¹ Busa nakahukom ako sa akong kaugalingon nga dili na gayod ako moanha pag-usab kaninyo nga may masakit nga mga kahimtang. ² Kung nakapasakit ako kaninyo, kinsa man ang makapadasig kanako dili ba kamo lamang nga akong napasakitan? ³ Nagsulat ako sama sa akong gibuhat aron nga sa dihang moanha na ako kaninyo dili na ako mapasakitan niadtong magpalipay unta kanako. Aduna akoy pagsalig mahitungod kaninyong tanan nga ang akong kalipay sama sa kalipay nga anaa kaninyong tanan. ⁴ Kay nagsulat ako kaninyo gikan sa dakong kagul-anan, uban sa kasakit sa kasingkasing, ug sa hilabihan nga paghilak. Dili ko gusto nga mapasakitan ko kamo. Hinuon, gusto nako nga makahibalo kamo sa giladmon sa akong gugma diha kaninyo. ⁵ Kung adunay hinungdan sa kasakit, wala lamang siya nagpasakit kanako, apan sa pipila pang pamaagi — dili kini ibutang sa hilabihan ka mapintas nga pagkaingon — diha kaninyong tanan. ⁶ Kini nga pagsilot pinaagi sa kadaghanan igo na nianang tawhana. ⁷ Busa karon kaysa sa silotan, kinahanglan nga pasayloon ninyo ug hupayon siya. Buhata kini aron nga dili siya mabug-atan pinaagi sa tumang kasubo. ⁸ Busa gidasig ko kamo nga pamatud-an sa kadaghanan ang inyong gugma alang kaniya. ⁹ Mao kini ang hinungdan nga ako nagsulat, aron nga masulayan ko kamo ug masayran kung matinumanon ba kamo sa tanang butang. ¹⁰ Kung inyong pasayloon si bisan kinsa, pasayloon ko usab kanang tawhana. Ang akong gipasaylo — kung may gipasaylo man ako — gipasaylo na kini alang sa inyong kaayohan diha sa presensya ni Cristo. ¹¹ Mao kini aron dili kita malimbongan ni Satanas. Kay nasayod na kita sa iyang mga plano. ¹² Ang usa ka pultahan giablihan sa Ginoo alang kanako sa dihang miabot ako sa siyudad sa Troas aron sa pagsangyaw didto sa ebanghelyo ni Cristo. ¹³ Wala akoy kahupayan sa akong espiritu tungod kay wala nako hikaplagi didto ang akong igsoon nga si Tito. Busa gibiyaan ko sila ug miadto sa Macedonia. ¹⁴ Apan salamat sa Dios, nga diha kang Cristo kanunay nga nag-giya kanato diha sa kadaogan. Pinaagi kanato gipakaylap niya bisan asa ang kahumot sa kahibalo mahitungod kaniya. ¹⁵ Kay kita alang sa Dios ang matam-is nga kahumot ni Cristo, sa taliwala sa mga nangaluwas ug sa mga nagakawala. ¹⁶ Alang sa mga tawo nga nagakawala, kini usa ka kahumot gikan sa kamatayon hangtod sa kamatayon. Niadtong mga naluwas, mao kini ang humot gikan sa kinabuhi hangtod sa kinabuhi. Kinsa man ang takos niining mga butanga? ¹⁷ Kay dili kita sama sa daghang mga tawo nga nagbaligya sa pulong sa Dios aron makasapi. Hinuon, uban sa putli nga panghunahuna, nagsulti kita diha kang Cristo, ingon nga kita gipadala gikan sa Dios, diha sa panan-aw sa Dios.