¹ Linomwaalumi wa mukowa wa Levi wakakwata mwanakazi mu Levi. ² Mwanakazi wakaminta alimwi wakatumbuka mwana mulombe. Naakabona kuti mwana mulombe uuzyalikene kabotu, wakamusisa kwa myeezi itatu. ³ Pesi nakatachili kukonzya ku musisa, wakabumba chisuwo cha matete akuchisinka anzuka. Mpawo wakabika mwana mukati alimwi wachibika aakati kamatete mumanzi kumbali lya mulonga. ⁴ Muchizi wakwe wakayimikila kule-kule kuti abone chitachitike kulinguwe. ⁵ Mwana musimbi wa Falo wakaza kuzoosamba ku mulonga aawo basikumulinda bakali kuyoobweenda kabatobezya mulonga. Wakabona chisuwo aakati kamatete alimwi wakatuma umwi musimbi wabasikulinda kuti akachibweze. ⁶ Eelyo nakachivununa, wakabona mwana. Langa mwana wakali kulila. Wakamufwida luzyalo alimwi wakati, ''Ooyu nkasimpe ngumwi mwana wa ba Hebbulu.'' ⁷ Mpawo muchizi wa mwana wakati kumwana musimbi wa Falo, ''Ndiinke na alimwi nkakuyandwiide mwanakazi mu Hebbulu sikukulelela mwana?'' ⁸ Mwana musimbi wa Falo wakati kulinguwe, ''Koya.'' Aboobo mwana musimbi muniini wakayinka alimwi wakweeta banyina ba mwana. ⁹ Mwana musimbi wa Falo wakati kulibanyina bamwana, '''Bweza mwana ooyu alimwi umulele, alimwi nzokubbadala mufolo wako.'' Aboobo mwanakazi wakabweza mwana alimwi wakumulela. ¹⁰ Eelyo mwana nakakomena, wakamweeta kumwana musimbi wa Falo, alimwi wakaba mwana mulombe wakwe. Wakamuuzika kuti ngu Mozesi alimwi wakati, ''Nkaambo ndakamugwisya mumanzi.'' ¹¹ Ewlyo Mozesi nakali wakomena, wakayinka kubantu bakuli mbabo akulanga milimu yabo miyumu. Wakabona umwi waku Ijipiti kali kuuma mu Hebbulu, umwi wabantu bakwe mwini. ¹² Wakalanga kunzila eeyi ayilya, alimwi nakabona kuti takwe wakaliwo pe, wakajaya mu Ijipiti akusisa mubili wakwe mumuseele. ¹³ Wakabweda lubo buzuba butobela alimwi wakabona ba Hebbulu babili kabalookulwana. Wakati kuluumwi wakabisizye, ''Nkaambonzi nulookuchisa mweenzinyokwe?'' ¹⁴ Pesi mwaalumi wakati, ''Ngwani wakuchita kuti ube muzuluzi a kuba mubetesi aatala andiswe? Ulokubamba kundijaya na mbuli mbuwakajaya uulya mu Ijipiti?'' Mpawo Mozesi wakayowa alimwi wakati, ''Eecho nchindakachita nchobeni chakazibinkana kuli bamwi.'' ¹⁵ Lino Falo nakamvwa aatala acheechi, wakeezya kujaya Mozesi. Pesi Mozesi wakachija kuzwa kuli Falo akuyookkala munyika ya Midiyeni. Ooko wakakkede kumbali lya chikala. ¹⁶ Lino mupayizi wa Midiyeni wakali aabana basimbi bali musanu ababili. Bakaza, bateka manzi, alimwi bazuzya zinywido kuti banywisye lutanga lwa wisi. ¹⁷ Beembeli bakasika akweezya kubatanda, pesi Mozesi wakayinka alimwi wabagwasya. Mpawo wakanywisya lutanga lwabo. ¹⁸ Eelyo basimbi nibakabweeda kuli Lewuli wisi wabo, wakati, ''Nkaambonzi nimwafwambaana kusika kumunzi sunu?'' ¹⁹ Bakati, ''Mu Ijipita watuvuna ku beembeli. Alubo watutekela manzi alimwi wanywisya lutanga.'' ²⁰ Wakati kubana bakwe basimbi, ''Ani uli kuli? Mwamusiilaanzi? Mumwiite kuti akonzye kulya andiswe.'' ²¹ Mozesi wakazumina kukkala amwaalumi, ooyo wakamupa mwana wakwe musimbi Zipola kuti amukwate. ²² Wakazyala mwana mulombe, alimwi Mozesi wakati zina lyakwe ngu Gesyomu; wakati, ''Ndakalikkede munyika njesizi.'' ²³ Musule lya chiindi chilamfu, mwaami wa Ijipiti wakafwa. Ba Izilayeli bakatongawuka akaambo kamulimu wabuzike. Bakalilila lugwasyo, alimwi kukwiila kwabo kwakasika kuli Leza akaambo kabuzike bwabo. ²⁴ Eelyo Leza nakamvwa kulila kwabo, Leza wakayeya chizuminano chakwe a Abbulahamu, a Ayizeki alimwi a Jakkobbu. ²⁵ Leza wakabona ba Izilayeli alimwi wakamvwisisisya chiimo chabo.