¹ Na muntu wabba musune niiba mbelele akwiijaya nikuba kwisambala, eelyo uleelede kuliya basune balimusamu aachimanga chamusune woomwe ambelele zyomwe achimanga chambelele. ² Na mubbi wajanwa kalokudonkola, alimwi wawumwa chakufwa, mukaambo kaliboobo takwe muntu upegwa mulandu wakujaya pe akaambo kakuchita kwakwe. ³ Pesi kuti izuba lyamuzwida katanadonkola, mulandu wakujaya ulapegwa kumuntu wamujaya. Mubbi uleelede kuliya. Na katakwe nchalaacho, mpawo uleelede kusambalwa nkambo kakubba kwakwe. ⁴ Na munyama wabbigwa wajanwa kalimuumbulu mujanza lyakwe, nekuba kuti musune, imbongolo, niiba mbelele, uleelede kuliya zyiindililde. ⁵ Na muntu wachezya lubono lwakwe mumuunda na mumasansa akulekela lubono lwakwe, alimwi lwakulyida mumunda wamwenzinyina, uleelede kuliya bubotu bwamuunda wakwe abubotu bwamasansa akwe. ⁶ Na mulilo wabuka akutenta lubaya lwamamvwa kuchitila kuti zilyo zilimumalwi, azilyo zyimvwi, nuuba muunda wapya, sikutenta uleelede nchobeni kuliya. ⁷ Na muntu wapa mali neluba lubono kumwenzinyina kuti alulondole kabotu, alimwi kuti lwabbigwa kung'anda yasikulondola, na kuti mubbi wajanwa. Oyo sikubba uleelede kuliya zyiindulwidwe. ⁸ Pesi kuti sikubba taajanwa, mpawo mwani ng'anda uleelede kuza kubabetesi kuti kukabonwe kuti ateni wakabika jaanza lyakwe kulubono lwamweenzinyina. ⁹ Kukukatazyania koonse atala achimwi chintu, naba musune, imbongolo, imbelele, zyakuzwata, akufumwa chiswekede nchawamba kuti, ''Echi chichangu ,'' lukazyanio lwabo bobile luyeledwe kweetwa kubabetesi. Oyo babetesi ngubayojana mulandu uleelede kuliya zyiindulwidwe kulisimayakilanwe wakwe. ¹⁰ Na muntu wapa mwenzinyina lubono, musune, imbelele, nekuba kuumbwa munyama wakuvuba, alimwi kuti wafwa nanka kulumwa nanka kubwezegwa kakutakwe nekuba woomwe wakamubona, ¹¹ chikonke kuli Jehova cheelede kuchitwa abaaba bobile, kuti takwe naba womwe akati kabo wakabikka jaanza lyakwe alubono lwasimamayakilane. Munaalo welede kuzitambula eezi, alimwi mwenzinyina tokoyoliya pe. ¹² Pesi kuti lwaka bbigwa kuzwa kulinguwe, umwi uleelede kuliya kuli mwani lubono. ¹³ Na munyama wazapawulwa, muleke umwi ayete munyama mbuli chitondezyo. Takoliya echo chazapawulwa pe. ¹⁴ Pesi na muntu wakumbila munyama kulisimayakilane alimwi munyama wachiswa na wafwa katali kuli mwanaawo, umwi wakwe uleelede nchobeni kuliya. ¹⁵ Pesi kuti walikuli mwanawo, mwenzinyina tayelede kuliya pe; na munyama walikubeleka chakufolola, uyoliyigwa amali yamufolo wayo. ¹⁶ Na mwaalumi weneena nakalindu utana kukwatwa, alimwi walalawe, uleelede nchobeni kumuchita banakwe akuliya lubono ndwayitilwa. ¹⁷ Na wisi wakakilila kumupa , uleelede kuliya mali ayelene alubono lwabanakalindu. ¹⁸ Mutazumizyi musondi kuti apone. ¹⁹ Kufumbwa muntu uulala amunyama welede kufwa. ²⁰ Kufumbwa muntu upayila kuli leza umbi utali Jehova ullelede kujayigwa. ²¹ Tamweelede kubisizya mweenzu nekuba kumudyamizya, nkambo mwakali beenzu munyika ya Ijipiti. ²² Mutapenzyi naba omwe mukamufu naa muchaala. ²³ Naa kuti mwabapenzya, alimwi bakkwila kulindime, nchobeni ndiyomvwa kulila kwabo. ²⁴ Bukkali bwangu buyobuka, alimwi ndiyomujaya apanga; banakazi bene bayoba bamukabafu, abana benu bayoba bamuchala. ²⁵ Na wakweletya mali kufumbwa kuli umwi wabantu bangu bachete akati kanu, toyelede kumubeda mbuli sikukweletya nekuba kumuliyisya mpindu. ²⁶ Na watola chibaki chamwenzinyokwe chakusyomezya, uleelede kuchibweedezya izuba kalitana bbila, ²⁷ nkambo nchicho luzutu chakuvumba chakwe; nchechicho chibaki chamubili wakwe. Nchiili chimbi nchanga ulalivumba aacho? Elyo nayoyita kulindime, ndiyo mumvwa nkambo ndilimubombe moyo. ²⁸ Toyelede kusampawula ndime, Leza, nanka kutukila mweendelezi wabantu bako. ²⁹ Toyelede kuyooleka kupayizya zyabutebuzi bwako na zikandilo zya wayini yako. Uyelede kundipa mwana mutaanzi wabana bako balombe. ³⁰ Uleelede alimwi kuchita mbubo kubasune bako ambelele zyako. Kwamazuba musanu aabili zileeledwe kuba antomwe amanyina, pesi mubuzuba bwamusanu aatatu uleelede kuzipa kuli ndime. ³¹ Muyoba bantu basalala kuli ndime. Nkenkaako tamweelede kulya nyama yakalumwa abanyama mumunda pe. Asi, kuti muleelede kwiisowela babwa .