¹ Nianang adlawa maabri ang tubod alang sa panimalay ni David ug sa mga lumolupyo sa Jerusalem, alang sa ilang sala ug dili pagkaputli. ² Nianang adlawa—mao kini ang gipahayag ni Yahweh sa panon— putlon ko ang mga ngalan sa mga diosdios gikan sa yuta aron nga dili na gayod sila mahinumdoman pa. Palayason ko usab sa yuta ang mga mini nga propeta uban sa hugaw nila nga espiritu. ³ Si bisan kinsa nga tawo nga mopadayon sa pagpanagna, ang iyang amahan ug inahan nga nagpakatawo kaniya maoy mosulti kaniya, dili kana mabuhi', kay nagsulti ka ug bakak batok sa ngalan ni Yahweh!' Unya ang amahan ug inahan nga maoy naghimugso kaniya mao usab ang modunggab kaniya sa dihang managna siya. ⁴ Nianang adlawa ang matag propeta maulaw sa iyang panan-awon sa dihang managna siya. Kini nga mga propeta dili na mosul-ob sa ilang balhiboon nga bisti, aron sa paglimbong sa mga tawo. ⁵ Tungod kay ang matag-usa kanila moingon, 'Dili ako propeta! Usa lamang ako ka mag-uuma, kay ang yuta maoy akong buluhaton sa akong pagkabatan-on!' ⁶ Apan ang pipila moingon kaniya, 'Unsa man kining mga samad nga anaa sa imong mga bukton?' ug motubag siya, 'Samad kini sa dihang didto ako sa balay sa akong mga higala.'" ⁷ "Espada! Barog sa imong kaugalingon batok sa akong magbalantay, ang tawo nga nagtindog duol kanako—mao kini ang gipahayag ni Yahweh sa panon. Bunali ang magbalantay, ug ang mga karnero magkatibulaag! Tungod kay bakwion ko ang akong kamot batok niadtong mga ubos. ⁸ Unya mahitabo kini sa tibuok nga kayutaan—mao kini ang gipamulong ni Yahweh—nga ang 2/3 niini pagaputlon! Kadtong mga katawhan mangahanaw; ug ang usa ka bahin sa ikatulo mao lamang ang mahibilin didto. ⁹ Sunogon ko ang ikatulo nga bahin ug pinuhon kini sama sa pagpino sa plata nga gisunog; sulayan ko sila sama nga sulayan ang bulawan. Mosangpit sila sa akong ngalan, ug tubagon ko sila ug ingnon, 'Mao kini ang akong katawhan!' ug moingon sila, 'Si Yahweh mao ang akong Dios!"'