^{4 5 6} Ja̧'hua̧nö̧ ja̧'a̧ttö̧ mö̧ yähui cuä'ö i̧cuä̧cua̧. De'a jui̧yä̧ra̧'a̧ttö̧ böo ähuiri'i̧nä̧, tu̧'a̧ yähui'i̧nä̧, ötahuiyära̧'a̧ rȩbȩu̧ jȩpö̧tticuäcuotö umicu̧ rä'opätörö'i̧nä̧ sesepö tticuäcuotö. Tocu pä'ö suronä̧ jȩttö̧ rö̧ä̧cha̧'a̧ttö̧, jȩttö̧mä̧ abora̧'a̧ päi'önätä̧ 'cuäoia'a. ⁷ ¿Tocu pä'ö ja̧'a̧tä̧ tocha'anö jä̧ttö̧ pa̧'a̧nö̧ huotörömä̧? Tti̧tti̧mö̧mä̧ tticui pinä̧cu̧sä̧, ttö̧ä̧nä̧hua̧ huocotörötä jueönä ucuocuinä̧tä̧, chahuyaruhuärumä ttu̧cuä̧'i̧nä̧ adiunä̧ pätti'ome jubö chu̧cuä̧je'inäu, adihua'a pättä'ijueimä, ttirecua pocojuru jȩä̧cuä̧huä̧tä̧ jȩpi̧nä̧tö̧, kirecuo pocörö jȩä̧cuä̧huä̧ isaju kojusodenä̧tä̧ ca̧ca̧cuä̧ri̧nä̧tö̧. ⁸ Juätömä caballo u̧cuä̧ adiunä cuä̧jȩcua̧ jä̧'i̧nö̧'a̧nö̧huinä̧tö̧, tta̧hua̧ru̧hua̧ irecuarötä rä'opächö icuinä̧tö̧. ⁹ Ja̧'hua̧nö̧ ja̧'a̧ttö̧ ¿Ttömä ro̧dȩpö̧ juiyönä ja̧'a̧täji? Pa̧'a̧nö̧ pä'ö Ttu̧ru̧hua̧ Diosmä ¿Ötahuyiyä ja̧'hua̧nö̧ huotörömä ttömä ro̧dȩpö̧'a̧nö̧ hua̧sä̧ tä̧ji̧? ¹⁰ Uva pättara̧'a̧ 'chä̧nö̧ jȩpö̧ icuäjätucui o'cajuiyönä jȩpö̧ cuicuätucua'anä̧ koropönämä aditötä cu̧ju̧nä̧ti̧cuä̧, ja̧u̧ uva jähuämä Dios jähuämäcö̧. ¹¹ Israel ahuaruhuä 'cotö'i̧nä̧, Judá ahuaruhuä 'cotö'i̧nä̧ Ttörömä o'cajuiyönä suronä jȩpä̧tö̧ pä'ötó TÖ̧Ä̧NÄ̧HUA̧MÄ̧. ¹² Juätömä TTÖ̧Ä̧NÄ̧HUA̧RÖ̧ suronä̧ ucuocuinä̧tö̧ Diosmä toa'a, "Ja̧u̧mä̧ yorö'iso jȩpo̧cö̧ jä̧cua̧; yorö'iso surojömä rȩbȩu̧ juiyäcuotöjä̧ ja̧'hua̧ta̧nö̧ curä'i̧nä̧ topocotö täcuotötö̧jä̧cö̧, ppäi'i̧nä̧ ttu'ocotö täcuotöjä̧cö̧. ¹³ Dios i̧huȩnȩ jiäcuähuä ttö̧ja̧mä̧ isoppa 'cuäopa'a jä̧'i̧nö̧'a̧nö̧ huotö, Dios juätönä̧mä̧ ucuocuocö, ja̧'hua̧nö̧ ja̧'a̧ttö̧ jitötä pättä'ijömä jitörötä pähuäch'cua'a. ¹⁴ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ o'cajuiyönä ju̧ru̧hua̧mä̧ pi̧yȩ pä'ö: "Ucutumä pa̧'a̧nö̧ päcuätucua'attömä to'cuäcuotöjä, täcö ucu cuänä chi̧huȩnȩ chu̧ju̧no̧mȩtä̧ päia'a. ¡Ocurä jä̧'i̧nö̧'a̧nö̧ jä̧cua̧'a̧, ja̧'hua̧ta̧'a̧nö̧ juätö ttö̧ja̧mä̧ dauhuiyä jä̧'i̧nö̧'a̧nö̧ ttäcuotö! Ja̧'hua̧nö̧ jo̧mȩttö̧ cuo'ö tticuäcuotö. ¹⁵ ¡Topätucuihuä! Otottö koro ötahuiyä cuaboiyotö huotörö chi'cächometä̧ päia'a, Israel ttö̧ja̧, pä'ö TÖ̧Ä̧NÄ̧HUA̧MÄ̧. ¡Juätömä juruhuätö täbocutä ki̧nä̧tö̧! Juätö tti̧huȩnȩmä̧ jerupätöjä̧, ttucuocu'i̧nä̧ cuä̧ju̧cui̧yä̧cuo̧tö̧jä̧." ¹⁶ Ttu'cupa̧ri̧mä̧ juiyo juruhua'a, juätömä rohuäu'i̧nä̧ juruhuätö. ¹⁷ Ja̧'hua̧nö̧ ja̧'a̧ttö̧ cu̧ju̧nä̧huä̧mä̧ ttucui'äcuotö cui̧tti̧mö̧ u̧mä̧tö̧rö̧'i̧nä̧, nä̧tö̧rö̧'i̧nä̧ ja̧hua̧nö̧tä̧ jä̧cua̧'a̧, cuä̧ji̧mö̧tu̧cu̧ pä̧cä̧yu̧rö̧'i̧nä̧ ttucui'äcuotö, ja̧'hua̧ta̧nö̧ cu̧ju̧nä̧huä̧tu̧cu̧'i̧nä̧, uva'i̧nä̧ higo'i̧nä̧ ttucui'äcuotö. Cuidepiyutucu 'quiyönä adicuome'i̧nä̧ kä'ö tticuäcuotö, ucu cua̧'cua̧ cu̧huȩnä̧rä̧'i̧jo̧mȩmä̧. ¹⁸ Ja̧'hua̧nö̧ ja̧'a̧nä̧ ja̧u̧nu̧ mo̧ro̧mä̧, o'cajuiyönä̧mä̧ to'ädäji chicu jui̧yä̧cua̧sä̧ pä'ö TÖ̧Ä̧NÄ̧HUA̧MÄ̧. ¹⁹ Israel ttö̧ja̧'i̧nä̧, Judá'i̧nä̧ pättäcuotö: ¿Tocu pä'ö TÖ̧Ä̧NÄ̧HUA̧ Diosmä pi̧yȩ o'cajuiyönä 'cuäopönä jȩa̧'a̧ttö̧? Ja̧'hua̧nö̧ ja̧'a̧ Ucu Jeremías jahuätörö ji'ähui: Ucutu TÖ̧Ä̧NÄ̧HUA̧TÖ̧ 'cä̧cui̧pä̧chi̧nä̧tu̧cu̧ ta'anö ja̧'hua̧nö̧ jȩpö̧ ko̧ro̧jä̧ ttö̧ja̧ ttö̧ä̧nä̧huo̧tö̧rö̧tä̧ ucuo te'ähuinä̧tö̧jä̧, ja̧'hua̧nö̧ ji̧nö̧ta'anö cui̧rȩjä̧ jo̧co̧jä̧ttö̧mä̧ cui̧ȩru̧huä̧tu̧cuä̧u̧ huettötä jȩ'cuä̧cuo̧tö̧jä̧. ²⁰ Jacob ahuaruhuäruhuämä pi̧yȩ ji'ähui, Judá ttö̧ja̧rö̧'i̧nä̧ ttä̧ju̧cu̧nä̧. ²¹ Ucutu ttö̧ja̧ huo̧juȩcu̧nä̧ huocotö pi̧yȩ ä̧ju̧cuä̧tu̧cui̧ cui'äre cu̧ju̧nä̧rä̧tu̧cua̧'a̧nä̧ topcotöjä, cuä̧ja̧tu̧cu̧'i̧nä̧ cu̧ju̧nä̧rä̧tu̧cua̧'a̧nä̧ järiyähuätöjä. ²² ¿Ttörömä ucuotocotöjä̧ttö̧ ja̧'hua̧ta̧nö̧ chä'ca jo̧mȩttö̧mä̧ ttö̧'ä̧huo̧co̧tö̧jä̧ttö̧? pä'ö TÖ̧Ä̧NÄ̧HUA̧ Diosmä, aje dä'ähuoto jäyoto rȩba̧ tto'epö ku̧ni̧nö̧sä̧ cä'epo'ö i̧huä̧ji̧ mo̧ä̧cha̧'a̧ suronä̧mä̧ jȩo̧ca̧'a̧, ajemä pä̧i̧cu̧nä̧'i̧nä̧ dö'ö ppa̧huä̧chi̧'a̧'a̧nä̧'i̧nä̧ 'cuäoi'oca'a. ²³ Ja̧'hua̧nö̧ ja̧'a̧nä̧ pitö ttö̧ja̧mä̧ ttamiso'qui 'qui'ätö. Ttöttö tö'ipächömä suronä̧ jȩpä̧tö̧. ²⁴ Ja̧'hua̧nö̧ ja̧'a̧ juätö ttamiso'quittömä pä'ocotö. "Jitämä TÖ̧Ä̧NÄ̧HUA̧RÖ̧ ucuotönö ttö̧jä̧tu̧cua̧ Ja̧u̧tä̧ ja̧'a̧ ä'canä ajiya'i̧nä̧, röjinä isoya'i̧nä̧ hue'ömä, ujutu tu̧cuȩ cuähuä 'cuäopönä̧tä̧ iyepa pä'ö." ²⁵ Suronä jȩttö̧ micuämä adihuäjueimä ȩmo̧co̧tö̧. Suronä̧ jȩttö̧tä̧ 'cho̧i̧pä̧ra̧'a̧ttö̧. ²⁶ Ja̧'hua̧nö̧ ja̧'a̧ u̧mä̧tö̧ suropätö'i̧nä̧ ka̧cuä̧tö̧ chahuaruhuäcumä, ppiyuhuä 'chu̧ttä̧dä̧cua̧rö̧ topö ttu̧ju̧na̧'a̧ jä̧'i̧nö̧'a̧nö̧, i̧so̧ca̧nä̧ 'chu'ädö ku̧nä̧tö̧ ttö̧ja̧rö̧mä̧ ²⁷ Ppi̧yu̧rö̧ i̧so̧ca̧ suhuädi'önä ttu̧ju̧na̧'a̧ jä̧'i̧na̧'a̧nö̧, ttojusodettömä yapare jȩä̧cuä̧huä̧ttö̧ duhuädia'a, juätö böo juo'ö ruhuotö jö̧nä̧ juo'ätö. ²⁸ Juätömä bärepätötä jö̧nä̧ juo'ächinä̧tö̧; ttö̧jö̧mä̧ kä̧dȩpö̧nä̧ kä̧tö̧, surojö tto'epö ku̧nä̧huo̧mȩttö̧'i̧nä̧ abora̧'a̧ 'cuä'o'ätö, juätömä ttö̧ja̧rö̧'i̧nä̧ reyotörö'i̧nä̧ suronä 'cuäopömä, ppättäda pä'ocotö; juätömä usurä isotörö ppädoca'attö̧ jitötätä ruhuotö ja̧'a̧ttö̧, ²⁹ ¿Ttö ro̧dȩpö̧ juiyö'anö huotö tä̧ji̧ pa̧'a̧nö̧ jȩpä̧tö̧rö̧mä̧ pä'ö TÖ̧Ä̧NÄ̧HUA̧MÄ̧, ya'ute ötahuiyättö suronä jȩttä̧ji̧ micuämä ro̧dȩpö̧ juiyö'anö hua̧sä̧ tä̧ji̧? ³⁰ Ji̧yȩtȩ a̧huä̧pi̧ju̧ 'cuäopa'a pi̧jä̧ rȩjȩnä̧mä̧. ³¹ Dios päö huȩnȩ ji'ähuätöjä pä'ätömä yaparetä ji'ähuätö, sacerdote huotömä jitötä ttujurunä̧tä̧ hue'ätö, Ttö chahuaruhuämä. Pi̧yȩtä̧ repe'ätö ja̧'hua̧nö̧ ja̧'a̧nä̧ ¿Tocuqui̧ 'cuäopä̧cuä̧u̧ röjinä̧mä̧?