¹ Unya milingi ako ug mihangad, ug nakita ko, tan-awa, naglupad nga linukot nga basahon! ² Miingon ang anghel kanako, "Unsa man ang imong nakita?" Mitubag ako, "nakita ko ang naglupad nga linukot nga basahon, nga adunay baynte ka cubiko ang katas-on ug napulo ka cubiko ang kalapdon." ³ Unya miingon siya kanako, "Mao kini ang tunglo nga mogawas ibabaw sa tibuok kayutaan. Kay ang matag kawatan pagaputlon sumala sa giingon sa usa ka bahin, ug ang tanan nga misaad ug bakak nga panumpa pagaputlon sumala sa gisulti sa pikas nga bahin. ⁴ "Ipadala ko kini—mao kini ang gipahayag ni Yahweh sa panon— busa mosulod kini didto sa balay sa kawatan ug didto sa balay sa usa nga nanaad ug bakak nga panumpa gamit ang akong ngalan. Magpabilin kini sa iyang balay ug kotkuton ang kahoy ug ang mga bato niini." ⁵ Unya migawas ang anghel nga nakigsulti kanako ug miingon, "Iyahat ang imong mga mata ug tan-awa kung unsa ang umaabo!" ⁶ Miingon ako, "Unsa kini?" Miingon siya, "mao kini ang bukag nga gisudlan sa sukdanan nga moabotay. Mao kini ang ilang kalapasan sa tibuok yuta." ⁷ Unya gikuha ang tingga nga tabon sa bukag ug adunay babaye nga naglingkod ilalom niini! ⁸ Miingon ang anghel, "Mao kini ang Pagkadaotan!" Giitsa niya pabalik ang babaye pasulod ngadto sa bukag, ug gibutang niya ang tingga nga tabon ibabaw sa abrihanan niini. ⁹ Mihangad ako ug nakita ko ang duha ka babaye nga nagpadulong kanako, ug anaa ang hangin sa ilang mga pako—tungod kay aduna silay mga pako sama sa mga pako sa talabon. Gialsa nila ang bukag ngadto sa tungatunga sa yuta ug sa langit. ¹⁰ Busa miingon ako sa anghel nga nakigsulti kanako, "Asa man nila dad-on ang bukag?" ¹¹ Miingon siya kanako, "Sa pagtukod ug templo sa yuta sa Shinar alang niini, aron nga kung andam na ang templo, ipahimutang ang bukag didto sa giandam nga butanganan niini."