¹ Lalu aku nee'k ka kokot kanan Ia nang duduk ka atas tahta koa, sabuah golongan kitap, nang dinulisi'k sabalah daapme ba sabalah uase di materai ba tujuh materai. ² Ba aku nee'k seko'urakng malaekat nang tagap, nang bakata ba suara nang nyarekng, jare: " Saegek nang pantas muka' golongan kitap koa, ba muka'k materai-materaie?" ³ Tapi ina ada seko'k pun urakng nang ka saruga gek pun nang ka dunia gek nang ka babah bumi, nang bisa muka'k golongan kitap koa gek pun nang bisa nee'k sabalah daapme. ⁴ Lalu nangislah aku sedih sidi, barang ina ada seko' urakngpun nang dinganggap pantas untu' muka golongan kitap koa gek pun nee'k sabalah daapme. ⁵ Tarus bakatalah seko' dari tua-tua koa ka aku; "Ame kao nangis! Sasidie, singa dari suku Yehuda, yakoa combok Daut, udah manang, Ia bisa muka'k golongan kitap koa ba muka'k tujuh materai koa. ⁶ Tarus aku nee'k ka tangah-tangah tahta ba kaampat mahluk koa ba ka tangah-tangah tua-tua koa badiri seko'k Anak Domba nang aya udah dinyambaleh, batanuk tujuh, bamata tujuh: koalah tujuh Roh Jubata nang dingutus ka saluruh dunia. ⁷ Lalu ataknglah Anak Domba koa ba narima'k golongan kitap koa dari kokot Ia nang duduk ka atas tahta koa. ⁸ Sawaktu Ia naap golongan kitap koa, basujutlah kaampat mahluk ba kadua puluh ampat tua-tua koa ka adapatn Anak Domba koa, masing-masing nyingii'k sege'k kacapi ba sege'k cawan amas, barinsik ba kamayan: koalah doa urakng-urakng kudus. ⁹ Tarus kabatnne ngalaguatn lagu barahu: "Kao pantas narima' golongan kitap koa ba muka' materai-materaie; barang Kao udah dinyambaleh ba darah-Nyu ugak Kao udah mali kabatnne untu' Jubata dari tiap-tiap suku, bahasa, kaum, ba bangsa. ¹⁰ Ba Kao udah minjawat kabatnne jaji suatu kerajaan, ba jaji imam-imam untu' Jubata diri'k, ba kabatnne akan mamarentah jaji raja ka dunia." ¹¹ Tarus aku nee'k ba nangar suara manyak malaekat sakuliling tahta, mahluk-mahluk ba tua-tua koa; jumbalah kabatnne balaksa-laksa baribu-ribu laksa, ¹² Lalu bakata nyarekng: "Anak Domba nang dinyambaleh koa pantas untu' narima'k kuasa, ba kakayaan, ba hikmat, ba kakuatan, ba hormat, ba kamuliaan, ba puji-pujian!" ¹³ Lalu aku nangar samua mahluk nang ka saruga ba nang ka bumi ba nang ka babah bumi ba nang ka laot ba nang samua ada kadaapmme, bakata: "Untu' Ia nang duduk ka atas tahta ba untu' Anak Domba, puji-pujian ba hormat ba kamuliaan ba kuasa sampe salama-lamae!" ¹⁴ Lalu kaampat mahluk koa bakata: "Amin". Lalu tua-tua koa basujut nyambah Ia.