¹ Jehova wakayita kuli Mozesi alimwi wakaambula kulinguwe kuzwa mutente lyakuswaanana, wakati, ² ''Ambuula kubantu ba Izilayeli alimwi ubaambile, 'Eelyo kufumbwa mwaalumi kuzwa aakati kenu weeta chipayizyo kuli Jehova, eta mbuli chipayizyo chako munyama, nikuba kuzwa kutanga lyen'ommbe nikuba kulungundu lwambelele ³ Na chipayizyo chakwe kachili chipayizyo chakutentwa kuzwa ku tanga, weelede kupa n'enze itakwe kampenda pe. Uleelede kupa aamulyango watente lyakuswaanana, kuchitila kuti ikatambulwe kunembo lya Jehova. ⁴ Uleelede kulowampa lubono lwakwe amutwe wachipayizyo chakutentwa, alimwi mpawo chiyootambulwa kachiimvwilidi nguwe kukuchita kubukulusigwa kwakwe mwini. ⁵ Mpawo uleelede kujaya mupule kunembo lya Jehova. Bana baombe ba Aloni, bapayizi, bayoopa igazi aloimwi lisansiilwe achipayililo eecho chili amulyango watente lyakuswanana. ⁶ Mpawo uleelede kufunda chipayizyo chakutentwa alimwi achinenge zibe zituli. ⁷ Mpawo bana balombe ba Aloni bayookutula mulilo aachipayililo alimwi babambe inkuni zili amulilo. ⁸ Mpawo bana balomba ba Aloni, bapayizi, bayoobika zituli, kuswaanizya mutwe amafuta, aankuni zili amulilo ooyo uli achipayililo. ⁹ Pesi zyamukati amawulu aacho weelede kuzisanzya amanzi. Mpawo mupayizi uyootenta zyoonse zili achipayililo mbuli chipayizyo chipayizyo chakutentwa. Chiyoogwisya bweema bununkilila kuli ndime; chinoli nchipayizyo chachitilwa ndime amulilo. ¹⁰ Na chipayizyo chakwe chachipayizyo chakutentwa kachizwa kulungundu, imwi yambelele na imwi yampongo, weelede kupa keenze katakwe kampenda. ¹¹ Uleelede kuyookajayila kulubazu lwa kumusanza kwachipayililo kunembo lya Jehova. Bana balombe ba Aloni, bapayizi, bayoosansiila gazi lyako kumabazu woonse achipayililo. ¹² Uleelede kukanenga kabe zituli aamwi amutwe alimwi amafuta aako, alimwi mupayizi uleelede kubika zituli aankuni zili amulilo ooyo uli achipayililo, ¹³ pesi zyamukati alimwi amawulu uleelede kuzisanzya amanzi. Mpawo mupayizi uyoopalila koonse, alimwi akatente achipayililo. Nchipayizyo chakutentwa, alimwi chiyogwisya bweema bunubkilila kuli Jehova; chinoli nchipayizyo chachitilwa nguwe amulilo. ¹⁴ Na chipayizyo chakwe kuli Jehova kuti chibe chipayizyo chakutentwa chabayuni, mpawo uleelede kweeta mbuli chipayizyo nikuba nziba na mwana wankwilimba. ¹⁵ Imupayizi uleelede kucheeta kuchipayililo, agwisye mutwe wacho, alimwi achitente achipayililo. Mpawo igazi lyacho lyeelede kuyogwisigilwa kumbali lya chipayililo. ¹⁶ Uleelede kugwisya chiyangilo azili mulinchicho, alimwi akuchisowela kumbali lyachipayililo kulubazu lwa kujwe, kubusena bwadota. ¹⁷ Uleelede kuyoyidelula ijulike amababa aayo, pesi tayelede kwiwanzanya pe kuti ibe zipanzi zibili. Mpawo mupayizi uyoyitenta achipayililo, aankuni eezyo zili amulilo. Iyooba chipayizyo chakutentwa, alimwi iyogwisya bweema bununkilila kuli Jehova; iyooba chipayizyo chachitilwa nguwe amulilo.