¹ Miabot kanako ang pulong ni Yahweh sa panon, nag-ingon, ² "Si Yahweh sa panon miingon niini: Mainiton ako alang sa Zion uban ang dakong kadasig ug mainiton ako alang kaniya uban ang dakong kasuko! ³ Miingon si Yahweh sa panon: Mobalik ako sa Zion ug magpuyo taliwala sa Jerusalem, kay ang Jerusalem pagatawgon nga Ang Siyudad sa Kamatuoran ug ang bukid ni Yahweh sa panon pagatawgon nga Ang Balaang Bukid! ⁴ Si Yahweh sa panon miingon niini: Anaa na usab ang mga tigulang nga kalalakin-an ug tigulang nga mga kababayen-an sa kadalanan sa Jerusalem, ug ang matag tawo magkinahanglan ug sungkod sa iyang kamot tungod kay tigulang na kaayo siya. ⁵ Ang kadalanan sa siyudad mapuno ug mga batang lalaki ug babaye nga magdula. ⁶ Si Yahweh sa panon miingon niini: Kung adunay butang daw imposible sa panan-aw sa nahibiling katawhan niadtong mga adlawa, kinahanglan ba nga imposible usab kini sa akong panan-aw? —mao kini ang gipahayag ni Yahweh. ⁷ Si Yahweh sa panon miingon niini : Tan-awa, hapit na Nako luwason ang akong katawhan gikan sa yuta diin nagasubang ang adlaw ug gikan sa yuta diin nagasalop ang adlaw! ⁸ Tungod kay ibalik ko sila, ug magpuyo sila taliwala sa Jerusalem, busa mahimo silang akong katawhan pag-usab, ug mahimo nila akong Dios sa kamatuoran ug sa pagkamatarong! ⁹ Si Yahweh Miingon niini : Kamo nga padayon nga nakadungog sa samang mga pulong nga gikan sa mga baba sa mga propeta sa dihang gitukod ang patukoranan sa akong balay—kini akong balay, si Yahweh sa panon: Lig-ona ang inyong mga kamot aron nga matukod ang templo. ¹⁰ Kay sa wala pa kadtong mga adlawa walay bisan kinsa nga nagkakuhag pananom, walay abot gikan sa tawo o mananap, ug walay kalinaw gikan sa mga kaaway alang kang bisan kinsa nga molakaw o mobalik. Gibutang ko ang matag tawo batok sa iyang silingan. ¹¹ Apan karon dili na maingon sa unang mga adlaw, magauban ako sa nahibilin nga mga katawhan—mao kini ang gipahayag ni Yahweh sa panon. ¹² Kay ang mga binhi sa kalinaw itanom na; ang mokatay nga paras magahatag sa bunga niini ug ang yuta mohatag sa iyang abot; ang kawanangan maghatag sa iyang yamog, kay ipapanunod ko kining tanang mga butang sa nahibiling katawhan. ¹³ Kamo ang mahimong panag-ingnan sa ubang mga nasod sa usa ka tunglo, balay sa Juda ug balay sa Israel. Busa luwason ko kamo ug mahimo kamong panalangin. Ayaw kamo kahadlok; himoang kusgan ang inyong mga kamot! ¹⁴ Kay si Yahweh sa panon nag-ingon niini: Sama nga naglaraw ako sa pagpasakit kaninyo sa dihang gihagit sa inyong katigulangan ang akong kasuko—miingon si Yahweh sa panon—ug wala mohunong, ¹⁵ busa magplano ako niining mga adlawa sa pagbuhat ug maayo ngadto sa Jerusalem ug sa balay ni Juda! Ayaw kahadlok! ¹⁶ Mao kini ang mga butang nga kinahanglan ninyong buhaton: Isulti ang kamatuoran, ang matag tawo uban sa iyang silingan. Paghukom uban ang kamatuoran, justisya, ug sa kalinaw diha sa inyong mga ganghaan. ¹⁷ Ayaw pag plano ug daotan diha sa inyong mga kasingkasing batok sa usag-usa, ug ayaw higugmaa ang bakak nga panumpa—tungod kay mao kini ang mga butang nga gikasilagan ko! —mao kini ang gipahayagni Yahweh." ¹⁸ Unya miabot kanako ang pulong ni Yahweh nga makagagahom, nga nag-ingon, ¹⁹ "Miingon niini si Yahweh: Ang mga puasa sa ikaupat nga bulan, sa ikalima nga bulan, sa ikapito nga bulan, ug sa ikanapulo nga bulan mahimong mga panahon sa kalipay, pagsadya, ug malipayon nga kasaulogan alang sa balay sa Juda! Busa higugmaa ang kamatuoran ug kalinaw! ²⁰ Miingon niini si Yahweh sa panon: Ang mga tawo mamalik pag-usab , bisan kadtong namuyo sa nagkalainlaing mga siyudad. ²¹ Moadto ang mga lumulupyo sa usa ka siyudad padulong sa laing siyudad ug moingon, "Mangadto kita aron maghangyo sa atubangan ni Yahweh ug mangita kang Yahweh! kami gayod ang moadto. ²² Daghang mga tawo ug kusgan nga mga nasod ang mangabot aron mangita kang Yahweh didto sa Jerusalem ug mohangyo sa pabor ni Yahweh! ²³ Miingon niini si Yahweh sa panon: niadtong mga adlawa napulo ka mga kalalakin-an gikan sa matag pinulongan ug nasod ang mokupot sa sidsid sa inyong kupo ug moingon, 'Paubana kami kaninyo, tungod kay nakadungog kami nga nag-uban ang Dios kaninyo!'"