¹ Pagkahuman akong gihangad ang akong mata ug nakita ko ang usa ka tawo nga nagdala ug igsusukod sa iyang kamot. ² Miingon ako, "Asa ka man moadto?" Busa miingon siya kanako, "Alang sa pagsukod sa Jerusalem, aron mahibaloan ang gilapdon ug kataas niini." ³ Unya milakaw ang anghel nga nakigsulti kanako ug migawas ang laing anghel aron sa pagsugat kaniya. ⁴ Miingon ang ikaduhang anghel kaniya, "Dagan ug sultihi kanang batan-ong lalaki; pag-ingon, 'Molingkod ang Jerusalem didto sa walay paril nga nasod tungod sa kadaghan sa mga lalaki ug mga mananap nga anaa kaniya. ⁵ Kay Ako - mao kini ang gipahayag ni Yahweh— alang kaniya mahimong usa ka kuta nga kalayo ang nagalibot kaniya, ug Ako mahimo himaya sa iyang taliwala. ⁶ Pagdali! Pagdali! palayo gikan sa yuta sa amihanan—mao kini ang gipahayag ni Yahweh— tungod kay gipatibulaag ko kamo sama sa upat ka mga hangin sa kawanangan! —Mao kini ang gipahayag ni Yahweh. ⁷ Pagdali! Ikyas ngadto sa Zion, kamo nga namuyo uban sa mga anak nga babaye sa Babilonia!''' ⁸ Tungod kay pagkahuman sa pagpasidungog ug pagpadala kanako ni Yahweh nga makagagahom batok sa mga nasod nga nangilog kaninyo— kay si bisan kinsa nga maghilabot kaninyo, nanghilabot sa gihigugma sa Dios! —human sa pagbuhat ni Yahweh niini, miingon siya, ⁹ "Ang akong mga kamot mismo ang motay-og kanila, ug ilogan sila sa ilang mga ulipon." Unya masayran ninyo nga si Yahweh nga makagagahom ang nagpadala kanako. ¹⁰ "Pag-awit alang sa kalipay, anak nga babaye sa Zion, tungod kay hapit na ako moanha ug mopuyo uban kaninyo! —Mao kini ang gipamulong ni Yahweh." ¹¹ Unya ang inila nga mga nasod maghiusa ngadto kang Yahweh nianang adlawa. Miingon siya, "Unya mamahimo kamong akong katawhan; tungod kay mopuyo ako taliwala kaninyo," ug masayran ninyo nga si Yahweh nga makagagahom ang nagpadala kanako nganha kaninyo. ¹² Kay si Yahweh magapanunod sa Juda ingon nga iyang katungod sa pagpanag-iya diha sa balaang yuta ug pilion pag-usab ang Jerusalem alang sa iyang kaugalingon. ¹³ Paghilom, kamong tanang binuhat, diha sa atubangan ni Yahweh, tungod kay mokanaog siya gikan sa iyang balaang dapit!