¹ Mpawo Jehova wakaambula kuli Mozesi, ''Yinka kuzwa aano, webo abantu aabo mbuwakagwisya kuzwa muchisi cha Ijipiti. Yinka kunyika eeyo njindakakonkezya kuli Abbulahamu, kuli Ayizeki, akuli Jakkobo, eelyo nindakati, 'Ndiyoyipa kulunyungu lwako.' ² Ndiyotuma mutumwa kunembo lyako, alimwi ndiyowanda baKkanana, abaAmoli, abaHiti, abaPelizi, abaHivi, abaJebusi. ³ Kamuya kunyika eeyo ikunka malili abuchi, pesi nsikoyooyinka andinywe, nkaambo mulibantu bayumu myoyo. Ulabona ndaakumujaya.'' ⁴ Eelyo bantu nibakamvwa majwi aaya aamakatazyo, bakalila, alimwi takwe naba omwe wakasama bulungu. ⁵ Jehova mbakaambila Mozesi, ''Ambila bana ba Izilayeli, 'Muli bantu bayumu myoyo. Na ndeenda aakati kenu nikuba muchiindi chinini, ndilakonzya kumujaya. Ikwalino amuzwatunune bulungu bwanu kuchitila kuti nkaliyeeyele kuti njoochitaayi andinywe.''' ⁶ Akaako ba Izilayeli nibakasama bulungu bwabo kuzwa kuchilundu cha Holebbu akuya kunembo. ⁷ Mozesi wakabweza tente akulikankamina aanze amusasa, kulekule kuzwa kumusasa. Wakati nditente lyakubunganina. Woonse uukumbila kuli Jehova kufumbwa nchayanda ayinke kutente lyambunganino, aanze amusasa. ⁸ Eelyo Mozesi nakalikuzwa kuya kutente, bantu boonse bakalikwiimikila amilyango yamatente aabo akulanga Mozesi kusikila akanjile mukati. ⁹ Chiindi choonse Mozesi nakali kunjila mutente, musumpuululu wajoba wakali kusika aansi akwiimikila kumulyango watente, alimwi Jehova wqkqlikwaambula kuli Mozesi. ¹⁰ Chiindi choonse bantu boonse nibakali kubona musumpuulula wa joba kuyimvwi amulyango watente, bakali kubuka akukomba, awumwi muntu kumulyango watente lyakwe. ¹¹ Jehova wakanoonga waambula aMozesi kubusyu-akubusyu, mbuli muntu mbawambula kumweenzinyina. Mpawo Mozesi wakanoonga wabweda kumusasa, pesi mulanda wakwe Josyuwa mwana wa Nuni, mwaalumi muniini, wakali kusyaala mutente. ¹² Mozesi wakatik uli Jehova, ''Langa, wakalikwaamba kuli ndime, 'Bweza bantu aaba mulweendo lwabo,' pesi tewandizibya pe kuti ooyo ngotakanditume aawe ngwani. waamba wati, 'Ndilikwizi we azina, alimwi webo wajana choolwe kumenso aangu.' ¹³ Lino na ndajana choolwe kumenso aako, nditondeezye nzila zyako kuchitila kuti ndikuzibe akwiinkila kunembo kukujana choolwe kumenso aako. Koyeya kuti eeyi nyika mbantu bako.'' ¹⁴ Jehova wakasandula, ''Buliwo bwangu ndemwini buyooyinka anywebo, alimwi ndiyomupa kulyookezya.'' ¹⁵ Mozesi wakati kulinguwe, ''Na kuti buliwo bwako tebweenda andiswe, utatubwezi pe kuzwa aano. ¹⁶ Nkaambo muliimwi nzila ndiyooziba biyeni kuti ndajana choolwe kumenso aako, mebo abantu bako? Takunoli kuti na wayinka andiswe mebo abantu bako tuyoosiyana abamwi bali aatala aanyika?'' ¹⁷ Jehova wakati kuli Mozesi, ''Ndiyokuchitila eecho chintu nchuwakumbila, nkaambo wajana choolwe kumenso aangu, alimwi ndikwizi webo azina.'' ¹⁸ Mozesi wakati, ''Ikaka nditondeezye bulemu bwako.'' ¹⁹ Jehova wakati, ''Ndiyoochita boonse bubotu bwangu bukayinde kunembo lyako, alimwi ndiyolyaamba azina lyangu 'Jehova' kunembo lyako. Ndiyooba aaluzyalo kufumbwa ngunchiyoobeda aaluzyalo alimwi akutondeezya aaluse kufumbwa ngunchiyoobeda aaluse.'' ²⁰ Pesi Jehova wakati, ''Tukoyoobona busyu bwangu nkaambo takwe ubona busyu bwangu akupona.'' ²¹ Jehova wakati, ''Bona, kulibusena aafwifwi andime; uyooyimikila abbwe eeli. ²² Kayindi bulemu bwangu nibuyooyinda aawa, ndiyokubika mulwaanzi luniini lwabbwe akukuvumba ajanza lyangu kusikila nkayinde. ²³ Mpawo ndiyoogwisya kuboko kwangu alimwi uyoobona isule lyangu, pesi busyu bwangu tabukoyoobonwa pe.''