¹ Bantu nibakabona kuti Mozesi wanonoka kuseluka kuzwa muchilundu, bakabunganina Aaloni akumwambila kuti, ''koboola, tuchitile chikozyanio kuti chikeende kunembo lyesu. Nkambo kaboobu Mozesi, mwalumi wakatugwisya kuzwa munyika ya Ijiputi , tatuzi pe kuti niinzi chakachitika kulinguwe. ² Aboobo Aaloni wakati kulimbabo, ''Amugwisye malangulangu angolida woonse ali kumatwi abanakazi benu akumatwi abana benu balombe abasimbi mwayete kulindime.'' ³ Boonse bantu bakagwisya malangulangu angolida oonse ngibakalisamikide kumatwi abo akwayeta kuli Aaloni. ⁴ Wakatambula ingolida kuzwa mumaboko abo wabumba - bumba achibelesyo wachita chikozyanisyo chakanamani. Eelyo wakati, ''aba mbaleza benu, Izilayeli, bakamugwasya munyika ya Ijipita.'' ⁵ Aaloni nakabona eechi, wakayaka chipayililo kunembo akanamani mpawo waambilizya: wakati, ''Ijunza kunolipobwe lyakulemeka Jehova.'' ⁶ Bantu bakafuma kubuka buzuba butobela bapa chipayizyo chakutenta mpawo beeta zyakulya zyakulyida amwi. Eelyo bakakkala aansi kuti balye akunywa, mpawo bakanyampuka akusobana. ⁷ Mpawo Jehova wakambila Mozesi kuti, ''Koya chakufwambana, nkambo bantu bako, mbwakagwisya munyika ya Ijipita balinyongania. ⁸ Bafwambana basiya inzila eeyo njindakabalayilila. Babumba chikozyanio muchiimo chakanamani bakaamba kuti, ''Aaba mbaaleza benu, Izilayeli, aabo bakamugwisya munyika ya Ijipita.'' ⁹ Eely Yahuwe wakati kuli Mozesi, ''Ndabona bantu aaba. Langa, mbayumu mikosi. ¹⁰ Elyo lino, uteezyi kundimikizya bukali bwangu buyoba buyobawumpa, Eyo ndiyobazimania. Mpawo ndiyochita chisi chipati kuzwa kulinduwe.'' ¹¹ Pesi Mozesi wakeezya kutontoozya Yahuwe Leza wakwe. Wakati, ''Yahuwe, nkamboonzi lunyemo lwako nilwayaka atala abantu bako, aabo mbiwakagwisya kuzwa munyika ya Ijipita anguzu mpati akuboko kulenguzu? ¹² Nkamboonzi ba Izilayeli nibamba kuti, wakabazulwida amoyo mubi kuti akabajaye muzilundu akubazimania kuzwa kubusyu bwanika? Kochengunuka kuzwa kubukali bwako buumpa akuzwa kuchizuminano chachisubulo chili abantu bako. ¹³ Koyeya Abbulahamu a Ayizeki a Izilayeli, balanda bako, aabo mbiwakakonkezya kulinduwe omwini akwamba kulimbabo, ''Ndiyovuzya lunyungu lwenu mbuli inyenyezi zili mumajulu, mpawo ndiyopa lunyungu lwenu loonse inyika eeyi njindakaamba. Bayoyikona kwalyoonse.'' ¹⁴ Mpawo Yahuwe wakalekelela bantu bakwe kuchisubulo nchakali wayanda kubapa. ¹⁵ Eelyo Mozesi wakachengunuka akuseluka kuzwa kuchilundu, kajisi mabwe aabili mapapali amilawu yechizuminano mujanza lyakwe. Aayo mabwe akali lembedwe kumabazu oonse, kunembo akusule. ¹⁶ Mabwe akulimulimu wakwe Leza, abulembo bwakali bulembo bwakwe bwa Leza, bwakali lembedwe amabwe. ¹⁷ Joshuwa nakamvwa kuyowela kwabantu