Kapitulo 6

1 Unya milingi ako ug miyahat ug akong nakita ang upat ka mga karwahe nga mitungha taliwala sa duha ka bukid; ug ang duha ka bukid hinimo sa bronze. 2 Adunay pula nga mga kabayo ang unang karwahe, ang ikaduhang karwahe adunay itom nga mga kabayo, 3 adunay puti nga mga kabayo ang ikatulong karwahe, ug ang ikaupat nga karwahe adunay kabang nga mga kabayo. 4 Busa mitubag ako ug miingon sa anghel nga nakigsulti kanako, "Unsa man kini, akong agalon?" 5 Mitubag ang anghel ug miingon kanako, "Mao kini ang upat ka mga hangin sa langit nga migawas gikan sa dapit diin sila nanindog atubangan sa Ginoo sa tibuok kalibotan. 6 Moadto ang itom nga mga kabayo sa amihanan nga nasod; moadto ang puting mga kabayo sa kasadpang nasod; unya moadto ang kabang nga mga kabayo sa habagatang nasod." 7 Miadto ug nangita kining kusgan nga mga kabayo ug gilibot ang tibuok kalibotan, busa miingon ang anghel, "Lakaw ug libota ang kalibotan!" ug milakaw sila sa tibuok kalibotan. 8 Unya misangpit siya kanako ug miingon, "Tan-awa kadtong mangadto sa amihanang nasod; hupayon nila ang akong espiritu mahitungod sa amihanang nasod." 9 Busa miabot ang pulong ni Yahweh kanako, ug miingon, 10 "Kuhaa ang halad gikan sa mga bihag—gikan kang Heldai, Tobia, ug Jedaya—ug adto sa samang adlaw ug isulod sa balay ni Josia nga anak nga lalaki ni Zefania, nga gikan sa Babylon. 11 Unya kuhaa ang plata ug bulawan, pagbuhat ug korona ug ibutang kini sa ulo ni Josue nga anak nga lalaki ni Jehozadak, nga labawng pari. 12 Pakigsulti kaniya ug ingna, 'Miingon niini si Yahweh sa panon: Kini nga tawo, Sanga ang iyang ngalan! Modako siya diin siya nahimutang ug unya itukod ang templo ni Yahweh! 13 Siya mao ang motukod sa templo ni Yahweh, ug ibayaw ang katahom niini, unya molingkod siya ug magdumala diha sa iyang trono. Mahimo siyang pari sa iyang trono, ug ang panagsabot sa kalinaw maanaa taliwala sa duha. 14 Ang korona ihatag kang Heldai, Tobia, ug Jedaya ug kang Hen nga lalaki ni Zefania isip handomanan sa templo ni Yahweh. 15 Unya moabot kadtong tua sa halayo ug motukod sa templo ni Yahweh, aron masayran ninyo nga si Yahweh sa panon ang nagpadala nako diha kaninyo; tungod kay mahitabo lamang kini kung tinud-anay kamong maminaw sa tingog ni Yahweh nga inyong Dios!"