȩnȩ jädepäcujä jueönä jicuähuattö pä'ö, ¿Tta̧'a̧nö̧ pä'ö suronä jȩä̧cuä̧huä̧ ttö̧ja̧mä̧ tta̧mö̧cuädäjimä isojuo'epätöttö? ¿Tta̧'a̧nö̧ pä'ö jȩttö̧ jäyä huotömä huȩnȩ juiyönä̧ kä̧tö̧jä̧ttö̧? ² Ucumä ku̧nä̧huä̧ i̧sa̧jä̧, ja̧u̧mä̧ ihuehui appiyä räreina'a. Juäimä buo juoomenä u̧huä̧ju̧ huȩjäi. Ucumä juäi ättömä tö'cö cu̧ja̧'a̧nä̧, cua̧mi̧so'quittömä oto ku̧jä̧. ³ TÖ̧Ä̧NÄ̧HUA̧ ucumä ttörö huo̧jua̧jä̧. Ucumä to'cuäcusä ja̧'hua̧ta̧nö̧ chamiso'quimä ucumä ka̧cuä̧mö̧ to'cuäcusä. ¡Ovejastö̧rö̧ cuä'ö icuähuomecu̧ ȩpä̧tu̧cui̧tö̧, ja̧'hua̧ta̧nö̧ cuä'ö tticuäcuȩ mo̧ro̧ 'cä̧'ȩpö̧ ku̧ni̧tö̧! ⁴ ¿Pi̧jä̧mä̧ ti̧yȩnö̧ jubö joupächäcua'attö̧, o'cajuiyönä meje'canä ka̧cu̧ ojiya joia'a pä'ömä̧? De'a ka̧cuä̧tö̧'i̧nä̧, ppi̧yu̧'i̧nä̧ 'corujuottächäcuotö pi̧jä̧ ttö̧ja̧ suronä jȩtta̧'a̧ttö̧ ja̧'hua̧nö̧ jo̧mȩnä̧mä̧ pättäcuotö: Diosmä ujuturu 'cuä̧o̧pö̧cuȩmä̧ jȩru̧pa̧." ⁵ TÖ̧Ä̧NÄ̧HUA̧MÄ̧ pä'ö: isopäi'önä̧tä̧, ucu Jeremíasmä cu̧jä̧pö̧nä̧tä̧ su̧ro̧da̧u̧cu̧ jopä'ijujä ja̧'hua̧nö̧ jo̧mȩnä̧ juätömä 'cuäcuächi'önä jȩttä̧'i̧jä̧cu̧jä̧, ¿Tocu jo'cua'anö̧ttö̧ caballotö̧cu̧ yoräteunä̧mä̧? mȩjȩ'ca jo̧mȩ ma̧cuä̧mö̧ttö̧mä̧, ¿tocu jȩ'cu̧'a̧nö̧ttö̧ isä'cua Jordán aje otoächi'otonä kä'cuattömä̧? ⁶ Isopäi'önä̧tä̧ ucu cuahuaruhuä'i̧nä̧ ja̧'hua̧ta̧nö̧ cuä'o ahuarunuä'i̧nä̧ ucurumä suronä̧tä̧ ucuocuä'chätö ja̧'hua̧ta̧nö̧ pä̧i̧cu̧nä̧ rä̧mi̧pö̧nä̧ ja̧u̧ jȩpi̧nö̧ pättinä̧cu̧jä̧. Jahuätörömä cua̧'cua̧ cu̧huȩnä̧rä̧ adiuhuäi ttucuocua'anä̧. ⁷ Ttömä chojusode'i̧nä̧ icuipinö̧sä̧; chiäre ttörö iyähui'a pä'ö ji̧nö̧'i̧nä̧ jaropi'inö̧sä̧. Chahuaruhuä rȩpȩdä̧u̧rö̧ ja̧'a̧nä̧ chaboiyotö ttu̧mö̧nä̧ iyinö̧sä̧. ⁸ Ttörö iyähui'inö ji̧nö̧mä̧ pärohuächina'a ttörömä mö yahui isä'cua jacuä kö̧ jä̧'i̧nö̧'a̧nö̧tä̧; ja̧u̧ jueimä ttörömä chutä a̧mö̧nä̧ pa̧ja̧tö̧ i̧huȩnȩnä̧tä̧ to'ija̧'a̧cu̧ ku̧nä̧cuä̧hua̧'a̧ ja̧'hua̧nö̧ jo̧mȩttö̧ Ttömä kö'cocösä. ⁹ ¿Ttö 'quȩ'ȩpö̧ chȩmi̧nö̧mä̧ ppiyuhuä huȩyu̧sa̧ hua̧ jä̧'i̧nö̧'a̧nö̧ huocotö, korotö ppi̧yu̧ tidepä ku̧nä̧rä̧tö̧mä̧ ttö̧jo̧mȩ jäyänä o'cajuiyönä̧tä̧ sobutocotö? Ja̧'hua̧nö̧ jö̧ttö̧mä̧ o'catoi'önä