¹ Tarus aku nee'k Anak Domba koa muka'k nang doho'k dari tujuh materai koa, ba aku nangar nang doho'k dari kaampat mahluk koa bakata nyarekng aya bunyi suara guntur: "Ijek!" ² Ba aku nee'k: sasidie, ada seko'k kuda putih ba urakng nang naiki'k ia nyinggi'ik sete' panah ba ka ia di mareaatn sabuah mahkota. Lalu ia maju jaji pamanang untu' ngarabut kamanangan. ³ Ba sawaktu Anak Domba koa muka' materai nang kadua, aku nangar mahluk nang kadua bakata: "Ijek!" ⁴ Lalu majulah seko'k kuda lain, seko'k kuda merah sidi ba urakng nang naiki'k ia dimarei'k kuasa untu' naap damai sejahtera dari atas bumi, sampe jajie dangan saling babunuh, ba ka ia dimareatn ugak sabuah pedang nang aya'k. ⁵ Ba sawaktu Anak Domba koa muka' materai nang katalu, aku nangar mahluk nang katalu koa bakata: "Ijek!" Lalu aku nee'k: Sasidie, ada seko'k kuda itapm ba urakng nang naiki'k ia nyingii'k sabuah timbangan ka kokote. ⁶ Tarus aku nangar aya ada suara ka tangah-tangah kaampat mahluk koa bakata: "Sagangapm gandum sadinar, ba talu gangapm sadinar. Tapi amelah rusakkatn binyak ba anggur koa!" ⁷ Lalu sawaktu Anak Domba koa muka' materai nang ka ampat, aku nangar suara mahluk nang kaampat bakata: "Ijek!" ⁸ Ba aku nee'k sasidie, ada seko'k kuda ijo kuning ba urakng nang naiki'k ia badama maut ba karajaan maut nunaan ia. Ba ka kabatnne koa dimareatn kuasa atas sapar ampat dari bumi untu'k di bunuh ba pedang, ba kalaparatn ba panyakit manular, ba binatang-binatang buas nang ka dunia. ⁹ Ba sawaktu Anak Domba koa muka materai nang kalima, aku nee'k kababah mesbah jiwa-jiwa dangan nang udah dimunuh karna firman Jubata ba kasaksian nang kabatnne koa milik'ik. ¹⁰ Lalu kabatnne koa bakata nyarekng, jare: "Sangahe lama agik lah, o Panguasa nang kudus ba banar, Kao ina'k ngakimi'k ba ina'k maasatn darah kami ka dangan nang diapm ka bumi?" ¹¹ Tarus kabatnne koa dimarei'k masing-masing sabaah jubah putih, ba ka kabatnne dimatakatn, kade' kabatnne harus baistirahat sadikit waktu agik sampe ganap jumbalah ayukng-ayukng palayan ba kamaruk-kamaruk kabatnne, nang akan dibunuh sama aya tolen kabatnne ¹² Lalu aku nee'k, sawaktu Anak Domba koa muka' materai nang kaanam, sasidie jajilah gempa bumi nang sidi kuat ba mataari jaji itapm aya tolen karong buuk ba buatn jaji merah samuae aya darah. ¹³ Ba bintakng-bintakng kaangit bajantuatn ka atas bumi aya tolen puhutn ara nang nguguratn buah-buahhe nang manta'k, sawaktu ia dingucakng di angin nang kuat. ¹⁴ Lalu susutlah angit aya golongan kitap nang dingolong ba tageserlah bukit-bukit ba pulau-pulau dari tampatte. ¹⁵ Tarus raja-raja ka bumi ba pamimpin-pamimpin ba perwira-perwira, ba urakng-urakng kaya ba urakng-urakng bakuasa, ba samua budak ba urakng merdeka batapor ka daapm gua-gua ba ka sisi-sisi batu nang ka bukit. ¹⁶ Tarus kabatnne bakata ka bukit-bukit batu koa: "Runtuhlah tapo'k kami ba taporatnlah kami dari Ia, nang duduk ka atas tahta ba kamurkaatn Anak Domba koa. ¹⁷ Barang udah sampe ari berae nang sid-sidi sae gek nang mampu batahan?