¹ Eelyo umwi ayeta chipayizyo chazilyo kuli Jehova, chipayizyo chakwe cheelede kuba busus bunante bwa bbale, alimwi uyotila mafuta alimbubo akubika tununkilizyo alimbubo. ² Uyotola chipayizyo kubana balombe ba Aloni bapayizi, alimwi ooko mupayizi uyogwisya busu bunante bwa bbale buzuzya jaanza buli aamafuta atununkilizyo alimbubo. Mpawo mupayizi uyootenta chipayizyo aachipayililo mbuli chipayizyo chiiminini. Chiyogwisya bweema bununkilila kuli Jehova; chinoli nchipayizyo chachitilwa nguwe amulilo. ³ Kufumbwa chiyoosyala chachipayizyo chazilyo chiyooba cha Aloni abana bakwe balombe. Chilasalalisya kuli Jehova kuzwa kuzipayizyo kuli Jehova zyachitwa amulilo. ⁴ Eelyo waakupa chipayizyo chazilyo chitakwe busweezyo bwayokwa muchikko, cheelede kuba chibunge chiteteete chabusu bunante bwa bbale bwaswanizigwa amafuta, nikuba chibunge chiyumu chitakwe busweezyo, chinanikidwe mafuta. ⁵ Na chipayizyo chako chazilyo chayokelwa muchiyokelo chabutale chisalebete, cheelede kuba cha busu bunante bwa bbale butakwe busweezyo bwaswanizigwa amafuta. ⁶ Uleelede kuchikkwamuuna muzipanzi alimwi utulide mafuta alinchicho. Eechi nchipayizyo chazilyo. ⁷ Na chipayizyo chako chazilyo chilijikidwe muchijikilo, cheelede kachichitidwe abusu bunantde bwa bbale a mafuta. ⁸ Uleelede kweeta chipayizyo chazilyo kuli Jehova chichitidwe kuzwa kuzintu eezi, alimwi chiyoopedekezegwa ku mupayizi, ooyo utakacheete ku chipayililo. ⁹ Mpawo mupayizi uyobweza zimwi kuzwa ku chipayizyo chazilyo mbuli chipayizyo chiiminini, alimwi uyoochitenta achipayililo. Chinoli nchipayizyo chichitidwe amulilo, alimwi chiyogwisya bweema bununkilila kuli Jehova. ¹⁰ Chiyoosyaala ku chipayizyo chazilyo chiyooba cha Aloni abana bakwe balombe. Chilasalalisya kuli Jehova kuzwa kuzipayizyo kuli Jehova zyachitwa amulilo. ¹¹ Takwe chipayizyo chazilyo nchoyoopa kuli Jehova chiyochitwa abusweezyo, nkaambo towelede kutenta busweezyo, nikuba buchi, mbuli chipayizyo chachitwa amulilo kuli Jehovaa. ¹² Uyoozipa kuli Jehova mbuli zipayizyo zya michelo mitanzi, pesi tazikoyoobelesegwa kukugwisya bweema bununkilila pe achipayililo. ¹³ Uleelede kulunga chimwi achimwi chazipayizyo zyako zyazilyo amwinyo. Towelede pe kuzumizya mwinyo wachizuminano cha Leza wako kuti ukabulike kuzipayizyo zyako zyazilyo. Azipayizyo zyako zyoonse uleelede kupa mwinyo. ¹⁴ Na wapa chipayizyo chazilyo chamichelo mitanzi kuli Jehova, pa zilyo zipya ziyokedwe aamulilo alimwi zyaziigwa kuba busu. ¹⁵ Mpawo uleelede kubika mafuta atununkilizyo alimbubo. Eechi nchipayizyo chazilyo. ¹⁶ Mpawo mupayizi uyootenta chipanzi chazilyo zyaziigwa a mafuta a tununkilizyo mbuki chipayizyo chiiminini. Eechi nchipayizyo chachitwa amulilo kuli Jehova.