¹ Roh 'ngatokan ngan j'las bahwa pado waktu-waktu teakhir, sekelompok urank akan nge'ninggelkan iman io ngan nge'nyorahkan dirik kepado roh-roh penyosat ngan ajeran setan-setan. ² Sidok dingasut'ik ngelalui kemunafikan paro pemulak yo ati nurani'a dah dicap kan b'si panas. ³ Sidok ngelarank urank nikah kant ngelarank urank makant makanan yo dicipto Allah, yo searus'a diterimok ngan ucapan syukur tam sidok yo pecayok kant ngenal kebenaran. ⁴ Sebab, segelo jolu yo diciptokan Allah nyin b'et kant com ado yo haram mun diterimok ngan ucapan syukur, ⁵ dongah semuo nyin disucikan ngan Firman Allah kant doa. ⁶ Ngan ngajerkan hal-hal nyin kepado saudero-saudero seiman, ikau akan nyedi pelayan Yesus Kristus yo b'et, sekoti ikau dah dididik dlom pekato-pekatoan iman kant ajeran sehat yo dah ikau ikuti. ⁷ Jauhi'ak cerito-cerito tahyul kant cerito-cerito inek tua, tapi latih'ak dirik kau 'tuk idop dlom kesalehan. ⁸ Latihan badeni tebatas guno'a, tapi'a kesalehan beguna dlom segelo hal dongah ngandunk jenji 'tuk ke'idupan tum'a kant punt ke'idupan yo akan d'tank. ⁹ Pekatoan tuk d'pat dipecayok kant layak diterimok sepenuh'a. ¹⁰ Ntuk nyin'am, kito krejo koras kant bejuank. Dongah, kito naruh pengaropan kito kepado Allah yo idup, yo adolah Juru Selamat semuo ensio, utama'a sidok yo pecayok. ¹¹ Perintahkan kant ajerkan'ak hal-hal nyin. ¹² Nank ado urank yo ngerendah'ik ikau dongah ikau mudok, tapi nyedi'a contoh begi urank-urank pecayok dlom pekato'an, kelaku'an, kasih, iman, kant kesucian. ¹³ Nyampai aku d'tank, betekun'ak d'lom ngebaco besamo Kitab Suci, d'lom morik nasehat, kant d'lom ngajer. ¹⁴ Nank nyia-nyiakan karunia rohani yo ado pado ikau yo diborikan kepado ikau ngaluik nubuatan saat dewan penatua numpank jeri'a atas ikau. ¹⁵ Lakukan'ak hal-hal tuk ngan raget, borikan'ak dirik kau sautuh'a ntuk ngelakukan hal-hal tuk supayo semuo urank d'pat nge'nongan kemajuan kau. ¹⁶ Peratikan ngan b'nar-b'nar koti caro kau idop kan ope yo kau ajer'a. Raget'a di delom'a dongah ngan bebuet tokuh nyin ikau akan nyelamatkan dirik kau surank ndakpun sidok yo ndingo ajeran kau.