¹ Yahuwe wakambila Mozesi a Aaloni munyika ya Ijipiti. Wakati, ² ''kuli ndinywe, mwezi uno uyoba matangunino yamyezi, mwezi mutaanzi wamwaka kuli ndinywe. ³ Wambila imbungano ya Izilayeli, 'mubuzuba bwamwezi uuno umwi awumwi ulelede kubweza kabelele na kana kampongo, imwi ayimwi mpuli ichite obo, kabelele kayimwi ayimwi ng'anda. ⁴ Na beng'anda bacheya kukabelele mwalumi ambabambene aabo beleede kubweza kabelele na inyama yakana kempongo eeyo inga ilazulila kumwelo wabantu. Yelede kuzulila kuli woonse kuti balye, aboobo belede kubweza inyama izulila boonse. ⁵ Kabelele kenu naa kana kampongo takelede kuba akampenda, kagutu kamwaaka umwi. Welede kubweza imwi yambelele na impongo. ⁶ Weleede kukabamba kusikila mubuzuba bwakkumi atune bwamwezi ooyo. Mpawo imbungano yoonse ya Izilayeli yelede kujaya banyama aaba igolezya. ⁷ Mulelede kubweza bumwi bulowa akububika aatala lyamabazu aabili amulyango aatala lyazikunguzyo zyamaanda mumuyolyida nyama. ⁸ Mwelede kulya inyama mansiku aayo, mwamana kwiyoka mumulilo. Mwiilye achinkwa chitakwe bumena, azisyu zilula. ⁹ Mutakilyi kili mbisi na kijikidwe amanzi. Kwinda boobo, mwiyoke mumulilo amutwe wayo, myeendo azyamukati. ¹⁰ Tamwelede kwisiya kusikila bukache. Mwelede kuumpa kufumbwa chicheede nibwacha. ¹¹ Mbubobu mbumwelede kwiilya: kamulyangide muzibuno, ansangu kumawulu anu amifunko mumaboko aanu. Mwelede kulya chakufwambana. Ndipobwe lyakwindilila lya Yahuwe. ¹² Yahuwe waamba obu: Ndiyoyinda akati kanyika ya Ijipiti busiku oobo akujaya boonse bana babantu batanzi ababanyama bali munyika ya Ijipiti. Ndiyoyeta chisubulo kuliba Leza ba Ijipiti. Ndime Yahuwe. ¹³ Bulowa buyoba chitondezyo amaanda aanu chakuboola kwangu kuli ndinywe. Eelyo ndabona bulowa, ndiyoyindilila kuli ndinywe nindiyolwisya nyika ya Ijipiti. Luumo olu talukoyomusikila pe akumujaya. ¹⁴ Buzuba oobu buyoba buzuba bwakuyeeya kuli ndinywe, mbumwelede kuyeya mbuli pobwe kuli Yahuwe, kwindilila kumazyalani anu, ncheezyanisyo nchimwelede kubamba mbuli pobwe kwalyoonse. ¹⁵ Muyolya chinkwa chitakwe bumena mumazuba alimusanu aabili. Mubuzuba butanzi muyogwisya bumena kuzwa kumaanda anu. Kufumbwa ulya chinkwa chila bumena kuzwa kubuzuba butanzi kuyosikila buzuba bwamusanu aabili, muntu oyo weelede kugwisigwa mu Izilayeli. ¹⁶ Mubuzuba butanzi kuyooba kubungana kusalalisya kuli ndime, mpawo mubuzuba bwamusanu aabili kuyoba kubungana kuliboobu. Takwe mulimu uyoochitwa mumazuba aaya, kunze kwakujikila boonse kuti balye. Oyu ngomulimu unga ulachitwa aandinywe. ¹⁷ Mwelede kulemeka ipobwe lyachinkwa chitakwe ibumena nkambo mbobuzuba obo mbundakagwisya mukwanzanisigwa kwanu munyika ya Ijipiti. Aboobo mulelede kulemeka buzuba oobu mumazyalane aanu woonse mbuli chezyanisyo kwalyoonse. ¹⁸ Mwelede kulya chinkwa chitakwe bumena kuzwa golezya lyabuzuba bwakkumi aane bwamwezi mutanzi wamwaaka kusikila golezya lyabuzuba bwamakkumi abili abumwi bwamwezi. ¹⁹ Kumazuba alimusanu aabili, takwe bumena bwelede kujanwa mumaanda anu. Kufumbwa ulya chinkwa chilabumena welede kutandwa mumunzi wa Izilayeli, nikuba kuti muntu oyo muzwakule naba muzyalwe wamunyika yenu. ²⁰ Tamwelede kulya chintu chipangwa abumena. Kufumbwa nkumukkala, mwelede kulya chinkwa chitakwe bumena.'''' ²¹ Mpawo Mozesi wakayita bapati boonse ba Izilayeli wabaambila kuti, ''kamuya mukasale tubelele na twana twampongo ooto tuyozulila kusanina impuli zyenu alimwi mukajaye kabelele kakwindilila. ²² Mpawo mukabweze mumpusa wahisopu akunika mubulowa oobo bunoli muchisambilo. Mukazile bulowa buli muchisambilo kujulu achikkunguzyo aminsende kuzwa aanze amulyango wang'anda kusikila buchee. ²³ Nkambo Yahuwe uyoyinda akati akulwanya ba Ijipiti. Nayobona bulowa bwakuchikunguzyo akuminsende iibili, uyoyindilila kumilyango yanu alimwi