¹ Josía i̧tti̧, Joacím ä̧cuo̧mȩnä̧ hueinö pä̧nä̧mä̧ pa̧'a̧nö̧ TÖ̧Ä̧NÄ̧HUA̧ päö huȩnȩ rȩbȩhui̧na̧'a̧: ² TÖ̧Ä̧NÄ̧HUA̧MÄ̧ pi̧yȩ pä'ö: Ttö̧ chojusode ä'ca isaränä kä̧mä̧dö̧ o'catoi'önä Judá ttö̧ja̧ chojusodera̧'a̧ ucuo te'äu ichätörö ji'ähui. Jicuähuaja pä'ö huedinö jinömä ji'ähuitö. ¡Ji̧yȩtȩ'i̧nä̧ ki̧'ö̧ juiyönä̧! ³ Ttä̧ju̧cu̧ttö̧mä̧, yotucu pönä suronä̧ jȩttä̧'i̧jö̧ kättädi'äcua'anö̧, ja̧'hua̧nö̧ jo̧mȩnä̧ Ttö surojö 'cuäopatö pä'ö hueda pädäji 'cuäopö juiyönä̧ huedö juiyäcua'anö̧. ⁴ Ja̧'hua̧nö̧ ja̧'a̧ttö̧ ji'ähuitö: TÖ̧Ä̧NÄ̧HUA̧MÄ̧ pa̧'a̧nö̧ pä'ö: hueähuä huȩnȩ ucuturu chiyinö̧ päö'anö jȩ'cua̧ päcuätucuoca'a jö̧ttö̧mä̧- ⁵ chumöhuäyotö jittäu cuä̧ju̧cuä̧tu̧cuo̧ca̧'a̧ jö̧ttö̧mä̧, Dios päö huȩnȩ ji'ähuätörömä 'cuäopönä hueda'anä̧- ¡ucutumä ä̧ju̧cuo̧co̧tö̧ pä'ijätöjä̧! ⁶ Ja̧'hua̧nö̧ jö̧ttö̧mä̧ Silo ttö̧ja̧rö̧ jȩchi̧nö̧ ta'anö; pi̧yȩ ötahuiyämä o'catoi'önä ttö̧ja̧ to̧ttä̧ro̧mȩttö̧ surojutä juo'ächätö jö̧nä̧tä̧ ttäcuotö." ⁷ TÖ̧Ä̧NÄ̧HUA̧ ojusode ä'cattö Jeremías ucuocumä ä̧ju̧cui̧nä̧tö̧; sacerdote huotö'i̧nä̧, Dios päö huȩnȩ jiäcuähuä ttö̧ja̧'i̧nä̧. ⁸ Ja̧'hua̧nö̧ ja̧'a̧ Jeremías Dios päji huȩnȩ ucuocu cädomenä, sacerdote huotö'i̧nä̧, Dios päö huȩnȩ jiäcuähuä ttö̧ja̧'i̧nä̧, o'catoi'önä ötahuiyä ttö̧ja̧'i̧nä̧ 'chu'ädopo'ö pättinä̧cu̧: ¡Isopäi'önä ucumä hua'ötä cui̧cuä̧cua̧jä̧! ⁹ ¿Tta̧'a̧nö̧ pä'ö Jerusalén ötahuiyämä ttö̧ja̧ toomenä juoächöcua'a, pode TÖ̧Ä̧NÄ̧HUA̧ ojusode'i̧nä̧ juiyäcua'a pä'ö cucuocua'attö TÖ̧Ä̧NÄ̧HUA̧ i̧mi̧nä̧mä̧? pä'inätö̧ o'catoi'önä̧ juȩnȩ ka̧cuä̧tö̧mä̧ Jeremíasrömä ttöjö'cö juiyönä topinä̧tö̧. ¹⁰ Ja̧'hua̧nö̧ ja̧'a̧ Judásttö ucuo ttö̧ja̧mä̧ hueähuä ru̧hua̧ ojusodettö rä'opächö 'chi̧nä̧tö̧ Diosrö ucuocuäcuähuodera̧'a̧cu̧. Jua'attömä TÖ̧Ä̧NÄ̧HUA̧ ojusode äpate jareate ä'ca pȩjä̧mi̧nä̧tö̧. ¹¹ Ja̧'hua̧nö̧ ja̧'a̧ o'catoi'önä ötahuiyä