¹ Sa ikaupat nga tuig nga paghari ni Haring Darius, sa ikaupat nga adlaw sa Kislev (ikasiyam kini nga bulan), miabot ang pulong ni Yahweh kang Zacarias. ² Gipadala sa katawhan sa Betel si Sharezer ug si Regem- Melec ug ang ilang mga kalalakin-an aron sa pagpakilouy sa atubangan ni Yahweh. ³ Nakigsulti sila sa mga pari nga anaa sa balay ni Yahweh sa panon ug sa mga propeta; miingon sila, "Magbangotan ba kami sa ikalimang bulan pinaagi sa pagpuasa, sama sa among gibuhat sa daghang mga katuigan?" ⁴ Busa miabot kanako ang pulong ni Yahweh sa panon, nga nag-ingon, ⁵ "Pakigsulti sa tanang katawhan sa yuta ug sa mga pari ug pag-ingon, "Sa dihang nagpuasa ug nagsubo kamo sa ikalima ug sa ikapitong bulan sulod sa kapituan ka katuigan, tinuod ba kamo nga nagpuasa alang kanako? ⁶ Sa dihang mikaon ug miinom kamo, wala ba kamo nagkaon ug nag-inom alang sa inyong kaugalingon? ⁷ Dili ba sama man niini nga mga pulong ang gipamulong ni Yahweh pinaagi sa baba sa kanhing mga propeta, sa dihang ang Jerusalem ug ang naglibot nga mga siyudad napuy-an ug nagmauswagon, ug ang Negev ug ang kapatagan sa kasadpan gipuy-an" ⁸ Miabot ang pulong ni Yahweh kang Zacarias, nag-ingon, ⁹ "Miingon niini si Yahweh sa panon, 'Paghukom uban sa matuod nga hustisya, kasabotan sa pagkamatinud-anon, ug kaluoy. Ipabuhat kini sa matag tawo ngadto sa iyang igsoon. ¹⁰ Mahitungod sa biyuda ug ilo, ang langyaw, ug ang tawong kabos—ayaw sila daugdaoga, ug ayaw tugoti ang bisan kinsa kaninyo nga maglaraw ug daotan sulod sa inyong kasingkasing batok sa uban.' ¹¹ Apan nagdumili sila sa pagpaminaw ug nagmagahi sa ilang mga abaga. Gisampongan nila ang ilang mga dalunggan aron nga dili sila makadungog. ¹² Gipagahi nila ang ilang mga kasingkasing sama sa bato aron nga dili nila madungog ang balaod o ang mga pulong ni Yahweh sa panon. Gipadala niya kini nga mga mensahe ngadto sa katawhan pinaagi sa iyang Espiritu kaniadto, pinaagi sa baba sa mga propeta. Apan nagdumili sa pagpaminaw ang katawhan, busa nasuko pag-ayo kanila si Yahweh sa panon. ¹³ Nahitabo kini sa dihang mitawag siya, wala sila namati. Sa samang paagi," miingon si Yahweh sa panon, "mosangpit sila kanako, apan dili ako mamati. ¹⁴ Tungod kay katagon ko sila pinaagi sa alimpos ngadto sa tanang kanasoran nga wala pa nila nakita, ug mahimong biniyaan ang yuta sunod kanila. Tungod kay walay moagi sa yuta o mobalik niini kay gihimo sa mga tawo ang maanindot nga yuta nga usa ka awa-aw."