¹ Nank negur lelaki yo lobih tuo ngan koras, tapi'a pelakukan io tokuh seurank apak, kant pelakukan lelaki yo lobih mudok tokuh medik. ² Pelaku'ak tinok yo lobih tuo sebegei umak, kant tinok yo lobih mudok tokuh medik betinok ngan ponoh kesucian. ³ Hormat'ak jando-jando yo bnar-bnar jando. ⁴ Mun, jando dah ado anak ndakpun cucu, sidok'ak yo petamo-tamo arus belejer nunjukan bakti kepado seisik umah'a surank. Ngan tokuhnyin, sidok dah mbeles budi kepado urank tuo sidok, dongah hal tuk'ak yo nyonankan ati Allah. ⁵ Sodank'a yo bnar-bnar jando kant idop surank dirik, io arus naruh arap'a kepado Allah sreto trus naitkan pamuhun kant doa siank kan malom. ⁶ Mun, jando yo engkah nak idup befoya-foya, io dah mati walaupun io gik idup. ⁷ Prentakan'ak gak'am hal-hal tuk kepado jemaat supayo sidok com becola. ⁸ Tapi'a, mun seurank com peliaro keluargo'a surank, khusus'a keluargo somak'a, reti'a io dah nyengkalik iman'a kant lobih j'hat derikpado urank yo com pecayok. ⁹ Jando yo dimansuk dlom daftar engkah'a tinok yo baumur se'acom-acom onam'a 60 tahun, bini derik sikuk laki, ¹⁰ kant dikonal dongah pebuetan-pebuetan b'et'a, yonyin ngebosar'ik anak-anak, morik urank numpank, ngebasuk kaki urank-urank kudus, ngenulunk urank yo susah, kant betekun dlom setiap pekrejoan yo b'et. ¹¹ Mun, jando-jando yo lobih mudok nank dimasuk'a ke d'lom daftar, dongah mun napsu seksual'a, ngemulah sidok jauh derik Kristus, sidok nyin ndak nikah gik. ¹² Hal nyin ngedetankan hukuman dongah sidok dah ngingkar'ik jenji petamo yo sidok mulah sebelom'a. ¹³ Kant pun, sidok mulai tebiaso malas-malasan, bekelilink derik satu umah ka umah yo lain. Kant com engkah nyin pe, sidok pun ngosip kant ngecampurik urusan urank laen,ngato'a hal-hal yo se'arus'a com sidok ngato'a. ¹⁴ Jedi, aku ndak supayo jando-jando mudok nikah gik, ngelahirkan anak, kan ngurus umah tanggok'a supayo com ado kesompat'ak begi lawant 'ntuk ngecela sidok. ¹⁵ Dongah, seberope urank dah balek ngikut setan. ¹⁶ Mun ado seurank tinok pecayo yo ngepunya'ik sanak keluargo yo jando, ronak'a sidok meliaro jando-jando nyin supayo gerejo com arus dibebanik, kant gerejo dpat ngenulunk jando-jando lain yo b'nar-b'nar arus ditulunk. ¹⁷ Penatuo-penatuo yo ngurus jemaat ngan b'et layak nerimok hormat duok kali lipat, utama'a sidok yo bekrejo koras dlom behotbah kant ngajer. ¹⁸ Dongah, kato Kitab Suci,"Nank ngemasank penutup mulot lembu yo tongah giling gandum," kant, "Seurank pekrejo ado hak ngedepat upah'a." ¹⁹ Nank nerimok tuduhan kepado penatuo kecuali ado bukti derik duok ndakpun tigo urank saksi. ²⁰ Sidok yo bebuet dosa arus ditegor di adop semuo urank supayo yo laen nyedi golak'a buet dosa. ²¹ Di adopan Allah, Yesus Kristus, kan para malekat yo ta'pilih, aku ngingatkan ikau ngan sungguh-sungguh supayo nurutik petunjuk-petunjuk tuk tanpa prasangko atau pilih kasih. ²² Nang telalu copat numpank jeri atas sope pun atau nang ikut ambik bgian dlom dosa urank laen. Jago'ak agar dirik kau totap suci. ²³ Nang engkah minum aik putih, tapi gunokan sedikit anggur demi porut kau kan beden kau yo sering sakit. ²⁴ Dosa drik sbagian urank sangat jolas ketongan sampai ngenuntut sidok kepado pengadilan. Tapi, dosa drik sebegian urank laen beru nak ketongan nantik. ²⁵ Piyok gak ado yo mulah b'et yo jolas ketongan. Tapi yo mulah b'et yo com ketongan pun, acom terus tetapok.