¹ Sady raha nande tagny Jerosalema indreo, da nagnakeky an' i Betifaga sy Betania, agny ame tendrombohitry Oliva, da i Jesosy nagniraky gne roy tame mpianatriny ² da nizaka tamindreo hoe: "Mandiana amiry tanagny kidy aloantsika iry. Ra tafiditry amignao anareo, da ahita zana-boriky raiky mbola tsy nitikinan' olo. Tatay izy da indeso aminà aty. ³ Ra misy olo mizaka aminareo hoe: "Nagnino anareo magnano anio? Da zakay izy hoe: Misy ilan' i Tompo an'azy da hapodigny malaky aty izy." ⁴ Nandeha nizotso indreo da nahita zana-boriky raiky mifiny t' ambadik'e tragno agnilan'e varangaragny raiky amoron-dalagny, da nitatàndreo gne tadiny. ⁵ Nisy olo sasany nitsangagny teo da nizaka tamindreo hoe: "ino me gnaninareo, manataky anio zana-boriky io?" ⁶ Da nozakainy andreo gne zakan' i Jesosy tamindreo, da napetran'olo handeha ame lalany hombany indreo. ⁷ Da nindesin'e mpianatry roy lahy tamin'i Jesosy gne zana-boriky da naniny tambonin' igny gne lambandreo ka afaky nitikigny tamin'azy i Jesosy. ⁸ Maro gn'olo namelatry e lambany tame lalagny, sady gne sasany koa, da namelatry rantsan-kazo izay notapàtapàny avy t'agnatin'ala. ⁹ Da indreo nandeha talohany miaraky ame gn'olo nagnaraky an'Azy nangaiky hoe: "Hosana! deraigny izay raiky avy ame gn'agnaran'i Tompo. ¹⁰ Deraigny e fanjakagny ho avin'i Davida abatsika ! Hosana agny ame gn'ambony indrindra!" ¹¹ Avy teo Jesosy niditry an'i Jerosalema da niditry ampengonagny da nagnetignety raha marobe. Da, efa ne-hariva gnandro, da nandeha ta Betania Izy miaraky ame roambinifolo lahy. ¹² Gn' andro magnaraky, raha nipody avy ta betania indreo, da nosaregny Izy. ¹³ Da nahita hazon' aviavy raiky nidoroboky lavidavitry tery, da nagnantogny Izy hagnety sao da misy hisikiny tamin'azy, sady refa nagnantogny amin'izany Izy, da tsy nahita ndre ino ndre ino afa tsy gne ravigny fotsiny, fa tsy mbola fotoan'e famohazany gn'aviavy tamin' io. ¹⁴ Da nizaka izy tamizany hoe: "Tsy hisy hihinagny gne isikinao sanaky mandrakizay." Da naharegny an'izany gne mpianatriny. ¹⁵ Nandeha ta jerosalema indreo, da niditry tampiangonagny Izy da nanomboky nandroaky gne mpivarotry izy ame mpividy marobe tao. Nalavony gne latabatry gne mpanakalo vola izy ame sezany gne mpivarotry voromamanga. ¹⁶ Ndre ia ndre ia tsy nekeny hitondra varotry agnaty fiangonagny. ¹⁷ Da nampianatry andreo Izy da nizaka hoe: "Tsy efa voasoratry me hoe: 'Gne tragnoko da anigny hoe tragno fivavagny ho an'e firenegny agnaby? Nefa naninareo toeragny fisitrihan' e mpangalatry. ¹⁸ Regnindreo Lohan'e mpisorona izy ame mpanoradalàgny e raha nozakainy, da nitady fomba hamonoagny an'Azy indreo. Fa nataotry an'Azy indreo satria gne fokonolo agnaby da gaga tamin'e fampianarany. ¹⁹ Refa hariva igny gn'andro, da niala gne tanagny indreo. ²⁰ Da raha nandeha indreo gne mandraigny, da nahita gne kakazony gne aviavy nalazo hatrame vatriny. ²¹ Nahatadidy i Petera da nizaka hoe: "Raby ô, hiteo! Nalazo gne aviavy nozogninao." ²² Jesosy namaly andreo hoe: "Manàgna finoagny an' Andriamanitry. ²³ Zakaiko marina aminareo fa ndre ia ndre ia mizaka am' ity vohitry ity hoe: "Mitsangàna ka milavoa an-dranomasigny,' ka raha tsy misy fisalasalagny gn'ampony fa mino fa hitranga amin'azy izay nozakainy da akoizany gne hanin' Andriamanitry. ²⁴ Noho izany da mizaka aminao Iao hoe: "Gne raha agnaby hivavahanareo sady angatahanareo, minoa fa nandray an'izany anareo,da ho azonareo izany. ²⁵ Refa mitsangagny sady mivavaky anareo, da tsy maintsy mamela gn'alahelo anagnanareo agnaby ndre amin' ia ndre amin' ia anareo, mba havelan' i Abanareo Izay agny an-dagnitry agny avakoa gne fahotanareo. ²⁶ [Fagnamarihagny: Gne fandikagny tena tsara da tsy magnisy hoe (Iteo ame Matio 16:15) Mk. 11: 26 "Fa raha tsy mamela heloky anareo, da tsy hamela gne fahotanareo mihitsy koa i Abanareo Izay agny an-dagnitry." ] ²⁷ Da niakatry ho agny Jerosalema indraiky indreo.Sady raha nandendeha tam-piangonagny i Jesosy, da nagnantogny an'Azy gne lohandohan' e mpisorogny, gne mpanoradalàgny, da gne olom-be ame tanagny. ²⁸ Da hoy indreo tamin'Azy hoe: "Fahefagny lat'aia gne hagnamboaranao an'itoa raha agnaby toa, da ia gne nagnome fahefagny Anao hagnano anio?" ²⁹ Nizaka tamindreo Jesosy hoe: "Hametraky fagnontaniagny raiky aminareo Iao. Zakay Aminà da ho zakaiko anareo hoe fahefagny avy taia me gnagnamboarako anio raha agnaby io. ³⁰ Gne batisan' i Jaona lat' an-dagnitry izany sa lat'amin'olo? Valio Iao." ³¹ Nifampidiniky miaraky indreo sady nifamaly sy nizaka hoe: 'Raha mamaly itsika hoe: 'lat'an-dagnitry,' da hizaka Izy hoe: Nagnino anareo tsy mino an'azy? ³² Fa raha mamaly koa itsika: 'Avy amin'olo,'..." Nataotry gn'olo indreo, satria resy lahatry gn'olo agnaby fa i Jaona da mpaminany tokôtry. ³³ Avy eo namaly an' i Jesosy indreo ka nizaka hoe: "Tsy lalanay." Da hoy i Jesosy tamindreo: "Iao avakoa tsy hizaka aminareo hoe fahefagny avy lat'aia gne hagnamboarako an'itoa raha toa."