de'a isotörö ca̧ca̧tä̧ji̧, ja̧'hua̧nö̧ ca̧ca̧ti̧'ö̧ sesepö tticuatö ȩpi̧tö̧. ¹⁰ Recuätö tta̧huä̧rä̧cuä̧huä̧ ttö̧ja̧mä̧, chi'ätta uva pätta si'epö icuätö, chi̧rȩjä̧ ji̧'qui̧cha̧nö̧ chȩmi̧no̧mȩmä̧ 'cuȩcu̧ icuätö, a̧'cua̧cu̧nä̧ to'opö chȩmi̧no̧mȩmä̧ juätömä i̧sa̧ppȩtä̧ päi'önä jȩpö̧ icuinä̧tö̧. ¹¹ Juätömä jȩpö̧ icuinä̧tö̧. Ttömä rȩrö̧jö̧nö̧ tochö'anö̧ ja̧'a̧ juä̧jä̧ toönä̧tä̧ ku̧ni̧cuä̧jä̧mä̧. Rȩjȩmä̧ o'cajuiyönä̧tä̧ tticuipinä̧jä̧, ya̧tȩ'i̧nä̧ rȩrä̧jä̧nä̧ topömä toa'attö̧. ¹² O'ca juiyönä de'a jui̧yä̧jä̧nä̧mä̧ si'epö icuähuä ttö̧ja̧mä̧ ichätö. Tocu pä'ö TÖ̧Ä̧NÄ̧HUA̧ ucururä'chunä o'cajuiyönä jȩpö̧ i̧cuä̧cua̧, ka̧ra̧rö̧'i̧nä̧ ka̧ra̧rö̧'i̧nä̧ ya̧tȩ'i̧nä̧ a̧'cua̧rö̧mä̧ pi̧jä̧ttö̧ u̧ji̧po̧mȩmä̧ juiyäcua'a. ¹³ Juätömä trigo ttu̧ju̧na̧'a̧nä̧ so̧ä̧'cuatä tte'täcuotö, juätö juruhuächi'ö ttadita'anä isä'cua soä'cuatä ttȩmä̧cuo̧tö̧. Juätömä aditö 'cuä'ächächätö, ja̧'hua̧nö̧ jo̧mȩnä̧ ji̧yȩ'i̧nä̧ ȩmo̧co̧tö̧. Ja̧'hua̧nö̧ ja̧'a̧ttö̧ dä'ä ttu'ätucui cuȩma̧ päcuä'ijätucumä TÖ̧Ä̧NÄ̧HUA̧ u̧ra̧huä̧rö̧ jähuänä." ¹⁴ Pa̧'a̧nö̧ pä'ö TÖ̧Ä̧NÄ̧HUA̧MÄ̧, ttö̧jo̧mȩ tö'cönä̧nö̧ ka̧cuä̧tö̧rö̧mä̧, ttö chu̧mö̧ jähuä Israel ttö̧ja̧rö̧ chiyinö rohuäu ttȩmi̧pö̧ttö̧mä̧: Topätucuittö, Ttötä ja̧'a̧ tti̧rȩjä̧ttö̧ ȩmö̧ chi̧cuä̧cua̧mä̧, Ttömä ttä'ca jo̧mȩttö̧ Judá ahuaruhuä 'cotörö ȩmö̧ chi̧chä̧cua̧sä̧. ¹⁵ Juätörö ȩmö̧ chicu o'ca'amä, pä'äjita'anö rȩrö̧jö̧nö̧ topö ppa̧dä̧dä̧cua̧sä̧, pä'äjita'anö tti̧rȩji̧yä̧ pönä chiyinö ji̧nö̧mä̧ ya̧cu̧nä̧rö̧ tti̧rȩji̧yä̧'i̧nä̧ chi̧yä̧cua̧sä̧. ¹⁶ Pitö ttö̧ja̧mä̧ ttu̧huȩcuä̧nä̧ ttu̧huo̧jui̧'ä̧cuo̧tö̧ chu̧mö̧huäyotucu ji̧nä̧ yo̧mȩtȩ pä'i'ötä, chi̧mi̧nä̧'i̧nä̧ huȩnȩtö̧ pättäcuotö pä'ösä ttömä, isopäi'önä̧tä̧ TÖ̧Ä̧NÄ̧HUA̧MÄ̧ kö̧ ja̧'a̧ttö̧, ja̧'hua̧nö̧ chu̧mö̧huäyotörö baal i̧mi̧nä̧ huȩnȩtö̧ pättönä ttu̧huo̧juȩti̧nö̧ ji̧nö̧ta'anö, ja̧'hua̧nö̧ jo̧mȩnä̧ juätö chu̧mö̧huäyotö ttö̧ja̧cuo̧mȩttö̧ ttä̧rä̧mi̧'ä̧cuo̧tö̧. ¹⁷ Ja̧'hua̧nö̧ jicuähua'anä ttä̧ju̧cuo̧ca̧'a̧ jö̧ttö̧mä̧, Ttömä si̧'ȩpö̧tä̧ö̧ ti̧cuä̧cuo̧tö̧. Isopäi'önä̧tä̧ que'opö icu si'epö chicuäcuotö, pä'ötó TÖ̧Ä̧NÄ̧HUA̧MÄ̧.