¹ Bakabelesya yamubala wamuteme amuntumbula, amubala usalala, bakachita zisamo zilukikene zyakubelesya mubusena busalala. Bakachita zisamo zya Aaloni zyabusena busalala, mbuli Yahuwe mbwakali walayilila Mozesi. ² Bbezaleli wakapanga efodi yaangolide, yamuteme, muntumbula, ayamubala usalala wewuulu, alimwi amulembo ulukikene. ³ Bakapwaya mazenge angolide akwanengulula kwachita tubulo, kuti batubelesye mumibalo yamuteme, mintumbula, amubala usalala wawuulu, amumilembo ilukinkene, kumilimu yamubelesi munkutwe. ⁴ Bakachita zimpanzi zyamakkuko a efodi, bajatanisya zyooko zyajulu zyobile kuli nchicho. ⁵ Ilukumba lwacho lwamuchibuno lulukinkene lwakali mbuli chiimo; chakachitidwe aamulembo ulukinkene wangolide, muteme, muntumbula amubala usalala, biyo mbuli Yahuwe mbwakali walayilila Mozesi. ⁶ Bakabeza ibbwe lya Onikisi, livumbikizigwe aanzila zyamabambe angolide, zibambidwe abulumatizi mbuli abukozyenie amazina abana ba Izilayeli balombe. ⁷ Bbezaleli wakazibika azimpanzi zyamakuko ac efodi kuti abe mabwe akwibalukwa bana ba Izilayeli balombe, mbuli Yahuwe mbakali walayilila Mozesi. ⁸ Wakachita chimpanzi chakukango, mulimo wamubelesi munkutwe, lweebo lupya mbuli efodi. Wakachichita angolide, amuteme, muntumbula, alimwi amubala wawuulu, amulembo umaninide. ⁹ Chakali chamweelwe uyelene. Bakavunga tubili chimpanzi chaakango. Chakali abwanza bumwi mubusasa. ¹⁰ Bakabamba milongo yone yamabwe mebesi muli nchicho. Mulongo mutanzi wakali aalubbi a topazi, alimwi alimwi a ganeti. ¹¹ Mumulongo wabili mwakali lya emalaludi, a safile, alimwi lya dayamondi. ¹² Mumulongo watatu mwakali aa jasinsi, a ageti alimwi a ametiyisiti. ¹³ Mulongo wane wakali aa bbelilu, a onikkisi, alimwi lya jasipa. Mabwe akabambidwe muchiimo changolida. ¹⁴ Kwakali mabwe ikkumi aane, alimwi kalyimvwilidi izina lyabana ba Izilayeli balombe, alimwi kalijisini azina lyaumwi wamikowa ilikkumi ayibili. ¹⁵ Achimpanzi chakango bakachita inketani mbuli tukole, ulukidwe mbuli ingolide loko. ¹⁶ Bakapanga nchoko zyangolide zyobile anwenwe zyangolide zyobile, alimwi bakajatanisya nwenwe zyobile kuzyooko zyobile zyachimpanzi chankolo. ¹⁷ Bakabikka zisitilizyo zyengolida zyobile zilukidwe munwenwe zibili kuzyooko zyachimpanzi chakukango. ¹⁸ Bakajatanisya zimwi impela zyobile zibambidwe. Bakazijatanisya ezimpanzi zyekkuko lya efodi kunembo lyayo. ¹⁹ Bakapanga inwenwe zyobile angolide akuzibika kulizimwi izyooko zyobile zyachimpanzi chakukango, kumbali afwifwi amugaano wamukati. ²⁰ Bakapanga zimbi inwenwe zyangolide zyobile akuzijatanisya akunsi lyezimpanzi zyekkuko zyobile zyakunembo lya efodi, afwifwi amukkome wayo ataala lyaluvumba lwamuchibuno cha efodi. ²¹ Bakapanga chimpanzi chakukango chenwenwe zyecho kunwenwe zyaku efodi akukkole lyamuteme, kuchitila kuti likonzye kujatanisigwa biyo ataala lyalukumba lwa efodi lwamuchibuno lulukinkene. Eezi zyaklikuchitilwa