¹ Yahuwe wakati kuli Mozesi, ''Bweza mabwe apapalete aabili mbuli akutanguna. Ndilalemba amabwe apapalete aya majwi akali amabwe akumatangunino, mabwe ngiwakapwachuula. ² Koli walibambila kuseni alimwi, usike ejulu achilundu cha Sinayi, alimwi ukalitondezye kunembo lyangu ejulu lyachilundu. ³ Kutabi umbi uuza anduwe. Uutazumizyi naba aani kuti aboneke naaba ali achilundu. Kutabi imbelele nanka ng'ombe zichela kunembo lyachilundu.'' ⁴ Eelyo Mozesi wakabeeza mabwe apapalete abili mbuli matanzi, wakabuka kuseni alimwi wakatanta achilundu chaSinayi, mbuli Jehova mbwakamulayilide. Mozesi wakabweza mabwe apapalete mujanza lyakwe. ⁵ Yahuwe wakaseluka aansi mujoba alimwi wakayimikila a Mozesi nkukoko alimwi wakamba izina ''lya Jehova.'' ⁶ Jehova, Leza sibuya alimwi ngusiluzyalo, uutafwambani kunyema, alimwi ngusiluyando akusyomeka kuyinkilila kakufwasuka. ⁷ Ubamba luyando luteeli kuzyuulu, ulekelela bubi, ndubizyo, alimwi azibi. Nekubabobo takwe nayolekelela basizibi, uyoyeta chisubulo nkambo kachibi chabamawisi kubana babo alimwi kubazukulu, mane kuzyalane lyatatu alyaane.'' ⁸ Mozesi wakafwambana kukotama alimwi wasikukomba. ⁹ Mpawo wasikuti, ''Na lino ndajana choolwe kumenso ako, Mwami wangu ikaka yenda akati kesu nkambo bantu aba mbasimutwe muyumu. Lekelela milandu yesu azibi zyesu, alimwi utubweze mbuli lukono lwako.'' ¹⁰ Yahuwe wakati, ''Bona, ndaamba kuchita chizuminano kunembo lyabanrtu bako boonse, Ndilachita malele atana kuchitwa munyika yoonse nikuba muchisi nichiba ichili. Bantu boonse mbokkede abo bazobona milimu yangu, nkambo nchintu chiyoosya nchindokuchita andinywe. ¹¹ Amuchite nchindimulayilila sunu. Ndamba kugwisya kunembo lyanu ma Amoli, baKkenani, ba Hiti, ba Pelizi, ba Hiviti alimwi aba Jebbusiti. ¹² Uchenjele utakachiti chizuminano ababo bakkala munyika oko nkoyobuya, inga bayoba kakole akati kenu. ¹³ Pele mwelede kuyomwaya zipayililo zyabo, mukolomone minsi yamabwe, alimwi mutemene aansi ziyako zyabo zya Ashela. ¹⁴ Nkambo tamwelede pe kukomba bambi baleza, nkambo Jehova izina lyakwe ngusibuzuba,' ngu Leza sibuzuba. ¹⁵ Aboobo muchenjele mutachiti chizuminano abakkede munyika eyo, nkambo balaamuka abaleza babo alimwi balapayilila kuli baleza babo. Mpawo umwi wabo uyomutamba alimwi muyolya zimwi zyachipayizyo chakwe, ¹⁶ Kuzwa awo muyosika abakubweza bana basimbi bakwe kubapa bana banu balombe, alimwi bana basimbi bakwe bayowamuka abaleza babo, alimwi bayochita kuti bana benu balombe bakaamuke abaleza babo. ¹⁷ Mutalichitli baleza babumbidwe alotwe. ¹⁸ Mwelede kubamba pobwe lyechinkwa chitakwe busweezyo. Mbuli mbundakamulayilila, mwelede kulya chinkwa chitakwe buswezyo kwamazuba musanu aabili muchiindi chibikidwe mumwezi wa Abbibbi, nkambo kwakali mumwezi wa Abbibbi nimwakazwa mu Ijipiti. ¹⁹ Boonse bana batanzi mbibangu, nikuba woonse mweenze wakutanguna wazivuubwa zyako, nikuba kuzwa kung'ombe na kumbelele. ²⁰ Ulelede kunununa mwana mutanzi wadonki a mwana wembelele, na wakachilwa kumuula lubo ulelede kumutyola nsingo. Ulelede kunununa boonse bana balombe batanzi. Takwe naba omwe uyelede kusika kulindime kali chinkwa-maanza. ²¹ Ulakonzya kubeleka kwamazuba musanu alimwi, pele muzuba lyamusanu aabili ulelede kulyokezya. Nikuba muchiindi chakufolola alimwi akutyola ulelede kulyookezya. ²² Uyelede kuyeya pobwe lyamviiki abutebuzi butanzi bwawiiti, alimwi uyelede kuyeeya a pobwe lyakubungania kwakumana kwamunyika. ²³ Zyiindi zitatu mumunyaka balumi benu boonse belede kulibonia kunembo lya Mwami Jehova Leza wa Izilayeli. ²⁴ Nkambo ndiyowanda zisi kunembo lyako alimwi ndiyoyungizya migaano yako. Takwe naba omwe uyolombozya kubweza nyika yako kuti ibe yabo kuti watanta kukuyolibonia kubusyu bwa Jehova Leza wako zyiindi zitatu mumunyaka. ²⁵ Toyelede kupa bulowa bwachipayizyo changu abuswezyo, nikuba kufumbwa nyama yazwa kuchipayizyo chepobwe lya Pasika tiyelede kuchaala kusika kuseni. ²⁶ Uyelede kweta kabalwebalwe kebesi kamumuunda wako kung'anda yangu. Toyelede kujika mwana wempongo mumalili abanyina.'' ²⁷ Yahuwe wakati kuli Mozesi, ''Lemba aansi majwi aya, nkambo mukwendelana amajwi aya ndilachita chizuminano anduwe alimwi a Izilayeli.'' ²⁸ Mozesi wakakkala oko a Jehova kwamazuba makkumi aane amansiku, takwe nakalya chakulya nikuba kunywa manzi. Wakalemba amabwe majwi achizuminano, milazyo ilikkumi. ²⁹ Lino Mozesi nakaseluka aansi kuzwa kuchilundu cha Sinayi amabwe aabili achizuminano mujanza lyakwe, teensi wakalizi kuti chikumba chabusyu bwakwe chakali chamweka chiindi nakali kwambuula a Leza. ³⁰ Lino Aaloni abama Izilayeli nibakabona Mozesi, chikumba chabusyu bwakwe chakali kumweka alimwi bakayoowa kuswena afwifwi kulinguwe. ³¹ Pele Mozesi wakabayita, alimwi Aaloni abazuluzi boonse bembungano bakasika kulinguwe. Mpawo Mozesi wakambuula ambabo. ³² Nichakayinda eechi, bantu boonse ba Izilayeli bakasika kuli Mozesi, alimwi wakabambila milayizyo yoonse Jehova njakamupa kuchilundu cha Sinayi. ³³ Lino Mozesi nakamana kwaambula ambaabo, wakalivumba lembo kubusyu bwakwe. ³⁴ Elyo lyoonse Mozesi nakalikwinka kunembo lya Yahuwe kukwambula aawe, walikugwisya lembo, manedo azwe aanze. Nakali kuzwa aanze, walikubambila bana ba Izilayeli ezyo nzyakalayililwa kuti azyambe. ³⁵ Lino bana ba Izilayeli nibalikubona busyu bwa Mozesi kabumweka walikulivumba lubo lembo kubusyu bwakwe manedo abwede kuyowambula a Jehova.