ttö̧ja̧'i̧nä̧, sacerdotetö̧'i̧nä̧ ja̧'hua̧ta̧nö̧ Dios päö huȩnȩ ji'ähuätö'i̧nä̧, juätö ruhuotörö pä'inä̧tö̧: "¡Adihua'a pide huȩnȩ jui̧'a̧ 'corujuoächa pä'ömä, pi̧yȩ ötahuiyänä 'cuä̧o̧pä̧cuȩ ji'ähuäjirömä, adiu jȩpä̧tu̧cu̧ tta̧mö̧nä̧ ttä̧ja̧nä̧ ä̧ju̧cuä̧tu̧cu̧mä̧!" ¹² Ja̧'hua̧nö̧ ja̧'a̧ttö̧ Jeremíasmä o'catoi'önä ötahuiyä ttö̧ja̧rö̧'i̧nä̧, hueähuä ru̧hua̧ umöhuäyotörö'i̧nä̧ pä'inö: TÖ̧Ä̧NÄ̧HUA̧MÄ̧ pi̧yȩ ötahuiyä ötö'cö'i̧nä̧ 'cuä̧o̧pä̧cuȩmä̧ jidehuiyarö pä'ö hueinä̧cu̧sä̧, cuä̧ju̧cuä̧jä̧tu̧cu̧ huȩnȩmä̧ o'cajuiyönä jidähuiyarö pä'ötä. ¹³ Ja̧'hua̧nö̧ ja̧'a̧ ucuturu suronä 'cuäopäcua'a jidähuäji hueyecua pä'ömä, TÖ̧Ä̧NÄ̧HUA̧ i̧huȩnȩtä̧ ä̧ju̧cuä̧tu̧cui̧, jitätä suronä jȩpö̧ cu̧jä̧'i̧jä̧tu̧cu̧'i̧nä̧ icuipö adiu jähuätä jȩpö̧ kä̧tu̧cui̧ pä'inö. ¹⁴ Ttötä ja̧'a̧ - ¡Topätucuittö! cumötucunätä̧ kö̧sä̧, ucuturu adihuomenä̧tä̧ ja̧'hua̧ta̧nö̧ to'cuätucuomenä jueö jo̧mȩnä̧tä̧ jȩpä̧tu̧cui̧ttö̧. ¹⁵ Ja̧'hua̧nö̧ ja̧'a̧nä̧ ttörö cuä'ö cuicuätucuttömä, suronä jȩpo̧cö̧ ucuojatä cuamönä̧tu̧cu̧ tu'ecuätöjä ja̧'hua̧ta̧nö̧ pi̧yȩ ötahuiyänä ka̧cuä̧tö̧rö̧'i̧nä̧, isopäi'önä TÖ̧Ä̧NÄ̧HUA̧MÄ̧ hueinä̧cu̧sä̧ pi̧yȩ huȩnȩ cuä̧ju̧cuä̧tu̧cu̧nä̧ jidähuätucuacu pä'ö." ¹⁶ Ja̧'hua̧nö̧ ja̧'a̧ o'catoi'önä ru̧hua̧ umöhuäyotö'i̧nä̧, ötahuiyä ttö̧ja̧'i̧nä̧; sacerdote päi'önä huotörö juhua'atäcu Dios päö huȩnȩ ji'ähuätörö pä'inä̧tö̧: "Adihuoca'a pide 'corujuoacha pä'ömä̧, ja̧'hua̧nö̧ ja̧'a̧ ja̧u̧mä̧ o'cajuiyönä ujuturu 'cuä̧o̧pä̧cuȩ ucuocuäji TÖ̧Ä̧NÄ̧HUA̧ Dios i̧mi̧nä̧." ¹⁷ Ja̧hua̧nö̧ ja̧'a̧ juä̧jä̧ttö̧ tä̧mö̧ päi'önä huotömä ä̧rä̧mä̧cuä̧hui̧'ö̧ ttö̧ja̧ o'catoi'önä ttä'cattö ucuocuinä̧tö̧. ¹⁸ Jahuätömä pä'inä̧tö̧: ru̧hua̧ Ezequías Judá rȩjȩnä̧ ruhuo hueinö pä̧nä̧ "Miqueas Moréset ttö̧ja̧sa̧mä̧ Judás ttö̧ja̧rö̧ 'cuä̧o̧pä̧cuȩ jiähuina'a jina'a. Ja̧u̧mä̧ Judá ttö̧ja̧ o'catoi'önä̧rö̧ ucuocumä pä'inö: TÖ̧Ä̧NÄ̧HUA̧ Dios ju̧ru̧hua̧mä̧ pa̧'a̧nö̧ pä'ö: Siónmä rȩjȩ sahuähuome jö̧'a̧nö̧tä̧ juoächäcuomä, Jerusalénmä isäsa uchunö ttöta'a jä̧'i̧nö̧'a̧nö̧tä̧ juoächäcuome, ja̧'hua̧ta̧nö̧ Diosrö ucuocuäcuähuode möä'canä̧ huodemä, po̧ri̧yä̧'tä̧ päi'ome huäkä'co jo̧mȩ isä'cuatä juoächä'inö'anötä̧ jä̧cuo̧mȩ. ¹⁹ ¿Ja̧u̧ttö̧mä̧ Ezequías Judattö ru̧hua̧mä̧ ja̧'hua̧ta̧nö̧ o'catoi'önä Judá ttö̧ja̧'i̧nä̧ Miqueasrömä cuä'ömä icuocotö pinä̧tö̧? ¿TÖ̧Ä̧NÄ̧HUA̧RÖ̧MÄ̧ ye'ecuocö pinö̧ ja̧'hua̧nö̧ hua̧ jo̧mȩttö̧ TÖ̧Ä̧NÄ̧HUA̧ ö̧ra̧huä̧rö̧mä̧ mȩya̧dö̧ icuocö pinö surojö huea pä'ö jiähuäji hueö juiyönä̧mä̧? ¿Ta̧'cua̧rö̧mä̧ ta̧mö̧nä̧ pa̧ja̧tö̧ suronä jȩtä̧cuä̧hua̧ pä'ö jä̧cua̧'a̧? ²⁰ 'Cuä̧o̧pä̧cuȩ TÖ̧Ä̧NÄ̧HUA̧ i̧mi̧nä̧ jiäcuä ttö̧ja̧sa̧ ka̧ra̧'i̧nä̧ ki̧nö̧, Quiriat Jearim ttö̧ja̧sa̧ Semaías i̧tti̧ Urías'i̧nä̧ - Ja̧u̧'i̧nä̧ ja̧u̧ ötahuiyänä'i̧nä̧, juä̧jä̧ rȩjȩnä̧'i̧nä̧ 'cuä̧o̧pä̧cuȩ ji'ähuinö, Jeremías ucuocuinö jinöta'anötä̧. ²¹ Ja̧'hua̧nö̧ ja̧'a̧nä̧ ru̧hua̧ Joacím'i̧nä̧ ja̧'hua̧ta̧nö̧ u̧mö̧huäyotö su̧ro̧da̧u̧ o'catoi'önä juhua'atäcu ippeyänä ruhuotö'i̧nä̧ ucuocumä ä̧ju̧cui̧nä̧tö̧, ja̧'hua̧nö̧ ä̧ju̧cu̧ ru̧hua̧mä̧ Ja̧u̧rö̧ cuä'ö icua pä'ö jȩpi̧nö̧, ja̧'hua̧nö̧ jȩa̧ Uríasmä ä̧ju̧cu̧ rö̧ä̧nä̧ ye'ecui'inö̧, ja̧'hua̧nö̧ ye'ecui'ö tö'ipächömä Egipto rȩjȩra̧'a̧ 'chi̧nö̧. ²² Ja̧'hua̧nö̧ ja̧'a̧ ru̧hua̧ Joacímä umöhuäyotörö hue'inö Egiptora̧'a̧, Acbor i̧tti̧ Elnatánrö̧'i̧nä̧ ja̧'hua̧ta̧nö̧ korotörö'i̧nä̧ Egiptora̧'a̧ Uríasrö tottäjiyarö pä'ö. ²³ Egiptora̧'a̧ttö̧ Uríasrö rä'epö icu ru̧hua̧ Joacím ä'ca jo̧mȩcu̧ i'cäcinä̧tö̧. Ja̧'hua̧nö̧ ja̧'a̧ Joacímä curodänä 'cui'opö icuinö, cuä'ö icuäji'ca̧ o'co jähuämä ttö̧ja̧ ttucuo jui'ätö huattome ttutiyarö pä'ö hue'inö. ²⁴ Ja̧'hua̧nö̧ ja̧'a̧nä̧ Jeremíasmä, Safán i̧tti̧ Ahicam umönä ki̧nö̧, ja̧'hua̧nö̧ jo̧mȩttö̧ ttö̧ja̧ ttu̧mö̧nä̧ ttiyococu pinö cua'ö tticuarö pä'ömä.