¹ Niala tamin' io tany io Jesosy da nande tame faritrin' i Jodia sady tame moron-dranon' i Jordana, da nagnantogny an'Azy teo e fokonolo . Araky e faniny, da nampianatry andreo indraiky Izy. ² Da nagnantogny an'Azy e fariseo hitsapa an'Azy da nagnontany: "Ara-dalàgny ho an'e lelà me e misaraky ame vadiny?" ³ Namaly Izy: "Ino me e nandidian' i Mosesy anareo? ⁴ Da hoy indreo se: "Mosesy da namela raiky e lelà hanoratry taratasy fagnamarinagny e fisaraham-panambadiagny sady mandefa an'azy avy eo." ⁵ Da hoy i Jesosy tamindreo: "Nohon' e di- dohanareo avao e nanoratany an'izany lalàgny izany". ⁶ "Fa tame voalohany e famorognagny, Andriamanitry nagnamboatry andreo ho lelà da viavy." ⁷ Noho izay antony izany da hiala an' i abany amy endriny gne lelà, da hikambagny ame vadiny, da anjary nofotry raiky indreo roy". ⁸ Tsy ho roy sanaky indreo fa ho nofotry raiky avao. ⁹ Ka izay natambatr'Andriamanitry, da aoky tsy ho sarahin' olombelogny ." ¹⁰ Da rehefa avy tandragno indreo, d mbola nagnontany mikasiky an' izany avao e mpianatry. ¹¹ Da hoy Izy tamindreo se: "Ndre ia ndre ia lelà misaraky ame vadiny, ka avy eo magnakatry viavy hafa koa da mijangajanga. ¹² Ra misaraky ame vadiny e viavy ka mbola miakatry ame lelà hafa, da mijangajanga izy." ¹³ Avy teo indreoda ninday e zanan-dreo tamin' azy mba hametrany tagna, f'izy novigniran' e mpianatry indreo. ¹⁴ Fa refa kendrin' i Jesosy izany, da vignitry be Izy sady nizaka tamindreo hoe: "Avelay e zaza hagnantogny Anà, fa ka raràgny indreo, fa e fanjakan'Andriamanitry da an' e olo ako indreo io. ¹⁵ Da zakaiko marina aminareo lateo, ndre ia ndre ia tsy mandray e fanjakan'Andriamanitry ako e zaza io da tsy hiditry amin' izany mihintsy. ¹⁶ Avy teo da notrotrognony io zaza io da notsofiny rano sady nametrahany tagna. ¹⁷ Da refa nanomboky e diany Izy, da nisy lelà niazakazaky nandoaliky tamin' Azy, sady nagnontany hoe: "ô mpampianatry tsara , ino e tsy maintsy aniko mba handovàko e fiainagny mandrakizay?" ¹⁸ Da hoy i Jesosy se: "Nagnino me raha aninao tsara Iao? tsy misy tsara, afa-ts'Andriamanitry raiky avao. ¹⁹ Fantatrao e didy hoe: "ka mamono olo, ka mijangajanga, ka mangalatry, ka mijoro ho vavolombelo tsy marigny, ka mamitaky, hajay i abanao izy am'endrinao". ²⁰ Da hoy igny lelà igny se: "Mpampianatry ô! efa naniko nanomboky tame fahatanorako agnaby an'io raha zakainao io". ²¹ Nagnety an'azy i Jesosy da tia an'azy. Da hoy izy tamin' azy se: 'Misy raha raiky banga gn'aminao. Tsy maintsy avidinao agnaby e fanagnanao, da omenao e mahantra izany, da zay anao vô hanan-karegny an-dagnitry agny. Avy teo da magnaraha Anà." ²² Noho izany filazagny izany da nalahelo izy sady vaivay, satria da nanandrà tokôtry izy. ²³ Nagnety gne magnodidigny an'Azy i Jesosy sady nizaka tame mpianatriny hoe: "Tena sarotry ho an' e manandrà be e miditry ame Fanjakan' Andriamanitry". ²⁴ Da gaga tame zakany e mpianatry. Fa hoy i Jesosy indraiky tamindreo: " Zanako! sarotry e fidiragny ame Fanjakn' Andriamanitry! ²⁵ Mora ame rameva e miditry ame vody filo, toy izay e hidiran' e mpanandrà ame Fanjakan' Andriamanitry." ²⁶ Da mbola gaga avao e mpianatry sady nifagnontany indreo hoe: "Ia zany e ho afaky ho vohavonjy?" ²⁷ Nagnety andreo i Jesosy da hoy Izy: "Tsy vitan' olo izany, fa vitan' Andriamanitry. Satria hain' Andriamanitry e magnambotry e raha agnaby." ²⁸ Da nanomboky nizaka tamin'Azy i Petera hoe; "Iteo, Iay toa da nahafoy e raha agnaby, sady da nagnaraky anao." ²⁹ Da hoy i Jesosy: "Zakaiko marina aminareo, tsy misy olo niala e tragnony, na e