¹ Lino aaya malayilile ngowelede kuti ubike kunembo lyabo: ² Na wawula mulanda mu Hebbulu, uleelede kukubelekela kwaminyaka iili musanu awumwi, alimwi mumunyaka wamusanu ayibili uyoyenda kaangunukide katakwe kuliya chintu pe. ³ Na wakaza aalike, uleelede kwiinka kaangunukide; na ulikkwete, eelyo banakwe baleelede kwaangunuka kwiinka aantomwe amulumi. ⁴ Na simalelo wakwe wakamupa mwanakazi akuzyala bana balombe na basimbi, mwanakazi abana bakwe bayooba basimalelo aakwe, alimwi mwaalumi uleelede kweenda kaangunukide alike. ⁵ Pesikuti mulanda waamba biyo wati, ''Ndilayandisya simalelo wangu, banangu, alimwi abana bangu; nsikonzyi kuzwa chakwaangunuka,'' ⁶ eelyo simalelo wakwe uleelede kumutola kuli Leza. Simalelo wakwe uleelede kumweeta kumulyango na kumunsende, alimwi simalelo wakwe amudonkole kutwi kwakwe ansunda. Eelyo mulanda uyoomubelekela kwabuumi bwakwe boonse. ⁷ Na muntu wawuzya mwana wakwe musimbi mbuli mulanda, tayelede pe kwaangunuka mbuli balanda baalumi. ⁸ Na tamubotezyi simalelo wakwe, ooyo wakamuyandide mwini, eelyo uleelede kumuleka awulwe abweede. Takwe cheelelo kumusambala kubazwakule. Takwe cheelelo eecho, nkaambo wamuchitila chalweeno. ⁹ Na simalelo wakwe wayanda kumukkwatya kumwana wakwe mulombe, beelede kumuchitila mbubo mbuli mwana wakwe musimbi. ¹⁰ Na walikkwatila uumbi mwanakazi tayelede kuchesya chakulya chakwe, zyakuzwaata, nikuba zyeelelo zyamakkwatano. ¹¹ Pesi kuti taamupa eezi zintu zyotatwe, eelyo uyoyenda katakwe kuliya mali pe. ¹² Kufumbwa uuma muntu chakumujaya, nchobeni ooyo muntu uleelede kujayigwa. ¹³ Na muntu takwe naachita achaali, pesi anukuti chakutalibambila eelyo njoomulangwiida kwakuchijila. ¹⁴ Na mumntu wajaya mwenzinyina achaali mukwiindila mumizeezo yalweeno, eelyo amumugwisye nikuba kuti ulaachipayililo cha Leza, kuchitila kuti alakwe afwe. ¹⁵ Kufumbwa muntu uuma wisi nikuba banyina ninchobeni uleelede kujayigwa. ¹⁶ Kufumbwa muntu uubba muntunyina - nikuba kuti sikubba wamuuzya, na muntu ooyo wajanika mumaboko aakwe - ooyo sikubba bantu uleelede ajayigwe. ¹⁷ Kufumbwa muntu uutukila wisi nikuba banyina nchobeni uleelede kujayigwa. ¹⁸ Na bantu balwana alimwi umwi wuuma mweenzinyina abbwe niba mfayindi, alimwi ooyo muntu taafwa pe, pesi wachiswa biyo; ¹⁹ mpawo kuti wapona akukonzya kweenda amufunko, sikumuuma uleelede kuliya chiindi nchaakamusowela; alimwi uleelede kuliya kumusilisya kabotu. Pesi ooyo muntu takwe mulandu wakujaya pe. ²⁰ Na muntu wawuma muzike wakwe mwaalumi na mwanakazi amufunko, alimwi na muzike wafwa nkaambo kaluuma, eelyo ooyo muntu nchobeni uleelede kupegwa chisubulo. ²¹ Nikubaboobo, na mulanda wapona kwalimwi na aabili mazuba, simalelo wakwe tayelede kupegwa chisubulo pe nkaambo unoli wasweekelwa mulanda. ²² Na baalumi balwana akuumikizya mwanakazi uleeda alimwi wasowa katakwe amwi mpaachisigwa , eelyo sikuuma nchobeni uleelede kuliya mbuli mbwawamba mulumi wamwanakazi, alimwi uleelede kuliya mbuli mbubakabeteka babetesi. ²³ Pesi kuti wachisigwa kapati eelyo uleelede kuliya buumi kubuumi, ²⁴ liso kuliso, lino kulino, jaanza kujaanza, chituta kuchituta, ²⁵ kupya kukupya, chilonda kuchilonda, na mubunda kumubunda. ²⁶ Na muntu wawuma linso lyamulanda wakwe mwaalumi naba mwanakazi akulinyonyoona, eelyouleelede kwaangununa muzike mbuli luliyo nkaambo kalinso lyakwe. ²⁷ Na wakulumbula lino lyamulanda wakwe mwaalumi naba mulanda mwanakazi uleelede kwaangununa muzike mbuli luliyo lwalino lyakwe. ²⁸ Na musune wayasa mwaalumi naba mwanakazi nkabela wafwa, musune ooyo uleelede kutululwa mabwe, alimwi inyama yawo tiyeelede pe kulyigwa; pesi mwani musune tayeelede kupegwa mulandu pe. ²⁹ Pesi na kuti musune uli aachimbo kale chakuyasa, alimwi munaawo wakachenjezegwa nikubaboobo taakubamba alimwi wajaya mwaalumi naba mwanakazi, ooyo musune uleelede kutululwa alakwe, alakwe munaawo uleelede kujayigwa. ³⁰ Na luliyo lwayandikana nkaambo kabuumi bwabkwe, uleelede kuliya kufumbwa nchawambilwa kuti aliye. ³¹ Na musune wayasa mwana mulombe naba musimbi, muni musune uleelede kuchita mbubo mbuli mulawu ngumwaambilwa kuti achite. ³² Na musune wayasa muzike mwaalumi naba mwanakazi, munimusune uleelede kuliya masyekeli aansiliva aali makkumi otatwe, awulawo musune uleelede kujayigwa amabwe. ³³ Na muntu wajula mulindi, nikuba wasya mulindi akutawuvumba, alimwi musune niiba mbongolo yawida mukati kawo, ³⁴ muni mulindi uleelede kuliya. Uleelede kupa mali kuli mwani munyama, alimwi mutunta wamunyama ulaba wakwe. ³⁵ Na musune wamuntu wayasa musune wamweenzinyina nkabela wafwa, eelyo baleenda kusambala musune uuchipona akwaabana mali, alimwi akwaandwidana musune uufwide. ³⁶ Pesi na chakalizibikene kuti ooyo musune wakli aachimbo chakuyasa kale alimwi munaawo tawubambide pe, uleelede nchobeni kuliya musune kumusune, alimwi iifwide ilaba yakwe.