¹ Unya gipakita ni Yahweh kanako si Josue nga pangulong pari nga nagtindog atubangan sa anghel ni Yahweh ug nagtindog si Satanas sa iyang tuo aron pagbutang butang kaniya ug sala. ² Miingon ang anghel ni Yahweh kang Satanas, "Hinaot nga badlongon ka ni Yahweh, Satanas; Hinaot nga si Yahweh, nga nagpili sa Jerusalem, magbadlong kanimo! Dili ba kini agipo nga gikuha gikan sa kalayo?" ³ Nagsul-ob si Josue ug hugaw nga bisti sa dihang nagtindog siya atubangan sa anghel. ⁴ Ug miingon ang anghel niadtong nagbarog sa iyang atubangan, "Hukasa gikan kaniya ang hugaw nga bisti." Unya miingon siya kang Josue, "Tan-awa! Gipapas ko na ang imong mga kalapasan ug sul-oban ko ikaw ug nindot nga bisti." ⁵ Miingon ako, "Ibutang ninyo ang hinlo nga purongpurong sa iyang ulo!" Busa gibutang nila kang Josue ang hinlo nga purongpurong ug gisul-oban siya ug limpyo nga bisti samtang nagtindog ang anghel ni Yahweh. ⁶ Pagkahuman ang anghel ni Yahweh nga maligdong misugo kang Josue ug miingon, ⁷ "Miingon niini si Yahweh nga makagagahom: Kung maglakaw ka sa akong mga dalan, ug kung tumanon nimo ang akong mga sugo, nan ikaw ang magdumala sa akong balay ug ang magbantay sa akong mga hawanan, tungod kay pagatugotan ko ikaw nga molakaw ug moanhi uban niining nagtindog sa akong atubangan. ⁸ Paminaw, Josue nga pangulong pari, ikaw ug ang imong mga kaubanan nga nagpuyo uban kanimo! Tungod kay kining mga kalalakin-an mao ang timailhan, tungod kay ako mismo ang magdala sa akong sulugoon nga mao ang Sanga. ⁹ Ug karon tan-awa ang bato nga akong gipahimutang sa atubangan ni Josue. Adunay pito ka mga mata niining usa ka bato, ug ikulit ko ang mga pulong—mao kini ang gipamulong ni Yahweh sa panon—ug sa usa ka adlaw kuhaon ko ang sala gikan niining maong yuta. ¹⁰ Nianang adlawa—mao kini ang gipahayag ni Yahweh sa panon—ang matag tawo gidapit sa iyang mga silingan aron sa paglingkod ilalom sa iyang kaparasan ug ilalom sa iyang kahoy nga igera."