¹ Mao kini ang gipahayag sa pulong ni Yahweh mahitungod sa Israel—ang pahayag ni Yahweh, nga nagbuklad sa kawanangan ug nagtukod sa patukoranan sa kalibotan, nga nag-umol sa espiritu sa kinasuloran sa tawo, ² "Tan-awa, hapit ko na himoon nga mahisama ang Jerusalem sa kupa hinungdan nga ang tanang katawhan nga naglibot kaniya magsuroy-suroy. Mahisama usab kini sa Juda sa takna nga pagalibotan na ang Jerusalem. ³ Nianang adlawa, himoon kong bug-at nga bato ang Jerusalem alang sa tanang katawhan. Si bisan kinsa nga buot mosulay sa pag-alsa niana nga bato masakitan pag-ayo sa iyang kaugalingon, ug ang tanang nasod sa kalibotan magtigom batok niana nga siyudad. ⁴ Nianang adlawa—mao kini ang gipahayag ni Yahweh—bunalan ko ang kabayo ug kalibog ug ang tigkabayo niini sa kabuang. Sa panimalay ni Juda ablihan ko ang akong mga mata, apan ang mga kabayo sa kasundalohan akong butaan. ⁵ Unya ang mga pangulo sa Juda moingon diha sa ilang kasingkasing, 'Ang mga lumolupyo sa Jerusalem mao ang atong kusog tungod kang Yahweh sa panon, nga ilang Dios.' ⁶ Nianang adlawa himoon ko ang mga pangulo sa Juda sa mga kolon taliwala sa kahoy ug sama sa mga nagsiga nga sulo taliwala sa nagbarog nga katrigohan, tungod kay lamyon nila ang tanang katawhan nga naglibot gikan sa ilang tuo ug wala. Jerusalem magpuyo pag-usab sa iyang kaugalingong dapit." ⁷ Unahon ni Yahweh pagluwas ang mga tolda sa Juda, aron nga ang dungog sa panimalay ni David ug ang dungog niadtong nagpuyo sa Jerusalem dili molabaw sa tibuok panimalay sa Juda. ⁸ Nianang adlawa si Yahweh mao ang manalipod sa mga lumolupyo sa Jerusalem, ug nianang adlawa kadtong huyang nga anaa kanila mahisama kang David, samtang ang panimalay ni David mahimong sama sa Dios, sama sa anghel ni Yahweh diha sa ilang atubangan. ⁹ "Nianang adlawa sugdan ko paglaglag ang tanang kanasoran nga moasdang batok sa Jerusalem. ¹⁰ Apan ibubo ko ang espiritu sa kaluoy ug ang paghangyo sa panimalay ni David ug sa mga lumolupyo sa Jerusalem, aron motan-aw sila kanako, ang ilang gidunggab. Magbangotan sila alang kanako, sama sa usa ka tawo nga nagbangotan alang sa iyang bugtong anak nga lalaki; magbangotan sila pag-ayo alang kaniya sama niadtong nagbangotan tungod sa kamatayon sa kamagulangang anak nga lalaki. ¹¹ Nianang adlawa ang mga pagbangotan sa Jerusalem mahisama sa pagbangotan sa Hadad Rimon sa kapatagan sa Megido. ¹² Magbangotan ang yuta, ang matag banay molain gikan sa ubang mga banay. Molain ang banay sa panimalay ni David ug ang ilang mga asawa molain usab gikan sa ilang mga bana. Molain usab ang banay sa panimalay ni Natan ug ang ilang mga asawa molain usab gikan sa ilang mga bana. ¹³ Molain usab ang banay gikan sa panimalay ni Levi ug ang ilang mga asawa molain usab gikan sa ilang mga bana. Molain usab ang banay sa mga Shimatihanon ug ang ilang mga asawa molain usab gikan sa ilang mga bana. ¹⁴ Ang matag banay nga nahibilin gikan sa mga banay—ang matag banay maglain usab ug ang mga asawa molain usab gikan sa ilang mga bana."