kuti chimpanzi chakukango chikachilwe kujatanisigwa kuzwa ku efodi. Eezi zyakachitwa mbuli Yahuwe mbakali walayilila Mozesi. ²² Bbezaleli wakachita igubo lya efodi lyonse amulembo wamuteme biyo, mulimo wasikuluka. ²³ Lyakali aabbanga lyamutwe aakkati. Ibbanga lyakali amunkome ulukidwe kuzyunguluka bwanzo kuchitila kuti utadeluki. ²⁴ Kumupeto wakunsi, bakachita ma pomegilaneti amuteme, muntumbula amubala usalala alimwi lyamulembo umaninide. ²⁵ Bakapanga milangu yengolide loko, alimwi bakabika milangu akati kama pomegilaneti kuzyunguluka mukkome wakunsi lyegubo, aakati a pomegilaneti imulangu a pomegilaneti, ²⁶ imulangu alimwi a pomegilaneti - kumukkome wegubo kuti Aaloni abeleke kasamide. Eezi zyakali mbuli Yahuwe mbwakali walayilila Mozesi. ²⁷ Bakapanga amajansi amulembo umaninide a Aaloni abana bakwe. ²⁸ Bakapanga itabbeni amulembo umaninide, i owoneti kkwalibba lyakumutwe lyamulembo umaninide, zisamo zyamukati zyamulembo umaninide, ²⁹ alimwi a sashi lyamulembo umaninide wamuteme, muntumbula, abbalabala yani, imulimo wasikuluka. Eezi zyakali mbuli Yahuwe mbwakali walayilila Mozesi. ³⁰ bakachita indyido yamusini usalala wangolide; akulemba alinjiyo, mbubonya mbuli mbokulembwa anwenwe, ''Busali kuli Yahuwe.'' ³¹ Bakajatanisya ku mukkome lukole lwamusyobo wamuteme kujulu lyamukkome. Eezi zyakachitwa mbuli Yahuwe mbwakalayilide Mozesi. ³² Nkokuti imulimo wachikombelo, ibbakasa lyamiswangano, wakamaninina. Bantu baku Izilayeli bakachita zyoonse, bakatobelezya woonse malayilile aayo Yahuwe ngaakali wapa kuli Mozesi. ³³ Bakeeta chikombelo kuli Mozesi - ibbakasa azyonse zibelesyo zyelyo, injatanisyo zyelyo, mayasyo; ³⁴ zivumbyo zyezikumba zya lamu zyakachindululwa amubala usalala, ivumbyo lyechikumba chimaninide, alimwi akketani lyakusitikizya ³⁵ ibwato bwabukamboni, alimwi amayako alimwi avunisyo champwido. ³⁶ Bakeeta itebuli, zyonse zilongo zyelyo, achinkwa chezipo; ³⁷ chikazikilo chalayiti chengolide loko azimunisyo zyecho kazili mulongo, atulongolongo twelyo amafuta azimunisyo; ³⁸ ichipayililo changolide, mafuta aamananike, atununikilizyo; indengelezyo yamulyango wachikombelo; ³⁹ chipayililo chabbulonzi ajazyo lyecho lyabbulonzi amayako aalyo azilongo abbavu pati akkazikilo lyelyo. ⁴⁰ Bakeeta zilengelezegwa zyalubuwa a ndengelezyo zyazyo azikkazikilo, alimwi achisitilizyo chamulyango walubuwa; tukole twalyo ankaanka zyebbakasa; azyoonse zibelesyo zyamulimo wachikombelo, ibbakasa lyambunganino. ⁴¹ Bakeeta zisamo zyakalukidwe kumaninina zyakubelesya mubusena busalala, zisamo zisalala zya Aaloni mupayizi abana bakwe, kuti babeleke mbuli bapayizi. ⁴² Mbombubo bantu baku Izilayeli mbubakachita woonse mulimo mbuli Yahuwe mbwakali walayilila Mozesi. ⁴³ Mozesi wakalangisisya woonse mubeleko, alimwi, amulange, bakali bawuchita. Mbuli Yahuwe mbwakali walayilila, bakawuchita mbubo loko. Mpawo Mozesi wakabalongezya.