¹ Lino Yahuwe wakambula kuli Mozesi, wakati, ² ''Bona, ndamwita ezina Bbezalili mwana mulombe wa Uli kali mwana mulombe wa Hee, wakumukowa wa Juda. ³ Ndazuzya Bbezaleli a Muuya wangu, kumupa busongo, kumvwisisisya, alimwi aluzibo, lwakukonzya kuchita milimu isiyenesiyene, ⁴ kubamba, akuchita milimo yamaboko chabuchenjezu abusongo, alimwi akubelesya ngolida, nsiliva abutale; ⁵ alimwi kutema akubamba mabwe akubeza zisamu- kuchita milimu yoonse yaluzibo amaboko. ⁶ Mukuyungizya kuli nguwe, ndasala Oholiyabbu mwana mulombe wa Ahisamaki, wamukowa wa Deni. Ndabika kukonzya kwabuchenjezu mumyoyo yabaabo boonse basongo, kuchitila kuti bachite zyoonse nzindakakulayilila ezi zijatikizya ⁷ iteente lyakuswanana abbokesi lyabukamboni, chivunisyo chalulekelelo chilabbokesi azilongo zyoonse zyamutente ⁸ itafula azibelesyo zyalyo, achizikitizyo chiini chalambi azibelesyo zyacho zyoonse, chitentelo atununkilizyo, ⁹ achitentelo chazipo zyakuumpilizya azibelesyo zyacho zyoonse, amutiba mupati achikkazikilo chawo. ¹⁰ Eezi zijatikizya zikobela zinantisigwe kulukwa, zikobela zisalala zya Aloni mupayizi azeziya zyabana bakwe balombe, babambilidwe ndime kuti bazoobeleke mbuli bapayizi. ¹¹ Eezi azilazyo zijatikizya mafuta abunanike atununkilizyo tunono twabusena busalala. Aaba bazibi bamilimu yabuchenjezu kumaboko bayelede kuchita zintu zyoonse ezi mbubonya mbunda kulayilila.'' ¹² Lino Yahuwe wakati kuli Mozesi, ¹³ ''Kowambila bana ba Izilayeli: ''Nchobeni mwelede kubamba buzuba bwa sabata ya Yahuwe. nkambo ezi chiyooba chitondezyo aakati kakwe andinywe kwinda mumazyalani aabantu kuchitila kuti mukazibe kuti ngu Yahuwe ulipambwida ndinywe. ¹⁴ Aboobo amubambe masabata nkambo kulijata mbuli basalali, libambilidwe nguwe. Wonseni imuntu ulinyongania nchobeni welede kujayigwa. Kufumbwa uubeleka musabata, Ooyo muntu nchobeni welede kudyunkulwa kuzwa kubantu bakwe. ¹⁵ Mulimu uyochiwa mumazuba musanu abumwi pele izuba lyamusanu aabili lyelede kuba Sabata lyakulyokezya kuzwide, lisalala kunembo lya Yahuwe. Kufumbwa uuyochita mulimu nuuba ulibyeni munsabata nchobeni welede kujayigwa. ¹⁶ Aboobo bana ba Izilayeli bayelede kubamba Sabata. Bayelede kwibamba mumazyalani aabantu baabo mbuli chizuminano chikkalilila. ¹⁷ Isabata lyoonse iyoba chitondezyo aakati ka Yahuwe abana ba Izilayeli, nkambo mumazuba musanu alimwi Yahuwe wakachita ijulu anyika, alimwi mubuzuba bwamusanu aabili wakalyokezya alimwi wakakkatalukwa.'' ¹⁸ Leza nakamana kwambula a Mozesi achilundu cha Sinayi, wakamupa mapapali obile amabwe akalembedwe chizuminano, akalembedwe aluboko lwakwe mwini.