¹ Mao kini ang gipahayag sa pulong ni Yahweh mahitungod sa yuta sa Hadrac ug Damascus, dapit nga pahulayanan; kay ang mata sa tanang mga tawo ug tanang banay sa Israel anaa kang Yahweh. ² Kini nga pahayag mahitungod sa Hamat, diin ang utlanan sa Damascus, ug mahitungod kini sa Tyre ug Sidon, kay maalamon kaayo sila. ³ Nagtukod ug kota alang sa iyang kaugalingon ang Tyre ug nagpundo ug plata nga sama sa abog ug lunsay nga bulawan sama sa lapok sa kadalanan. ⁴ Tan-awa! Isalikway siya sa Ginoo ug gub-on ang iyang kusog diha sa kadagatan, mao nga lamoyon siya sa kalayo. ⁵ Makakita ang Ashkelon ug mahadlok! Mangurog usab sa hilabihan ang Gaza! Mapakyas ang paglaom ni Ekron! Mahanaw ang hari nga gikan sa Gaza, ug dili na gayod mapuy-an ang Ashkelon! ⁶ Mamuyo ang mga langyaw sa Ashdod, ug pagaputlon ko ang garbo sa mga Filistihanon. ⁷ Tungod kay wagtangon ko ang ilang dugo gikan sa ilang mga baba ug ang ilang mga pagkamalaw-ay taliwala sa ilang mga ngipon. Unya ang nahibilin mahimong alang sa atong Dios sama sa banay sa Juda, ug mahimong sama sa mga Jebusihanon ang Ekron. ⁸ Magkampo ako libot sa akong yuta batok sa kasundalohan sa kaaway, aron nga walay makaagi o makabalik, tungod kay wala nay madaogdaogon ang makalabang agi niini. kay ako ang magbantay sa akong yuta. ⁹ Pagsinggit uban ang dakong pagmaya, anak nga babaye sa Zion! Pagsinggit uban ang kalipay, anak nga babaye sa Jerusalem! Tan-awa! Moabot kanimo ang imong hari uban ang pagkamatarong ug iya kang luwason. Mapainubsanon siya ug nagsakay siya sa usa ka asno, sa nati sa usa ka asno. ¹⁰ Ug unya pagaputlon ko ang karwahe gikan sa Efraim ug ang kabayo gikan sa Jerusalem, ug pagaputlon ang pana gikan sa gubat; kay magsulti siyag kalinaw ngadto sa mga nasod, ug maanaa ang iyang pagdumala gikan sa dagat ngadto sa laing dagat, ug gikan sa Suba hangtod sa kinatumyan sa kalibotan! ¹¹ Alang kanimo, tungod sa dugo sa akong kasabotan diha kanimo, ipagawas ko ang imong mga binilanggo gikan sa gahong nga walay tubig. ¹² Balik sa kota, mga binilanggo sa paglaom! Bisan karong adlawa sultihan ko ikaw nga ibalik ko kini kanimo sa makaduha ka pilo, ¹³ tungod kay gibawog ko ang Juda ingon nga akong pana. Gipuno ko na ang akong sudlanan ni Efraim. Gipukaw ko ang imong mga anak nga lalaki, Zion, batok sa imong mga anak nga lalaki, Grecia, ug gihimo ko ikaw, Zion, nga sama sa espada sa manggugubat! ¹⁴ Motungha si Yahweh diha kanila, ug ang iyang mga udyong magapana sama sa kilat! Kay ang akong Ginoo si Yahweh mohuyop sa trumpeta ug mosulong uban ang mga bagyo gikan sa Teman. ¹⁵ Panalipdan sila ni Yahweh sa panon, ug lamyon nila sila ug buntogon ang mga bato sa ilang mga tirador. Ug unya moinom sila ug mosinggit sama sa mga kalalakin-an nga nahubog sa bino, ug mapuno sila ug bino nga daw mga panaksan, sama sa mga eskina sa halaran. ¹⁶ Busa luwason sila ni Yahweh nga ilang Dios nianang adlawa, ingon nga panon sa iyang katawhan. Sila ang mga bililhong bato sa usa ka korona nga modan-ag sa kayutaan. ¹⁷ Pagkamaayo ug pagkamaanyag niini! Ang mga batan-ong lalake molambo pinaagi sa trigo ug ang mga ulay sa matam-is nga bino!