¹ Lalu, aku nongan lengit yo b'ru kant bumi yo b'ru. Dongah lengit yo petamo kant bumi yo petamo dah lonyap; kant laot pun dah com ado gim. ² Lalu, aku nongan kota yo kudus, Yerusalem B'ru, turun d'ri lengit, d'ri Allah, kant dah disiopkan tokuh penganten tinok bedandan ntuk suami'a. ³ Aku ningo soro yo koras d'ri takhta bekato, "Tongan'am, kemah Allah ado di tongah-tongah ensio. Io akan tinggel di antaro sidok kant sidok akan nje'di umat-A. Allah surang akan ado di antaro sidok kant nje'di Allah sidok. ⁴ Io akan ngapus setiop aik mato d'ri mato sidok kant maut com akan ado gim, com akan ado gim pekabungan, tangisan, ndakpun aso sakit dongah yo lambet dah belalu." ⁵ Io yo dudok di takhta nyin bekato, "Tongan'am, Aku nje'dikan semuo'a b'ru! Kato-A gim, "Tulis'ak tuk dongah pekatoan-pekatoan tuk d'pat dipecayok kant benar." ⁶ Lalu, Io bekato ka aku, "Dah suntung! Aku te Alfa kant Omega, Yo Awal kant Yo Akhir. Aku akan mborikan insup kepado setiop urang yo aus d'ri mato aik kehidupan secaro cumo-cumo. ⁷ Io yo menang akan waris'ik semuo'a nyin; Aku akan nje'di Allah'a kant io akan nje'di anak-Ku. ⁸ Tapi'a, sidok yo penggolak, com pecayok, kant keji; pembunuh, urang-urang sundal, tukang sihir, b'lo penyombah behala kant semuo pendusta, akan nde'pat b'gian sidok d'lom laotan yo menyalok-nyalok tam api kant belerang. Tuk'ak kematian keduok." ⁹ Lalu, sutik d'ri tujoh malekat yo mijab tujoh cawan yo ponoh ngan tujoh bencano teakhir nyin d'tang kant bekato ka aku, "Ayok'am, aku akan nunjukkan ka ikau penganten tinok, mempelai Anak Domba nyin." ¹⁰ Lalu, io mbeik aku d'lom Roh nuju ke sebuah gunung yo sangat boser kant tinggik, sreto nunjukkan ka aku kota suci nyin, Yerusalem, yo turun d'ri lengit, d'ri Allah, ¹¹ ponuh ngan kemulioan Allah kant cahayo'a tokuh permato yo sangat mahal, tokuh permato Yaspis, jernih tokuh kristal. ¹² Kota nyin mpunya'ik tembok yo boser kant tinggik ngan duok belas lawang gerbang. Pado lawang-lawang gerbang nyin ado duok belas malekat kant demo-demo tetulis di atas'a, yonyin demo keduok belas suku Israel. ¹³ Ado tigo lawang gerbang di sebolah timur, tigo lawang gerbang di sebolah utara, tigo lawang gerbang di sebelah selatan, tigo lawang gerbang di sebolah barat. ¹⁴ Tembok kota nyin mpunya'ik duok belas b'tu pondasi kant di atas b'tu-b'tu pondasi nyin tetulis demo keduok belas rasul Anak Domba. ¹⁵ Malekat yo bebicaro ka aku nyin mijab sebuoh tongkat pengukur yo tepulah d'ri omas ntuk ngukur kota nyin, lawang-lawang gerbang'a, kant tembok'a. ¹⁶ Kota nyin bebentuk segi ompat, panjang'a samo ngan lebar'a. Io ngukur kota nyin ngan tongkat'a, duok belas ribu stadia; panjang, lebar, kant tinggik'a samo. ¹⁷ Lalu, io ngukur tembok kota nyin, seratus ompat puloh ompat hasta, mnurut ukuran ensio, yo gam mrupokan ukuran malekat. ¹⁸ Tembok kota nyin tebuat d'ri permato yaspis kant kota nyin tebuat d'ri omas murni, sebening kaco. ¹⁹ Pondasi tembok kota nyin tediri atas semuo jenis permato yo yo mahal. B'tu pondasi yo petamo te b'tu yaspis, yo keduok b'tu safir, yo ketigo b'tu mirah, yo keompat b'tu zamrud, ²⁰ yo kelimok b'tu unam, yo keonam b'tu sardis, yo ketujoh b'tu ratna cempaka, yo kedelapan b'tu beril, yo kesembilan b'tu krisolit, yo kesepuluh b'tu krisopras, yo kesebelas b'tu lazuardi, kant yo keduok belas te b'tu kecubung. ²¹ Keduok belas lawang gerbang'a te duok belas mutiaro, mansing-mansing lawang gerbang tebuat d'ri sutik mutiaro.J'len kota nyin tebuat d'ri omas murni, sebening kaco. ²² Aku com nongan Bait Allah di d'lom kota nyin dongah Doto, Allah Yo Mahakuaso, kant Anak Domba suran'ak Bait Allah kota nyin. ²³ Kota nyin com prelukan matoari atau bulen ntuk nerang'ik'a dongah kemulioan Allah norang'ik kota nyin kant Anak Domba te lampu'a. ²⁴ Bangso-bangso akan beje'len d'lom cahayo kota nyin kant rajo-rajo di bumi akan mbe'ik kemulioan'a ke d'lom'a. ²⁵ Lawang-lawang gerbang'a com akan kolok di tutup pado siang ari, kant com akan ado malom ari dinun. ²⁶ Sidok akan mbeik kemulioan kant hormat bangso-bangso ke d'lom kota nyin ²⁷ Tapi, com sesuatu pun yo najis akan mansuk ke d'lom kota nyin, gam urang yo ngelakukan hal-hal keji ndakpun pebuatan ngelakar, mleinkan engkah yo demo'a tetulis d'lom Kitab Kehidupan Anak Domba.