takoyozumizya basikujaya kuti basike kumaanda enu kuti bamujaye. ²⁴ Mwelede klemeka chitiko echi. Ooyu nguyoba mulawu wanu walyoonse abana banu. ²⁵ Eelyo nimuyonjila munyika eeyo Yahuwe njayomupa mbuli mbwakasyomezya kuchita, mulelede kulemeka bukombi oobu. ²⁶ Na bana banu bamubuzya kuti, bwambanzi bukombi bwamusyobo ooyu?' ²⁷ mpawo mwelede kwamba kuti, wayindilila, nkambo Yahuwe wayindilila mumaanda aba Izilayeli bali mu Ijipiti muchindi nakali kubalwanya ba Ijipita. Wakaangununa impuli zyesu.'' Mpawo bantu bakavundamina Yahuwe akumukomba. ²⁸ Ba Izilayeli bakachita mbubonya mbuli Yahuwe mbwakalayilila Mozesi a Aaloni. ²⁹ Zyakachitika akati kabusiku kuti Yahuwe ajaye boonse bana batanzi munyika ya Ijipita, kuzwa kumwana mutanzi wa Falawo, wakakkede achuno chabwami, kusikila kumwana mutanzi wamuntu ulimuntolongo abana batanzi bazivuubwa. ³⁰ Falawo wakabuka akati kabusiku - we, abalanda bakwe, aba Ijipita boonse. Kwakaba kulila kupati mu Ijipita nkambo tekwakali ng' anda yakatali amuntu wakafwide pe. ³¹ Falawo wakayita Mozesi a Aaloni mansiku akubambila kuti, munyampuke, muzwe akati kabantu bangu, inywe aba Izilayeli. Kamuya, mukakombe Yahuwe, mbuli mbumwambide kuti muyanda kuchita. ³² Amubweze mbelele zyenu ang' ombe zyenu, mbuli mbumwamba mpawo mwinke alimwi mundilongezye.'' ³³ Lino ba Ijipita bakakulubizya kapati kuti babatande munyika, nkambo bakaamba kuti, ''toonse tuyofwa.'' ³⁴ Aboobo bantu bakabweza mupelela wabo kabatabikide bumena. Zilongo zyabo zyakali zyaangwa kale amilembo amakkuko aabo. ³⁵ Lino bantu ba Izilayeli bakachita mbuli Mozesi mbwakabambila. Bakakumbila ba Ijipita zintu zyansiliva, azintu zyangolida mpawo azyakusama. ³⁶ Yahuwe wakachita ba Ijipita kuyanda kubotezya ba Izilayeli. Aboobo ba Ijipita bakabapa kufumbwa nchibakakumbila. Munzila njiyeyi, ba Izilayeli bakabbida ba Ijipita. ³⁷ Lino ba Izilayeli bakeenda kuzwa Lamasesi kusikila ku Sikkoti. Bakali mweelwe wakasiyande kuba kumyanda yazyululu zili makkumi alimusanu alimwi (600,000) wabalumi benda amawulu, kuyungizya abanakazi abana. ³⁸ Makamu avwelengene alawo akeenda aabo, antomwe ambelele ang'ombe, amweelwe mupati wazivuubwa. ³⁹ Bakajika chinkwa chitakwe bumena mumimpelela eeyo njibakeeta kuzwa ku Ijipita. Teyakali abumena nkambo bakali batandwa kuzwa ku Ijipita akubula mweenya wakubamba chakulya. ⁴⁰ Lino ba Izilayeli bakali kukkala mu Ijipita kwamyaka ili myanda iine amakkumi aatatu. (430) ⁴¹ Kumamanino amyaka iili makumi ilimyanda iine amakumi aatatu, mubuzuba oobo, boonse makamu abasilumamba ba Yahuwe bakazwa kunyika ya Ijipita. ⁴² Oobu bwakali busiku bwakulindila, bwa Yahuwe mbwakaba gwisya kuzwa kunyika ya Ijipita. Oobu bwakali busiku bwa Yahuwe kuti alemekwe aboonse ba Izilayeli mumazyalane aabo boonse. ⁴³ Yahuwe wakambila Mozesi a Aaloni, ''ngoyu mulawu wapobwe lyakwindilila: Takwe muzwakule uunga ulaabana mukulya. ⁴⁴ Nikuba boobo, muzike woonse waba Izilayeli, uwulidwe amali, nga ulalya amana kupalulwa. ⁴⁵ Ibeenzu ababelesi tabelede kulya kufumbwa chakulya. ⁴⁶ Lino kulya kulelede kulyidwa mung'anda imwi. Tamwelede kubweza inyama izwa mung'andampawo tamwelede kupwaya kafuwa kayo. ⁴⁷ Iguunzi lyoonse lya Izilayeli lilelede kulemeka ipobwe. ⁴⁸ Na kuli mwenzu ngumukkala aawe alimwi akuyanda kulemeka ipobwe lyakwindilila kuli Yahuwe, baluzubo bakwe balumi baleelede kupalulwa. Mpawo ngaulabola akulilemeka. Nga ulaba mbuli bantu bakazyalilwa munyika. Nikuba boobo, takwe muntu utapalwidwe unga ulalya kufumbwa chakulya. ⁴⁹ Mulawu nguwoyu ulabeleka kuli boonse bazyalwa muchisi akubeenzu bakkala akati kenu. ⁵⁰ Lino bana ba Izilayeli bakachita mbubo mbuli mbwakabalayilila Mozesi a Aaloni. ⁵¹ Nikwakaba buzuba mbubbobo Yahuwe wakagwisya Izilayeli kuzwa munyika ya Ijipita ankamu zyaba silumamba zyabo.