¹ Abrihi ang imong mga pultahan, Lebanon, aron ang kalayo molamoy sa imong mga sedro! ² Pagbangotan, sipros nga mga kahoy, kay nangatumba na ang mga kahoy nga sedro! Kung unsa ang kahalangdon pagagub-on! Pagbangotan! kamong mga akasya sa Bashan, kay ang kusgan nga kalasangan gipangputol na. ³ Nanghilak ang mga magbalantay , tungod kay nangagun-ob na ang ilang kabantog! Nagngulob ang mga batan-ong liyon, tungod kay ang garbo sa Suba sa Jordan naguba na! ⁴ Mao kini ang giingon ni Yahweh nga akong Dios, "Sama sa magbalantay, nga nagbantay sa mga karnero nga giandam aron ihawon! ⁵ (Ang mopalit kanila moihaw kanila ug dili silotan, ug ang mibaligya kanila magaingon, 'Dalaygon si Yahweh! Kay nahimo akong adunahan!' Tungod kay walay kaluoy ang mga magbalantay nga nagtrabaho alang sa tag-iya sa mga karnero) ⁶ Alang kanako wala na akoy kaluoy sa mga lumolupyo sa maong yuta! —mao kini ang gipahayag ni Yahweh. Tan-awa! Ako mismo hapit na motugyan sa matag-usa ka tawo ngadto sa kamot sa iyang silingan ug ngadto sa kamot sa iyang hari, ug gub-on nila ang yuta ug walay bisan usa kanila nga akong luwason gikan sa ilang kamot." ⁷ Busa nahimo akong magbalantay sa karnero nga giandam aron ihawon, alang niadtong nagabaligyag karnero. Nagdala ako ug duha ka sungkod; ang usa ka sungkod gitawag ko nga "Kaluoy" ug ang usa gitawag nako ug "Panaghiusa." Niini nga paagi gibantayan ko ang mga karnero. ⁸ Nawad-an ako ug pailob sa tulo ka magbalantay, ug gidumtan usab nila ako, hinungdan nga gipatay ko sila sulod sa usa ka bulan. ⁹ Unya giingnan ko ang mga tag-iya, "Dili na ako motrabaho ingon nga magbalantay alang kanimo. Ang karnero nga himalatyon—pasagdi nga mamatay; Ang karnero nga malaglag—pasagdi nga malaglag. Pasagdi nga kaonon sa nahibilin nga karnero ang unod sa iyang kauban." ¹⁰ Busa gikuha ko ang akong sungkod "Pabor" ug gibali ko kini aron sa pagputol sa kasabotan nga akong gihimo uban sa tanan kong mga kabanay. ¹¹ Nianang adlawa ang kasabotan nabali, ug kadtong nagbantay sa karnero ug nagtan-aw kanako nasayod nga si Yahweh nagsulti. ¹² Giingnan ko sila, "Kung maayo kini alang kaninyo, bayri ako sa akong suhol. Apan kung dili, ayaw kini buhata." Busa nagtimbang sila ug suhol alang kanako—ug mikabat kini ug katloan ka buok plata. ¹³ Unya miingon si Yahweh kanako, "Ibutang sa tipiganan ang mga plata, ang labing maayo unta nga presyo ang angay nilang ihatag kanimo!" Busa gikuha ko ang katloan kabuok nga plata ug gibutang kini sa tipiganan didto sa balay ni Yahweh. ¹⁴ Unya gibali ko ang ikaduha kong sungkod nga gitawag, "Panaghiusa," aron balion ang pagkamanagsoon tali sa Juda ug Israel. ¹⁵ Miingon si Yahweh kanako, "Usbon ko, dalha pag-usab ang galamiton sa buangbuang nga magbalantay alang sa imong kaugalingon, ¹⁶ kay tan-awa, hapit ko na butangan ug magbalantay ang yuta. Dili niya panumbalingon ang mga karnero nga himalatyon. Dili usab niya pangitaon ang karnero nga mawala, ni tambalan ang nangapiang nga karnero. Dili usab niya pakaonon ang mga himsog nga karnero, apan mokaon sa unod sa mga gipatambok nga karnero ug molaksi sa ilang mga kuko. ¹⁷ Pagkaalaot niadtong walay pulos nga magbalantay nga nagpasagad sa mga karnero! Hinaot nga ang espada maigo sa iyang bukton ug ang iyang tuong mata! Hinaot nga maputol ang iyang bukton ug mabuta ang iyang tuong mata!"