¹ Izy koa fa nandeha tagny Jerosalema agny irô, nahay nagnatogno Betifaga ndraiky Betania, agny amin' ny bongon' ny Jerosalema fo irô, aviô, nagniraka lehilahy aroe tamin'ny mpianatranany Jesosy, ² Abakô nvolagna tamindrô Izy nagnano hoe:" Mandihana amin'ny bongo hely alohantsika iry anarô. Izy koa fa navy avy ao anarô, hahita zanaka boriky mbala tsaro nindronan' olo. Vahanarô izy, bakô, indesinarô aminakaha aty. ³ Izy koa misy olo mivolagna aminarô : "Nagnignino ma anarô magnano raha karaty?" Volagninarô aminany hoe: "Misy raha tadiavan' ny Tompo izy, aviô izy ampody malaky aty". ⁴ Avy tiô, nandeha niboaka irô, aviô, nahita zana-boriky nifehy tambelagna tragno tankilan' ny varavaragna araiky tamy sisin-dàlagna tiô irô, sady nivahandrô izy. ⁵ Nisy olo sasany nitsangagna tiô nivolagna tamidrô hoe: "Ino ma raha ataonarô ty, karaha nivahanarô zana-boriky io?" ⁶ Aviô, nivolagniny tamindrô raha nivolagnin' i Jesosy tamin-drô, kai nambelandrô handeha amizay irô. ⁷ Nindesin' ny mpianatra aroe lahy tamy Jesosy tiô zana-boriky igny, aviô zegny, nataondrô tagnabo nany tiô lambandrô mba havitan' ny Jesosy miondragna. ⁸ Naro olo koa namelatra lambandrô tamin'ny làlagna. Olo sasany koa zegny namelatra tagnantagnan' ny kakazo nitapahan-drô tagnaty ala tagny. ⁹ Irô olo nandeha talohanany draiky irô nagnaraka Izy, samby nivolagna maré: "Hosana! Deraigny araiky boaka amin'ny agnaran' ny Tompo. ¹⁰ Deraigny ny fanjakagna ho avin'ny Davida babantsika! Hosana! Agny amin'ny Araiky tegna agnabo!" ¹¹ Nihidriky tao Jerisalema tao amzay Jesosy, kai ndehandeha tan-tokotanin'ny tragnon-dRagnahary tiô Izy sady nizahazaha raha jiaby tao. Izy koa fa nahay ariva andra, nandeha tagny Betania tagny Izy ndraiky irô aroa ambin'ny folo lahy. ¹² Kiaka andra, izy koa fa nimpody tagny Betania tagny irô, naharegny silongno Izy. ¹³ Nahatazagna vodin'ny aviavy araiky vagnogno Izy, kai nagnatogno Izy hizaha tsoha fo misy voany aminany. Izikoa fa navy tiô, tsy nahita raha afa Izy koa tsy raviny fo, tsendriky fotoagna famoazany loatra tamin' ny zegny. ¹⁴ Kay nivolagny taminany tiô fa: "Tsisy mpihinagna eky voa boaka aminaoandrakizay." Ary regnin'ny mpianatranany tiô raha zegny. ¹⁵ Nandeha tagny Jerosalema irô, aviô nidriky tamin'ny tokotanin'ny tragnon-dRagnahary tao Izy sady nanomboko nandroaka mpivarotro draiky mpividy jiaby tao Izy. Narongany latabatran-drô mpanakalo vola draiky sezin-drô mpivarotro pigeon aby tao. ¹⁶ Tsisy olo nomboany hitondra raha mety alafo hihidriky tao eky. ¹⁷ Nampianatra irô Izy nivolagna hoe: "Tsy efa voasoratra ma hoe: 'Tragnonaka zegny tragno fivavahan ny firenena jiaby?' Kanefa ataonarô tany fivorian'ny mpangalatra." ¹⁸ Regnin-drô lohan'ny mpisorogno ndraiky irô mpahay lalàgna aby tao raha nivolagniny, kai nizaha fomba hamonoagna Izy koa zegny irô. Kanefa, natahoran-drô Izy fotony vahoaka jiaby tiô samby rikiagna nitandregny fampianaragnanany. ¹⁹ Izy koa fa aligny andra, niala tan-tànagna tao irô. ²⁰ Izy koa fa nandeha irô narandraigny, nahita aviavigny irô efa nalazo zisaka amin'ny vahiny. ²¹ Nahatsiaro amzay Petera sady nivolagna hoe: "Raby, zahava baka! nalazo aviavy nohozogninao igny." ²² Navalin' ny Jesosy irô: "Mba minoa Zagnahary anarô. ²³ Volagniko aminarô ny tegna marigny fa, na zôvy na zôvy mivolagna amin'ny bongo ity hoe: 'Mitsangana avio milavoa andranomasigny agny', izy koa tsisy fisalasalagna am-pô nany sady mino fa tegna hisy marigny raha nivolagniny, kara zegny koa raha ataon-dRagnahary. ²⁴ Boaka amin' ny zegny ivolagnako aminarô fa : "Raha jiaby ivavahanarô ndraiky angatahinarô, matokisa fa efa nazonarô aby sady tsy maintsy ho azonarô koa. ²⁵ Anarô koa fa mivavaka, tsy maintsy mamela heloko jiaby anagnanarô na amin-jôvy na amin-jôvy arô, baika ambelan'ny babanarô an-dangitry agny koa fahotagnanarô igny. ²⁶ [Fagnamarihagna: Ny fandikagna tegna tsara tsy magnisy ny hoe: (Zahava amin'ny Matio 16:15) Mk.11:26" Anarô koa tsy mamela heloko, tsy hamela fahotagnanarô koa babanarô an-dangitra agny."] ²⁷ Nandeha nanonga tagny Jerosalema tagny koa irô. sady koa fa nandèhandèha tan-tragnon-dRagnahary tao Jesosy, navy nagnontany Izy tiô irô lohandohan'ny mpisorogno, irô mpahay lalàgna, ndraiky irô olo maventy amin'ny tanàna tao. ²⁸ Kay nivolagnindrô taminany:"Fahefagna boaka ahia ma agnanaovanao raha jiaby io, azovy koa ma nagnamia làlagna anao hagnano raha aby regny?" ²⁹ Navalin' i Jesosy tamin-dro hoe: "Agnapetrako fagnontaniagna araiky anarô, ambara za akendriky aviô za mivolagna aminarô boaka ahia agnanovako raha jiaby io. ³⁰ Batisan'i Jaona ma boaka an-dagnitry sa boaka amin'ny olo?. Valia baka zegny." ³¹ Niaraka nandiniky amzay irô sady nifamaly ndraiky nivolagna hoe: "Izy koa volagnintsika fa: 'Boaka an-dagnitry', hivolagna Izy hoe: 'Nagnino basy ninoanarô izy? ³² Izikoa ndraik atsika namaly: "Boaka amin'olo,'...." Navozo olo tiô zegny irô fotony efa resy lahatra olo jiaby, fa tegna mpaminany marigny i Jaona. ³³ Aviô, nivolagnindrô tamy Jesosy: "Tsy hainay". Nivolagna tamindrô Jesosy hoe: "Za koa baka tsy hivolagna aminarô fahefagna boaka ahia agnanaovako raha jiaby iô."