¹ Lalu, aku nongan malekat turun d'ri surgo, mbeik kunci jurang maut kant sebuah rantai boser di jeri'a. ² Io nangkop naga nyin, si Ular Tua, yo te Setan kant Iblis, kant ngobet'a selambet seribu taon, ³ ngelemparkan'a ke d'lom jurang maut, nutup'a, kant nyegel'a supayo io com akan nyosatkan bangso-bangso gim, sampai masa seribu taon nyin beakhir. Abis nyin , io akan dilopaskan ntuk sementaro. ⁴ Lalu, aku nongan takhta-takhta kant di atas'a dudok urang-urang yo diborik kuaso ntuk ngakim'ik.Aku nongan jiwo urang-urang yo di pancung kepalok'a dongah kesaksian Yesus kant dongah firman Allah, kant sidok yo com nyombah binatang nyin atau patung'a kant com nerimok tando binatang nyin pado kening ndakpun jeri sidok. Sidok idup b'lik kant merintah besamo Kristus selambet seribu taon. ⁵ Tapi'a, urang-urang mati laen'a com idup gim sebolom masa seribu taon nyin beakhir. Tuk 'ak kebengkitan petamo. ⁶ Diberkat'ik kant kudus'ak urang-urang yo mporeh b'gian d'lom kebengkitan petamo nyin. Teadop urang-urang nyin, kematian keduok com bekuaso, tapi sidok akan nje'di imam-imam Allah kant Kristus, kant akan merintah besamo Io selambet seribu taon. ⁷ Seabis masa seribu taon beakhir, Iblis akan dilopaskan d'ri penjero'a. ⁸ Io akan pogi ntuk nyosatkan bangso-bangso pado keompat penjuru bumi, Gog kant Magog, kant ngumpolkan sidok ntuk beperang. Jumlah sidok tokuh paser di laot. ⁹ Sidok nait ke dataran bumi kant ngopung pekemahan urang-urang kudus kant kota yo tekaseh. Tapi api turun d'ri lengit kant nganguskan sidok. ¹⁰ Lalu, Setan yo dah nyosatkan sidok dilemparkan ke d'lom laotan api kant belerang, diok'am binatang kant nabi palsu nyin gam dilemparkan. Sidok akan disikso siang kant malom selamo-lamo'a. ¹¹ Abis nyin, aku nongan takhta puteh yo boser kant Io yo dudok di atas-A, yo d'ri adopan-A bumi kant lengit lonyap kant com ditomukan gik tempat b'gi siodok. ¹² Kant, aku nongan urang-urang mati, bosar kant kocik, bediri di adopan takhta nyin. Lalu, dibukok'am kitab-kitab kant sebuoh kitab yo laen, yonyin Kitab Kehidupan, kant urang-urang mati nyin dihakim'ik bedasarkan ope yo tetulis d'lom kitab-kitab nyin, sesuai ngan pebuatan sidok. ¹³ Laot nyorahkan urang-urang mati yo ado di d'lom'a, maut kant Hades gam nyorahkan urang-urang mati yo ado di d'lom'a kant sidok dihakim'ik, mansing-mansing nurut pebuatan'a. ¹⁴ Lalu, maut kant Hades dilemparkan ke d'loom laotan api. Tuk'ak kematian yo keduok -lautan api-. ¹⁵ Opebilo demo seseurang com tetulis d'lom Kitab Kehidupan, io akan dilemparkan ke d'lom laotan api.