¹ Leza wakamba majwi aya: ² ''Ndime Jehova Leza wenu, wakamugwisya kuzwa munyika yaku Ijiputi, kuzwa mung'anda yabuzike. ³ Mutabi abamwi ba Leza kunembo lyangu. ⁴ Mutakalichitili chikozyanio chibezedwe chili mbuli chili kujulu, nikuba chili aansi ano, nikuba chili kunsi amanzi. ⁵ Mutakazifugamini kuli nzizyo nikuba kuzikomba nkambo ndime Jehova, Leza wenu, ndime Leza sibuzuba. Ndipa chisubulo kububi bwaba sinsiku akweta chisubulo kulunyungu, kumazyalane atatu alyane kuli babo batandiyandi me. ⁶ Pesi ndiyotondezya luyando kuzyuulu kulabo bandiyanda alimwi akubamba milawu yangu. ⁷ Muatakabwezi zina lya Jehova Leza wenu chabuyo, nkambo nsikoyomujata oyo utakwe mulandu ubweza zina lyangu chabiyo. ⁸ Yeya buzuba butegwa sababta, mukabusalazye kuli ndime. ⁹ Muyobeleka akuchita milimu yenu kwamazuba alimusanu abumwi. ¹⁰ Pesi buzuba bwamusanu aabili mbuzuba butegwa sabata bwa Jehova Leza wenu. Muli mbubo mutakachiti nikuba mulimu, iwebo, nikuba mwanako mulombe, nikuba mweenzu wako ukkede amulyango. ¹¹ Mumazuba alimusanu abumwi Jehova wakalenga ijulu anyika, ilwizi, azyonse zili mumo, alimwi wakalyokezya muzuba lyamusanu abili. Nkiinkako Jehova wakalongezya izuba litegwa sabata akulilongezya. ¹² Lemeka wuso abanyoko, kuchitila kuti upone chiindi chilamfu munyika Jehova Leza wako njanokupa. ¹³ Utajayi nikuba umwi. ¹⁴ Utachiti bwamu. ¹⁵ Utakabbidi umwi. ¹⁶ Utakaambi chakubeja kumwenzinyokwe. ¹⁷ Utakeemuzyi ng'anda yasimabambanwa wako, utakeemuzyi mwanakazi wasimabambanwa wako, mulanda wakwe mwalumi, mulanda wakwe mwanakazi, musune wakwe, indonki yakwe, nikuba chintu chasimabambanwa wako.'' ¹⁸ Bantu bonse bakabona mabbalubalu atulabi, alimwi bakamvwa ijwi lyamweembo, akubona chilundu kachizwa busi. Bantu nibakachibona bakateketa akwimikila kule. ¹⁹ Bakati kuli Mozesi, ''Aambula andiswe alimwi tuyokuswilizya; pesi utazumizyi Leza ambule andiswe, amwi tulafwa.'' ²⁰ Mozesi wakati kubantu, ''Mutayowi, Leza waza kuzomusunka kuchitila kuti bulemu bwakwe bube mulindinywe, kuchitila kuti mutakabisyi. ²¹ Aboobo bantu bakiima kule, alimwi Mozesi wakinkila mudima usiya awo Leza mpakabede. ²² Jehova wakati kuli Mozesi, ''Eezi nzizyo nzoyelede kubuzya bana ba Izilayeli: 'Nywebo lwanu mwabona kuti ndakambula andinwe kuzwa kujulu. ²³ Tamukoyolichitila lwenu ba Leza bambi kunze kwangu, baleza bansiliva nikuba baleza bangolida. ²⁴ Mukandichitile chipayililo chabulongo changu, akapayilile alinchicho chipayizyo chakuumppa, azipayizyo zyakuswanana, Imbelele zyenu chita zina lyangu kuti lilemekwe, ndiyobola kulindinwe akumulongezya. ²⁵ Kuti mwandichitila chipayililo chabbwe, mutakachiyakili amabwe apandwidwe, nkambo kuti wabelesya zibelesyo zyako alinchicho, unoli wachisofwazya. ²⁶ Toyelede kwinka kuchipayililo changu kumatambiliko, kuchitila kuti chinswe chako chitakaboneki antanganana.''