¹ Busa, tungod kay aduna kami niini nga buluhaton, ug ingon nga nakadawat kami sa kaluoy, wala kami magpakaluya. ² Hinuon, among gisalikway ang mga tinago ug makauulaw nga buhat . Wala kami magkinabuhi sa pagpanglimbong, ug wala namo tuisa ang pulong sa Dios. Pinaagi sa pagpadayag sa kamatuoran, gitugyan namo ang among mga kaugalingon diha sa konsensya sa matag-usa atubangan sa Dios. ³ Apan kung natabonan ang among ebanghelyo, natabonan lamang kini niadtong nangawala. ⁴ Sa ilaha nga bahin, ang dios niining kalibotana maoy nagbuta sa ilang dili-matinuohon nga mga hunahuna. Ug tungod niini, dili sila makakita sa kahayag sa ebanghelyo diha sa himaya ni Cristo, nga mao ang hulagway sa Dios. ⁵ Kay wala kami nagmantala sa among kaugalingon, kondili kang Cristo Jesus ingon nga Ginoo, ug sa among kaugalingon ingon nga inyong sulugoon tungod ug alang kang Jesus. ⁶ Kay ang Dios mao ang nag-ingon, "Ang kahayag modan-ag diha sa kangitngit." Midan-ag siya sa among mga kasingkasing, aron mohatag sa kahayag sa kahibalo diha sa himaya sa Dios sa presensya ni Jesu-Cristo. ⁷ Apan aduna kami niining bahandi sulod sa mga banga nga kolon, aron nga mapatin-aw kini nga ang hilabihan ka dakong gahom iya sa Dios ug dili kanamo. ⁸ Gipaantos kami sa tanang paagi, apan wala kami mapildi. Nangalibog kami apan wala gayod kami mawad-i ug paglaom. ⁹ Ginalutos kami apan wala pasagdi. Gidagmalan kami apan wala mapukan. ¹⁰ Ginadala namo kanunay sa among lawas ang kamatayon ni Jesus, aron nga ang kinabuhi ni Jesus mapakita usab sa among lawas. ¹¹ Kay kami nga buhi kanunay ginatugyan sa kamatayon tungod og alang kang Jesus, aron nga ang kinabuhi ni Jesus maipakita sa among tawhanong mga lawas. ¹² Busa ang kamatayon mao ang namuhat dinhi kanamo, apan ang kinabuhi mao ang namuhat diha kaninyo. ¹³ Apan aduna kitay managsama nga espiritu sa pagtuo sumala sa nahisulat na: "Mituo ako, busa nagsulti na ako." Mituo usab kami, ug busa nagsulti usab kami, ¹⁴ Tungod kay nasayod kami nga ang nagbanhaw kang Ginoong Jesus magabanhaw usab kanamo uban kang Jesus ug pagadad-on niya kami kauban ninyo didto sa iyang atubangan. ¹⁵ Kay ang tanang butang alang sa inyong kaayohan, aron nga sa ingon nga ang grasya mapakaylap ngadto sa daghan pang katawhan nga hinungdan sa pagpasalamat nga magkadaghan alang sa kahimayaan sa Dios. ¹⁶ Busa wala kami magakaluya. Bisan tuod sa gawas nag-anam kami ug kadunot, apan sa kinasuloran gibag-o kami sa matag adlaw. ¹⁷ Kay niini nga panahon, ang gaan nga kagul-anan mao ang nag-andam kanamo alang sa walay kataposan nga gibug-aton sa himaya nga wala gayoy makasukod. ¹⁸ Kay wala kami motan-aw sa mga butang nga makita, kondili alang sa mga butang nga dili makita. Ang mga butang nga among makita lumalabay lamang, apan ang mga butang nga dili makita mao ang malungtaron.