¹ Lalu, malekat nyin nunjokkan ka aku sungai aik kehidupan, yo bening tokuh kristal, ngaler d'rik takhta Allah kant Anak Domba ² tongah-tongah j'len kota nyin. Di keduok sisi sungai, tumboh pohon kehidopan yo ngaselkan duok belas jenis buoh kant ngaselkan buoh'a tiop bulen. Daun-daun pohon nyin digunokan ntuk nyombuhkan bangso-bangso. ³ Com ado gim kutuk, tapi takhta Allah kant Anak Domba akan ado di d'lom kota nyin. Hamba-hamba-A akan nyombah Io. ⁴ Sidok akan nongan muko-A kant demo-A akan tetulis pado kening sidok. ⁵ Malom com akan ado gim sehinggo sidok com prelukan cahayo lampu ndakpun matoari dongah Doto Allah akan nerang'ik sidok, kant sidok akan merintah selamo-lamo'a. ⁶ Malekat nyin bekato ka aku, "Semuo pekatoan tuk tepat kant benar. Doto, Allah d'ri roh b'lo nabi nyuroh malekat-A ntuk nunjokkan ka hamba-hamba-A ope yo cak segero teje'di. ⁷ Dingo'am, Aku segero d'tang! Diberkat'ik'ak urang yo naat'ik pekatoan-pekatoan nubuat kitab tuk." ⁸ Aku, Yohanes, yo dah ningo kan nongan semuo'a nyin. Tengkalo aku ningo kant nongan semuo'a, aku besujud ntuk nyombah di kaki malekat yo dah nunjukkan semuo nyin ka aku. ⁹ Tapi, io bekato ka aku, "Nang lakukan nyin! Aku te hamba samo tokuh ikau kant saude'ro-saude'ro ikau, b'lo nabi, sreto tokuh sidok yo naat'ik pekatoan-pekatoan d'lom kitab tuk. Sombah'ak Allah!" ¹⁰ Lalu, malekat nyin bekato ka aku, "Nang nyegel pekatoan-pekatoan nubuat d'lom kitab tuk dongah waktu'a dah somak." ¹¹ Ronakk pom urang-urang yo buat jahat totap bebuat jahat, urang yo com suci tetap com suci, urang yo bebuat benar totap lakukan kebenaran, kant urang yo kudus totap nguduskan dirik'a." ¹² "Dingo'ak, Aku segero d'tang! Kant, Aku mbeik upah-Ku, ntuk mbeles setiop urang nurut pebuatan'a. ¹³ Aku te Alfa kant Omega, Yo Petamo kant Yo Akhir. ¹⁴ Diberkat'ik'ak sidok yo ncuci jubah sidok sehinggo sidok mpunya'ik pohon kehidupan nyin kant mansuk ke kota nyin ngelalu'ik lawang-lawang gerbang'a. ¹⁵ Yo di luar kota nyin asuk-asuk,urang yo ngelakukan sihir, urang-urang cabul, b'lo pemunuh, b'lo penyombah behala, kant urang-urang yo nyuko'ik kebohongan. ¹⁶ Aku, Yesus, dah nyuroh malekat-Ku ntuk besaksi ka ikau tontang semuo'a nyin b'gi jemaat-jemaat. Aku'ak tunas kant keturunan Daud, Sang Bintang Timur yo benderang. ¹⁷ Roh kant penganten tinok nyin bekato, "Ayok'ak! Pus'am urang yo ningo tuk bekato," Ayok'ak! Pus'am urang yo aus d'tang; pus'am urang yo besedio ngambik aik kehidopan secaro cumo-cumo." ¹⁸ Aku besaksi ka semuo urang yo dingo pekatoan nubuatan kitab tuk: " Mun ado yo nambahkan sesuatu pado pekatoan-pekatoan tuk, Allah akan nambahkan ka io semuo bencano yo tetulis d'lom kitab tuk. ¹⁹ Kant, mun ado yo ngurang'ik sesuatu d'ri pekatoan-pekatoan d'lom kitab nubuatan tuk, Allah akan ngambik b'gian'a d'ri pohon kehidupan, d'ri kota kudus, kant d'ri hal-hal yo tetulis d'lom kitab tuk." ²⁰ Io yo besaksi ngonok'ik hal-hal tuk bekato, " Ya, Aku segero d'tang." Amin! D'tang'am, Doto Yesus! ²¹ Anugerah Doto Yesus nyerto'ik ikau semuo. Amin.