nibakali koompolola, wakati kuli Mozesi, ''Kuli kuyowela kwenkondo mumusasa. ¹⁸ Pesi Mozesi wakati, ''Tekompolola kwasikuzunda pe, alimwi tekuyowela kwabantu bazunda pe, pesi nkuyowela kwakwimba nkwendilokumvwa.'' ¹⁹ Mozesi nakasika kumusasa wakabona kanamani, abantu kabali kuzyana. Wakanyema loko. Wakawala ansi mabwe mapapali kuzwa mumaboko akwe akwapanduula munsi lyachilundu. ²⁰ Wakabweza kanamani ako wakawumpa, wakakuuya bwaba busu, mpawo wabubika mumanzi. Mpawo wakachita kuti bantu ba Izilayeli banywe. ²¹ Aboobo Mozesi wakati kuli Aaloni, ''Ino niinzi bantu aaba nchibachita kulinduwe, chachita kuti weete chibi chipati chiliboobu kulimbabo?'' ²² Aaloni wakati, ''Utaleki bukali bwako kuti buumpe, simalelo wangu. Ulibezi bantu aaba, mbubazibide kuchita bubi. ²³ Bakati kulindime, tuchitile leza utende kunembo lyesu. Nkambo ooyu Mozesi, mwalumi wakatugwisya munyika ya Ijipita tatuzipe kuti ninzi chakachitika kulinguwe. ²⁴ Eelyo ndakamba kuti kulimbabo, ''Wonse ujisi kufumbwa ngolida, ngayizunune.'' Bakandipa ingolida mpawo ndakayiwalila mumulilo, kuzwawo kwakazwa kanamani.'' ²⁵ Mozesi nakabona kuti bantu banyongana ( nkambo Aaloni wakabachita kuti bakake kwendelezegwa,zyakachita kuti basinkondonyina babaniake ) ²⁶ Eelyo Mozesi wakayimikila kumulyango wamusasa akwamba kuti, ''Woonse ulikubbazu lya Yahuwe, ngaboole kulindime.'' Boonse ba Levi bakabungana kulinguwe. ²⁷ Wakati kulimbabo, Yahuwe, Leza waba Izilayeli, wamba eechi: 'Mwalumi umwi awumwi aange ipanga lyakwe kubbazu lyakwe abwede musule akuya kunembo kuzwa kumulyango akumulyango wamusasa woonse, ajaye mwana wakwabo, mwenzinyina, a simayakilane wakwe.'' ²⁸ Ba Levi bakachita muli Mozesi mbwakabalayilila. Mubuzuba oobo bantu bakasisike kuzyulu zitatu zyabakafwide. ²⁹ Mozesi wakati kuli Levi, sunu, nkambo umwi awumwi wenu wabweza ntamo atala amwana wakwe amwana wabanyina, kuti Yahuwe amupe choolwe sunu.'' ³⁰ Mubuzuba butobela Mozesi wakati kubantu, ''Mwakachita chibi chipati loko. Lino ndilatanta kuli Jehova. Antena inga ndlachita kuti mulekelelwe chibi chenu.'' ³¹ Mozesi wakabweda kuli Yahuwe wamba kuti, ''Maawe, aaba bantu bakachita chibi chipati alimwi balibumbila chileza changolida. Pesi lino, weenche balekelele chibi chabo; ³² Pesi kuti tewachita mbubobo, kondizima mubbuku ndiwakalemba.'' ³³ Yahuwe wakati kuli Mozesi, kufumbwa wakandibisizya, ooyo muntu ndiyomuzima kuzwa mubbuku lyangu. ³⁴ Aboobo lino koya uzulwide bantu kuya kubusena nkundakakwambila. Bona mungelo wangu uyoyenda kunembo lyako. Pesi mubuzuba mbundiyobasubula, ndiyobasubula nkambo kachibi chabo.'' ³⁵ Yahuwe wakatuma chisubulo kubantu nkambo bakabumba kanamani, aako Aaloni nkakababumbila.