¹ Nagsugod na ba usab kami sa pagdayeg sa among kaugalingon? Dili na kami manginahanglan ug sulat sa pagpaila kaninyo o gikan kaninyo, sama sa ubang mga tawo, dili ba? ² Kamo mismo ang among sulat sa pagpaila, nga nahisulat sa among mga kasingkasing, nga naila na ug nabasa na sa tanang katawhan. ³ Ug nagpakita kamo nga kamo ang sulat gikan kang Cristo, gipadala pinaagi kanamo. Nahisulat kini dili pinaagi sa tinta kondili pinaagi sa Espiritu sa buhi nga Dios. Wala kini nahisulat sa mga papan sa bato, kondili diha sa papan sa kasingkasing sa mga tawo. ⁴ Ug mao kini ang pagsalig nga nabatonan namo diha sa Dios pinaagi kang Cristo. ⁵ Dili kami takos sa among kaugalingon nga moangkon sa bisan unsa nga naggikan kanamo. Hinuon, ang among katakos nagagikan sa Dios. ⁶ Ang Dios maoy naghimo kanamo nga mga sulugoon sa bag-ong pakigsaad. Kini usa ka pakigsaad dili sa sulat kondili sa Espiritu. Kay ang sulat makapatay, apan ang Espiritu nagahatag ug kinabuhi. ⁷ Karon ang pag-alagad nga nagbunga og kamatayon—kinulit nga mga letra ibabaw sa mga bato—miabot sa hilabihan nga himaya nga ang mga anak sa Israel dili makatutok sa diretso sa nawong ni Moises. Kini tungod sa himaya sa iyang nawong, usa ka himaya nga nagakahanaw. ⁸ Unsa pa gayod kamahimayaon unya ang pag-alagad nga buhaton sa Espiritu? ⁹ Kay kung ang pag-alagad sa pagkahinukman sa silot adunay himaya, unsa pa ka labaw pa nga ang pag-alagad sa pagkamatarung modagaya sa himaya! ¹⁰ Kay sa pagkatinuod, kadtong gihimo kaniadto nga mahimayaon dili na mahimayaon niining bahina, tungod sa himaya nga labaw niini. ¹¹ Kay kung kadtong miagi adunay himaya, unsa pa kaha ka labaw kadtong nagpabilin nga adunay himaya! ¹² Sanglit aduna man kami niana nga paglaom, maisugon gayod kami. ¹³ Dili kami sama kang Moises, nga mitabon sa iyang nawong aron nga ang katawhan sa Israel dili makatan-aw derikta sa katapusang himaya nga molabay lamang. ¹⁴ Apan sirado ang ilang mga hunahuna. Kay hangtod karon, sa dihang ilang basahon ang daang kasabotan, kanang maong tabil nagpabilin. Wala kini gitangtang, tungod kay diha lamang kang Cristo gikuha kini. ¹⁵ Apan bisan gani karon, sa matag higayon nga basahon si Moises, ang tabon nagpabilin gihapon sa ilang mga kasingkasing. ¹⁶ Apan sa dihang ang tawo modangop sa Ginoo, ang tabon pagakuhaon. ¹⁷ Karon ang Ginoo mao ang Espiritu. Kung diin ang Espiritu sa Ginoo, adunay kagawasan. ¹⁸ Karon kitang tanan, uban sa walay tabon nga mga panagway, makakita na sa himaya sa Ginoo. Giusab na kita sa mao gihapon nga mahimayaong panagway sa unang ang-ang sa himaya ngadto sa lain, ingon nga gikan sa Ginoo, nga mao ang Espiritu.