¹ Unya ang anghel nga nakigsulti kanako milingi ug nagpukaw kanako sama sa tawo nga gipukaw gikan sa iyang pagkatulog. ² Miingon siya kanako, "Unsa man ang imong nakita?" Miingon ako, "Nakakita ako ug tungtonganan sa suga nga hinimo gikan sa bulawan, uban ang panaksan nga anaa sa ibabaw niini. Aduna kini pito ka mga lampara ug pito usab ka mga pabilo sa ibabaw sa matag lampara. ³ Ug duha ka kahoy nga olibo tupad niini, ang usa anaa sa tuong bahin sa panaksan ug ang usa anaa sa wala. ⁴ Busa miingon ako pag-usab sa anghel nga nakigsulti kanako. "Unsa man ang buot ipasabot niining mga butanga, akong agalon?" ⁵ Mitubag ang anghel ug miingon, "Wala ka ba masayod kung unsay ipasabot niining mga butanga?" miingon ako, "Wala, akong agalon." ⁶ Busa miingon siya kanako, "Mao kini ang pulong ni Yahweh ngadto kang Zerubabel: Dili pinaagi sa kusog o sa gahom, apan pinaagi sa akong Espiritu, sumala ni Yahweh sa panon. ⁷ Unsa ka, dakong bukid? Sa atubangan ni Zerubabel ikaw mahimong patag, ug iyang pagawson ang kinatas-ang bato sa pagsingit ug 'Grasya! Grasya alang niini!'" ⁸ Miabot kanako ang pulong ni Yahweh, nga nag-ingon, ⁹ "Ang mga kamot ni Zerubabel maoy nagpahiluna sa patukoranan niini nga balay ug ang iyang kamot mismo ang mohuman niini." Unya masayod ka nga si Yahweh sa panon mao ang nagpadala kanako diha kanimo. ¹⁰ Kinsa man ang nagtamay sa adlaw sa gamay nga mga butang? Magmaya kining mga tawhana ug makita nila ang igtutonton nga bato nga anaa sa kamot ni Zerubabel. (Kining pito ka mga lampara mao ang mga mata ni Yahweh nga nagtan-aw sa tibuok kalibotan.)" ¹¹ Unya gipangutana ko ang anghel, "Unsa man kining duha ka mga kahoy nga olibo nga nagbarog sa wala ug tuo sa tungtunganan ug suga?" ¹² Nangutana ako pag-usab kaniya, "Unsa man kining duha ka mga sanga sa olibo nga anaa sa kilid sa duha ka bulawan nga mga tubo nga adunay lana nga nagdagayday niini?" ¹³ Unya miingon siya kanako, "Wala ka nasayod kung unsa kini?" Mitubag ako, "Wala, akong agalon." ¹⁴ Busa miingon siya, "Mao kini ang mga anak nga lalaki sa bag-ong lana sa olibo nga nagbarog sa atubangan sa Ginoo sa tibuok kalibotan."