rahalàny, na e rahavaviny, na i endriny, na i abany, na e zanany, na e taniny noho gne aminà, izy ame filazantsara, ³⁰ ka tsy nitombo in-jaton'e teo aloha amin'izao taonjato amin'izao fotoagny izao: da tragno, rahalà, rahavavy, reny, zanaky, tany, miaraky ame fagnenjehagny, sady ame taon-jato ho avy, da e fiainagny mandrakizay. ³¹ Fa maro gne voalohany ho lasa farany, ary e farany ho lasa voalohany". ³² Tegny an-dalagny indreo, hiakatry ho an' i Jerosalema, da nandeha talohandreo i Jesosy. Gaga e mpianatry, da e olo nagnaraky an'Azy tafara, da natahotry. Nangian' i Jesosy indraiky koa indreo roy ambinifolo, da nanomboky nizaka e raha mety ho avy amin'Azy tsy ho ela Izy. ³³ Iteo, miakatry an'i Jerosolema itsika izao, da hatolotry e mpisoragny be izy ame mpanoradalàgny e Zanak' Olo. Hovonoindreo ho maty Izy da homendreo e Jentilisa. ³⁴ Harabindreo Izy, handrorandreo, hovangoindreo, homatindreo Izy. F' izy, telo andro afaran'izany ahafatesany izany da hitsangagny ame maty Izy." ³⁵ Jakoba sy Jaona, zanak'i Zebedio, nagnatogny an'Azy sady nizaka tamin'Azy hoe : " Ô mpampianatry e! da tianay raha mba aninao izay raha angatahinay aminao agnaby". ³⁶ Da hoy Izy tamindreo se: "Ino izany e tianareo haniko ho anareo?" ³⁷ Da hoy indreo: "Apetray iay hiaraky hipetraky aminao ao ame voninahitry misy Anao, da gne raiky ame tagnanao ankavanagny da gne raiky ame gn'ankavianao." ³⁸ Fa i Jesosy namaly andreo hoe: "Da tsy lalanareo e raha angatahinareo. Anareo izany ho afaky hindrano ame kapoaky hindranomako na hiaritry ho anigny batisa ame hamboaragny batisa Anà?" ³⁹ Da hoy indreo koa se: "Vitanay izany". Da nizaka koa i Jesosy tamindreo: "Gne kapoaky hindranomako, da hindranomanareo,sady amin'izay hamboaragny Batisa Anà, e hamboaragny batisa anareo avakoa. ⁴⁰ Fa izay hipetraky eo an-tagnako ankavanako na do ankaviako da tsy miankigny aminà izany, fa izany da ho an'izay nagnomagny an'izany." ⁴¹ Refa naharegny an'izany e mpianatry folo hafa da nanomboky vignitry mafy an'i Jakoba izy amin'i Jaona. ⁴² Nangian'i Jesosy ho eo aminy indreo da nizakany hoe: "Fantatrareo me! fa gn'olo zay anigny ho mpanapaky e Jentilisa da mampanompo andreo, da e mpifehy andreo da e magnampatry fahefagny amindreo. ⁴³ Fa tsy tokony ako izany gn'aminareo. Fa ndre ia ndre ia magniry ho zakabe aminareo da aleo izy ho mpanomponareo. ⁴⁴ Sady ndre ia ndre ia te ho voalohany aminareo da aleo izy ho andevonareo. ⁴⁵ Fa e Zanak'Olo tsy avy mba ho tompoigny, fa mba hanompo,sy hanolotry gn'ainy ho takalon'aigny ho an'e maro." ⁴⁶ Avy tao Jeriko indreo. Refa nizotso e tanàgny niaraky tame mpianatriny Izy ame fokonolo Izy, e zanak' i Timeo, Bartolomeo, izay mpangataky sady jamba, nidoboky t'amoron-dalagny. ⁴⁷ Refa naharegny izy fa i Jesosy lata Nazareta e mandalo izany, da nanomboky nikiakiaky mafy sady nizaka hoe: "Ô Jesosy, Zanak'i Davida, mamindrà fo aminà rô!" ⁴⁸ Maro e nizaka mafy an'igny jamba igny, nizaka an'azy mba hisigny. F'izy voamaiky izy nikiakiaky mafy be: "ô Zanak'i Davida ah!mamindrà fo aminà rô!" ⁴⁹ Nijanogny i Jesosy da nampangaiky an'azy.Natsovandreo izy, da nozakaindreo hoe: " Mahereza! Mitsangàna! fa mangaiky anao Izy." ⁵⁰ Nariany e lambany da nitsangagny, ka nagnantogny an'i Jesosy izy. ⁵¹ Da namaly an'azy i Jesosy sady nizaka an'azy hoe: "Ino me gne raha tianao aniko aminao ? Da hoy igny jamba igny se: "Raby ô, te hahita iao." ⁵² Da hoy i Jesosy tamin' azy: "Mandiana. Gne finoanao gne nahavonjy anao." Da nahita niaraky tamin'izay e masony, sady nagnaraky an'i Jesosy t'andalagny tegny izy.