¹ Mpawo Yahuwe wakambula a Mozesi, wakati, ² ''Mubuzuba butanzi bwamwezi mutanzi wamunyaka mupya welede kwimika chikombelo, ibbakasa lyambunganino. ³ Weelede kubika ibbokesi lyabukamboni muli ndilyo, alimwi weelede kusitikizya bbokesi achisitilizyo. ⁴ Weelede kweeta tafula mukati akubamba kabotu eezyo zintu zyalyo. Mpawo weelede kweeta mukati chikkazikilo chazimunisyo akubamba zimunisyo. ⁵ Weelede kubika chipayililo chatununkilizyo chamubala wengolida kunembo lyabbokesi lyabukamboni, alimwi weelede kubika chisitilizyo kumulyango wachikombelo. ⁶ Weelede kubika chipayililo chakuumpa zipayizyo kunembo lyamulyango wachikombelo, ibbakasa lyamuswangano. ⁷ Weelede kubika bbavu pati akati kebbakasa lyambunganino achipayililo alimwi welede kubika maanzi mukati. ⁸ Welede kuyakila lubuwa luchizyungulukide, alimwi welede kwaanzika chisitilizyo kumulyango walubuwa. ⁹ Welede kubweza mafuta akunanika unanike chikombelo azyonse zilimukati. ¹⁰ Welede kuchibika bwanzeene azyoonse zyalweebo lwacho kuli ndime; mpawo chiyoba chisalali. Welede kunanika chipayililo chazipayizyo zyuumpwa azyonse zilongo zyacho. Welede kuchibamba kumbali chipayililo kuli ndime alimwi chiyoba chisalali loko kuli ndime. ¹¹ Welede kunanika ichisambilo chaabbulonzi achikkalilo chalyo alimwi uchibambile kubbazu kulindime. ¹² Weelede kuyooyeta Aaloni abana bakwe balombe kumulyango wabbakasa lyambunganino alimwi ukabasanzye amanzi. ¹³ Welede kuyozwatika Aaloni zisamo zibambilidwe kubbazu kuli ndime, ukamunanike akumubika kubbazu kuchitila kuti akabeleke mbuli mupayizi wangu. ¹⁴ Weelede kuyoyeeta bana bakwe ukabazwatike majansi. ¹⁵ Welede kuyobananika mbuli mbuwakananika wisi kuchitila kuti bakandibelekele mbuli bapayizi. Kunanikwa kwabo kuyobachitya bupayizi bwalyoonse kwinda mubuzyalwe bwabantu babo.'' ¹⁶ Eezi nzyakachita Mozesi; wakatobelezya zyonse nzyakamulayilide Yahuwe. Wakazichita zyoonse eezi. ¹⁷ Nkokuti chikombelo chakayakwa mubuzuba butanzi bwamweezi mutanzi mumunyaka wabili. ¹⁸ Mozesi wakayaka chikombelo, wakabika chikkalilo chacho mpucheelede, wakiimikizya busanza bwacho, waswanizya atubulo twacho, alimwi wakiimikizya mbandama andengelezyo zyacho. ¹⁹ Wakayabika chivumbyo aatala lyachikombelo akubika bbakasa ataala lyacho, mbuli mbaakali wamulayilila Yahuwe. ²⁰ Wakabweza zilembelo zyechizuminano akuzibika mubwaato alimwi wakabika chivunisyo champwido aali nchicho. ²¹ Wakeeta bbokesi muchikombelo. Wakayimikizya chisitilizyo kuti lisitikizye bbokesi lyabukamboni, mbuli mbakali wamulayilila Yahuwe. ²² Wakabika tafula mubbakasa lyakubunganina,kubbazu lyakujwe lyachikombelo,kunze lyachisitilizyo. ²³ Wakabika chinkwa atafula mbuli mbukwelede kunembo lya Yahuwe, alimwi mbuli Yahuwe mbwakali walayilila. ²⁴ Wakabika chikkazikilo chazimunisyo mubbakasa lyakubunganina, mukwiinga kuzwa kutafula, kubbazu lyakunsi lyachikombelo. ²⁵ Wakayasya zimunisyo kunembo lya Yahuwe, mbuli mbaakali wamulayilila Yahuwe. ²⁶ Wakabika chipayililo chatununkilizyo chamubala wangolide mubbakasa lyachibunganino kunembo lyachisitilizyo. ²⁷ Wakatenta kanunkilizyo kanunkilila muli nchicho, mbuli mbwakamulayilide Yahuwe. ²⁸ Wakaanzika chisitilizyo kumulyango wachikombelo. ²⁹ Wakabika chipayililo chazipo ziteentwa kumulyango kuchikombelo, ibbakasa lyakubunganina muswangano. Wakapa kuli nchicho ichipo chakutenta alimwi achipo chamuseke wazilyo, mbuli mbwakamulayilila Yahuwe. ³⁰ Wakabikka ichisambilo akati kabbakasa lyambunganino achipayililo, alimwi wakabika maanzi akusamba muli ndilyo. ³¹ Mozesi, Aaloni abana bakwe balombe bakasamba maboko amawulu aabo mubbavu. ³² Kufumbwa chiindi nibakali kunjila mubbakasa lyakubunganina lyamuswangano alyonse nibakali kuya mujulu kuchipayililo. Bakalisanzya, mbuli Yahuwe mbwakalayilide Mozesi. ³³ Mozesi wakayakila lubuwa kazyunguluka chikombelo achipayililo. Wakabika chisitilizyo kumulyango walubuwa. Muli eeyi inzila, Mozesi wakamaninsya mulimo. ³⁴ Mpawo ijoba lyakajala ibbakasa lyachibunganino chamiswangano, alimwi bupati bwa Yahuwe bwakazuzya chikombelo. ³⁵ Mozesi takwepe nakakonzya kunjila mubbakasa lyachibunganino nkambo ijoba lyakali lyakali lyakkala alinchicho, akuti bupati bwa Yahuwe bwakali bwazuzya chikombelo. ³⁶ Kufumbwa chindi ijoba nilyakali kuvumbulwa achikombelo, bantu bakwa Izilayeli bakali kutalika kweenda mulwendo lwabo. ³⁷ Pesi ikuti ijoba telyanyampuka aachikombelo aawo bantu tebakali kweenda pe. Bakali kukkala manedo mubuzuba mbulyayonyampulwa. ³⁸ Nkambo ijoba lya Yahuwe lyakali atala lyachikombelo abuzuba,alimwi mulilo wakwe wakali aatala lyaacho mansiku, aantanganana kunembo kumaboneno aabantu boonse bakwa Izilayeli mulwendo lwabo loonse.